Сиёсат
Молдовага ўтган ўзбекистонликлар кейинроқ қайтарилади — ТИВ
ТИВ расмий вакили Украинадан Молдовага ўтган 200га яқин ўзбекистонликларни ватанга қайтариш масаласи кейинроқ ишлаб чиқилишини маълум қилди. Ҳозирда Польша орқали эвакуация қилиш устувор эканлиги таъкидланди.
Шавкат Мирзиёев Покистонга жўнаб кетди
Пайшанба куни Шавкат Мирзиёев Покистонга жўнаб кетди. Ташриф давомида Покистон бош вазири Имрон Хон билан савдо, инвестиция, саноат кооперацияси, транспорт, логистика, инфратузилма ва туризма соҳалари юзасидан фикр алмашилади. Қолаверса, учрашувда халқаро ва минтақавий маслалалар муҳокама қилиниши кутилмоқда.
Спортни ривожлантириш вазирига уч нафар ўринбосар тайинланди
Президент қарори билан Абдулло Аслонов, Шахрилло Махмудов ва Мурад Исмаилов спортни ривожлантириш вазирининг ўринбосарлари этиб тайинланди.
Фермерларга сув тежовчи технология жорий этган ҳар бир гектар ери учун субсидия берилади
Президент қарори билан қишлоқ хўжалигида томчилатиб суғориладиган экин майдонининг ҳар бир гектарига субсидия берилади. Бунда пахта майдонлари учун 8 млн сўм — Қорақалпоғистон ва Хоразмда 12 млн сўм, сабзавот ва полиз экинлари учун 1,5 млн сўмдан 2,5 млн сўмгача, мевали экинлар учун 6 млн сўм, узум майдонлари учун эса 8 млн сўмдан ажратилади. Бунинг учун республика бюджетидан жорий йилда 1 трлн 182,4 млрд сўм маблағ йўналтирилади.
Россия Украинадаги махсус операцияда қурбон бўлганлар сонини илк бор очиқлади
Россия Украинадаги махсус операция бошидан бери 498 нафар ҳарбий хизматчи ҳалок бўлганини ва 1597 нафари жароҳатланганини маълум қилди. Шунингдек, Россия томони Украинанинг йўқотишлари 2870 нафар одамдан кўпроқлигини таъкидламоқда. Украина расмийлари бошқа рақамларни тақдим қилишган.
Ўзбекистон ва БМТ Контртеррор бошқармаси ҳамкорликни кенгайтириш бўйича «йўл харитаси»ни тайёрлайди
Президент Шавкат Мирзиёев БМТ бош котиби ўринбосари — Контртеррор бошқармаси раҳбари Владимир Воронковни қабул қилди. Томонлар «Маърифат ва диний бағрикенглик» резолюцияси доирасида кўп томонлама тадбирлар ўтказиш, ёшларни экстремизм ва терроризмнинг салбий таъсиридан ҳимоя қилиш, «қайноқ нуқталар»дан қайтарилган шахсларни реабилитация ва реинтеграция қилиш соҳасида тажриба алмашиш ҳамда кадрлар тайёрлаш йўналишида ҳамкорлик қилиш имкониятларини муҳокама қилишди.
Элчихонани Киевдан кўчириш масаласи кўриб чиқилмаяпти — ТИВ расмий вакили
Ташқи ишлар вазирлиги расмий вакилининг айтишича, Ўзбекистон элчихонасини Киевдан эвакуация қилиш масаласи кўриб чиқилмаяпти, чунки ҳозирда дипломатик ваколатхона фаолиятининг асосий устувор йўналиши мамлакат фуқароларини хавфсиз эвакуация қилиш ҳисобланади.
Шавкат Мирзиёев 3−4 март кунлари Покистонда бўлади
Президент Шавкат Мирзиёев 3−4 март кунлари Покистонга давлат ташрифини амалга оширади. Иккитомонлама музокараларда стратегик шериклик ва кўп қиррали ҳамкорлик муносабатларини янада ривожлантириш масалалари муҳокама қилинади.
«Ўзбекистонда хорижий давлатлар томонидан ҳарбий хизматга ёллаш бошлангани ҳақидаги маълумотлар асосга эга эмас» — Мудофаа вазирлиги
Мудофаа вазирлиги Ўзбекистонда хорижий давлатлар томонидан ҳарбий хизматга ёллаш бошлангани ҳақидаги маълумотлар ҳеч қандай асосга эга эмаслигини маълум қилди. «Ўзбекистон ҳарбий хизматчилари мамлакатдан ташқаридаги ҳарбий ҳаракатларда иштирок этмайди», — дейилади баёнотда.
Нобел мукофоти совриндорлари Россия ҳукуматини қўшинларини Украинадан олиб чиқиб кетишга чақирди
163 нафар Нобел мукофоти совриндорлари Россиянинг Украинадаги ҳарбий ҳаракатларига қарши очиқ хат билан чиқишди. Улар Россиянинг хатти-ҳаракатларини мустақил Украина давлати ва Украина халқига «президент Путин бошчилигидаги асоссиз ҳарбий тажовуз», деб баҳолаган. Россия томонидан Украина ҳудудига бостириб кирилиши БМТ Низомини қўпол равишда бузиш ва 1994 йилги Будапешт меморандумига нисбатан беписандлик эканлиги қайд этилган.
