Президент Шавкат Мирзиёев фармони билан «Иккинчи жаҳон урушидаги ғалабанинг 80 йиллиги» эсдалик юбилей медали таъсис этилди.
Медаль билан Ўзбекистон фуқаролари — «1941−1945 йиллардаги Улуғ Ватан урушида Германия устидан қозонилган ғалаба учун» ва «Япония устидан қозонилган ғалаба учун» медаллари билан тақдирланганлар, уруш йилларида жанговар хизматлари учун бошқа орден ва медаллар билан мукофотланган ёки уруш қатнашчиси гувоҳномасига ёхуд Ватан уруши ногирони гувоҳномасига эга бўлган Иккинчи жаҳон уруши қатнашчилари тақдирланади.
Бундан ташқари, медаль билан Иккинчи жаҳон уруши йилларида фронт ортида меҳнат қилган фахрийлар, шу жумладан, «1941−1945 йиллар Улуғ Ватан урушидаги шавкатли меҳнати учун», «Меҳнатдаги жасорати учун», «Меҳнатда ўрнак кўрсатганлиги учун» медаллари ёки уруш йилларида фуқароларни ихтиёрий равишда ҳарбий хизматга қабул қилгани тўғрисидаги гувоҳномага эга бўлган меҳнат фронти қатнашчилари ҳам тақдирланади.
Мукофотланганлар рўйхати Мудофаа вазирлиги, Ички ишлар вазирлиги, Давлат хавфсизлик хизмати, Бандлик ва камбағалликни қисқартириш вазирлиги ҳамда Иқтисодиёт ва молия вазирлиги ҳузуридаги бюджетдан ташқари Пенсия жамғармаси билан биргаликда тасдиқланади.
Медаллар бир марталик пул мукофоти билан бирга 9 май Хотира ва қадрлаш кунида топширилади.
