Фарғона шаҳридаги компьютер клубида 21 февраль куни етти нафар йигит жанжал кўтарди. Вилоят ИИБ ҳолат юзасидан изоҳ берди.
Маълум қилинишича, клубда бир гуруҳ дўстлар шовқин кўтариб, компьютер ўйнаган. Клуб иш бошқарувчиси эса уларга эътироз билдириб, тинчланишга чақирган.
Шундан сўнг йигитлардан бири, фуқаро О.Валломов клуб ходимининг юз қисмига мушт туширган. Жанжалга унинг шериклари ҳам қўшилган. Улар клубнинг бошқа бир ходимини ҳам урган.
Ҳозирда мазкур ҳолат юзасидан Жиноят кодексининг 277-моддаси 3-қисми «г» банди (Жамоат тартибини сақлаш вазифасини бажариб турган ҳокимият вакили ёки жамоатчилик вакилига ёхуд безорилик ҳаракатларининг олдини олиш чорасини кўрган бошқа фуқароларга қаршилик кўрсатиб содир этилган безорилик) билан жиноят иши қўзғатилиб, гумонланувчилар О.Валломов, М.Қодиров ҳамда Н.Маҳмуджоновларга нисбатан қамоққа олиш тарзидаги эҳтиёт чораси қўлланилган.
Шунигдек, уларнинг яна уч нафар шерикларига нисбатан маъмурий тартибда баённома расмийлаштирилган. Мазкур ҳолат вилоят ИИБ томонидан назоратга олинган. Клубда калтакланган 2 нафар йигит эса оғир аҳволда касалхонага ётқизилган.
Kun.uz`нинг ёзишича, нашр манбаси ўзини Отабек Валломов деб таништирган ва жанжални бошлаган йигит фарғоналик тадбиркор Бахтиёр Валломовнинг ўғли эканини билдирган. Бироқ нашр ўз ихтиёрида йигит тадбиркорнинг ўғли экани ҳақида аниқ далил мавжуд эмаслигини қайд этган.
