Буюк Британия душанба куни Украинадаги урушнинг дастлабки кунларидан бери Россияга қарши энг йирик санкциялар пакетини эълон қилди, бу ҳақда мамлакат ҳукумати сайтида маълум қилинди. Санкциялар, жумладан, Россия ҳарбийлари томонидан ишлатиладиган бутловчи қисмларни етказиб берувчи бутун дунё бўйлаб компанияларга қаратилган.
Пакетда, шунингдек, Шимолий Корея қўшинларининг Россияга жойлаштирилиши муносабати билан КХДР мудофаа вазири Но Кванг Чол ҳамда бошқа генераллар ва юқори мартабали амалдорлари номи бор. Улар КХДРнинг 11 мингдан ортиқ қўшинини Россияга жойлаштиришда иштирок этган. Путин КХДР кучларидан замбарак еми (олд қаторларда) сифатида фойдаланмоқда; КХДРда аллақачон 4 мингдан ортиқ қурбон бор, дейилади хабарда.
Бундан ташқари, Қирғизистонда жойлашган «Керемет Банк» (бу банкни АҚШ ҳам санкциялаган) санкциялар остида қолди. Бу Америка санкцияларига учраган Марказий Осиёдаги биринчи банк бўлганди. Биз биринчи марта Россиянинг уруш машинасини қўллаб-қувватловчи хорижий молия институтларини нишонга олиш учун янги ваколатлардан ҳам фойдаланмоқдамиз. Бу Россиянинг уруш ҳаракатларини қўллаб-қувватлаш учун халқаро молия тизимидан фойдаланишига тўсқинлик қилади, дейилади ҳужжатда.
Британия Ташқи ишлар вазирлиги дастгоҳлар, электроника ва икки мақсадли товарлар, жумладан, қурол тизимларида ишлатиладиган микропроцессорлар ишлаб чиқарувчилари ва етказиб берувчиларига нисбатан санкциялар қўлланаётганини айтди.
Улар Марказий Осиё давлатлари, Туркия, Таиланд, Ҳиндистон ва Хитой каби бир қатор учинчи мамлакатларда жойлашган. Санкциялар рўйхатига киритилган бадавлат россияликлар орасида миллиардер тадбиркор Роман Троценко ҳам бор.
Санкция нишонлари орасида, жумладан, Grant-Trade МЧЖ, унинг эгаси Марат Мустафаев ва унинг синглиси Динара Мустафаева бор, улар компаниядан урушни қўллаб-қувватлаш учун илғор Европа технологияларини Россияга киритишда фойдаланган.
Ҳукумат, шунингдек, Россияга нефтни ташиш орқали санкциялардан қочишга ёрдам бериш учун фойдаланилгани айтилган яна 40 та кемани ҳам санкциялади. Умуман олганда, санкциялар рўйхатига 67 та юридик ва жисмоний шахс, шунингдек, 40 та кема киритилган.
«Ҳар бир ҳарбий таъминот линияси узилди, ҳар бир рубль блокланди ва Путиннинг тажовузкорлигини қўллаб-қувватловчи ҳар бир шахс фош этилди — бу адолатли ва мустаҳкам тинчлик сари қадамдир», — деди Британия ташқи ишлар вазири Дэвид Лэмми.
Санкцияланганларнинг тўлиқ рўйхати мана бу ерда.
