24 февраль куни Тошкент халқаро аэропортининг учиб кетиш залида «Анжир» бизнес залининг очилиш маросими бўлиб ўтди, дея хабар бермоқда унда қатнашган «Газета.uz» мухбири.
Бизнес зали аэропортнинг жўнаб кетиш терминали «стерил» ҳудудининг иккинчи қаватида жойлашган бўлиб, 427 квадрат метр майдонни эгаллайди. Ундаги икки қаватнинг ўзида 116 йўловчини қабул қилиш имконияти мавжуд.
У Wi-Fi, алоҳида душ ва ҳожатхоналар, чақалоқларни йўргаклаш столлари ва уларни овқатлантириш учун ўриндиқлар билан таъминланган. Шу билан бирга, йўловчиларга озиқ-овқатлар ва алкоголсиз ичимликлар таклиф этилади.
Тошкент халқаро аэропорти директори Жасур Пўлатовнинг сўзларига кўра, мазкур зал CIP Lounge ва «Анор» залидан кейинги учинчи шундай зал ҳисобланади.
«2024 йилда биз қарийб 9 млн йўловчига хизмат кўрсатдик. Йўловчилар оқими ҳам ҳар йили ортиб бораётгани сабабли бизнес залларига ҳам эҳтиёж туғилмоқда. Энди пойтахт аэропортида мавжуд бўлган заллардан ташқари биз „Анжир“ бизнес залининг очилишини эълон қилишдан мамнунмиз», — деди у очилиш маросимидаги нутқида.
«Анжир» бизнес залини Озарбайжоннинг VIP Services Group компанияси бошқаради. Компания Ҳайдар Алиев номидаги Боку халқаро аэропорти ва Ганжа халқаро аэропортида йўловчиларга хизмат кўрсатиш бўйича 10 йилдан ортиқ тажрибага эга.
Жасур Пўлатов.
Uzbekistan Airports ва VIP Services Group ўртасида электрон очиқ савдолар якунлари бўйича тегишли шартнома имзоланди. Бошқарувчи компания ижара ҳақига қўшимча равишда залда хизмат кўрсатилган ҳар бир йўловчи учун ҳар чоракда Uzbekistan Airports ҳисобига 39 минг сўмдан ўтказади. Шартнома йиллик ижара тўлови миқдорида аванс тўлаш шарти билан 5 йил муддатга тузилади.
«Биз Озарбайжондан ташқаридаги илк бизнес залимиз айнан биродар Ўзбекистонда очилганидан фахрланамиз. Зал глобал кенгайиш стратегиямизнинг муҳим қисми ҳисобланади. Умид қиламизки, у биз дунёнинг бошқа аэропортларида очишни режалаштирган келажакдаги заллар учун намуна бўлади», — деди компания бош директори Собир Шукуров.
Собир Шукуров.
Киши бошига залдан фойдаланиш нархлари 2 соат қолиш учун:
- 2 ёшдан кичик болаларга — бепул;
- 2 ёшдан 12 ёшгача бўлган болаларга — $20;
- 12 ёшдан катталарга — $40.
Маълумот учун, Turkish Airlines ва Air Astana авиакомпанияларининг биринчи ва бизнес класс йўловчилари, шунингдек, Priority Pass, LoungeKey, DragonPass, Every Lounge карталари эгалари ҳамда содиқлик дастурлари иштирокчилари ушбу залдан бепул фойдаланади. Бундан ташқари, иккинчи қаватдаги зал Ўзбекистон банклари томонидан чиқарилган Mastercard премиум карта эгалари учун очиқ.