Депутатлар «Давлат фуқаролик хизмати тўғрисида»ги қонун лойиҳасини маъқуллади
Чоршанба куни депутатлар «Давлат фуқаролик хизмати тўғрисида»ги қонун лойиҳасини маъқуллади. Ҳужжат билан давлат фуқаролик хизмати лавозимларининг давлат реестри юритилади ва уларга номзодлар очиқ танлов асосида танлаб олинади. Давлат хизматчисига тадбиркорлик билан шуғулланиш, хизмати эвазига жисмоний ва юридик шахслардан мукофот ёки совға олиш, чет эл фуқаролигига эга бўлиш, Ўзбекистондан ташқарида банк ҳисобрақами очиш, кўчмас ва бошқа мулкка эгалик қилиш тақиқланмоқда. Ҳужжат Сенатга юборилди.
Президент ҳамкор давлатлардаги вазият оқибатларини юмшатиш бўйича чора-тадбирлар режасини тайёрлашни буюрди
Вазирлар Маҳкамаси президент Шавкат Мирзиёев кўрсатмасига биноан Ўзбекистоннинг асосий савдо ҳамкорлари бўлган мамлакатларда юзага келаётган вазиятни ҳисобга олган ҳолда вужудга келиши мумкин бўлган барча салбий ижтимоий-иқтисодий оқибатларни юмшатиш бўйича аниқ чора-тадбирларнинг режасини ишлаб чиқади.
Энди алиментдан қарздорликни давлат тўлаб беради, кейинчалик МИБ уни ундириб олади
Президент 172 минг нафар ота ўз фарзанди учун алимент тўламагани, бугунги кунда жами 115 млрд сўм қарздорлик мавжудлигини танқид қилди. Унинг сўзларига кўра, энди алиментдан қарздорликни давлат тўлаб беради, кейинчалик МИБ қарзни ундириб олади. Бунинг учун «Алимент тўловлари» жамғармаси ташкил этилиб, унга дастлаб 50 млрд сўм ажратилади.
Маҳалла ва нуронийларни қўллаб-қувватлаш вазирлиги ташкил этилди
Президент фармонига асосан Оила ва хотин-қизлар давлат қўмитаси тузилиши муносабати билан Маҳалла вазирлиги номи ўзгартирилиб, Маҳалла ва нуронийларни қўллаб-қувватлаш вазирлиги сифатида қайта ташкил этилди. Шунга мувофиқ, эски лавозимлар тугатилиб, янгилари жорий этилмоқда. Қолаверса, 1 июлгача «Маҳалла тўғрисида» ги қонун лойиҳаси ишлаб чиқилиши ҳам белгиланди.
Украинадан ўзбекистонликларни эвакуация қилиш давом этади — ТИВ
1186 киши Украинадан Польша орқали Ўзбекистонга етказилди. Чоршанба кунига иккита рейс режалаштирилган. Ҳозирда Польшада 800 дан ортиқ Ўзбекистон фуқаролари қолмоқда. Ўзбекистон элчихонаси жанговар ҳаракатларга қарамай, эвакуация ишларини давом эттирмоқда, дея хабар бермоқда ТИВ.
2021 йилда 39 мингга яқин хотин-қизлар оилада зўравонлик бўлаётгани ҳақида мурожаат қилган — президент
Президент сешанба кунги видеоселекторда 2021 йилнинг ўзида 39 мингга яқин хотин-қизлар оилада зўравонликка учраганини маълум қилди. «Маҳаллада ишламаганимизни натижаси шу», — деди Шавкат Мирзиёев. Унинг сўзларига кўра, энди тазйиққа учраган аёллар ҳимояси суд томонидан таъминланади, ҳимоя ордери эса бир йилгача муддатга берилади.
«Қизларимиз тарбиясига салбий таъсир кўрсатаяпти». Шавкат Мирзиёев айрим сериалларни танқид қилди
Президент телеканалларда эфирга узатилаётган айрим сериалларни танқид қилиб, хотин-қизлар образи салбий бўёқларда тасвирланаётгани дунёқараши ҳали шаклланмаган қизлар тарбиясига салбий таъсир кўрсатаётганини таъкидлади. Шавкат Мирзиёев мутасаддиларга ибратли хотин-қизлар образлари акс эттирилган кино ва саҳна асарлари яратишни буюрди. Бунинг учун ижодкорларга грантлар ажратиш зарурлиги айтилди.
Янги ўқув йилидан 23 минг магистр қизнинг контракт пуллари бюджетдан тўлаб берилади
Президент Шавкат Мирзиёев янги ўқув йилидан магистратурада ўқиётган 23 минг нафар қизларнинг контракт пуллари тўлиқ бюджетдан қопланишини маълум қилди. Бунинг учун 200 млрд сўм ажратилади. Ҳар йили аниқ фанлар, техника ва ҳуқуқшунослик йўналишларида хотин-қизлар учун квотанинг камида 50 фоизи мақсадли ажратилади. Тўқимачилик соҳасида алоҳида университет ташкил этилади.
Ўзбекистондаги барча маҳаллаларда хотин-қизлар фаоли лавозими жорий қилинади
Президент Ўзбекистондаги 9309 та маҳаллада хотин-қизлар фаоли лавозими жорий қилиниши, улар аёллар масаласи ва уларнинг дарду-ташвишига жавоб беришини маълум қилди. Давлат раҳбари шунингдек, Оила ва хотин-қизлар давлат қўмитасини ташкил этиш бўйича фармонни имзолагани, қўмитанинг ҳудудий раҳбарлари ҳокимга ўринбосар бўлишини айтди.
Энди давлат ҳомиладорлик нафақасини хусусий секторда ишлаётганларга ҳам тўлаб беради
Шавкат Мирзиёев видеоселекторда ҳомиладорлик нафақасини тўламаслик учун тадбиркорлар аёлларни ишга олмаслигини танқил қилди. Таъкидланишича, 1 сентябрдан хусусий секторда ишлаётган аёлларга ҳам ҳомиладорлик нафақаси давлат томонидан кафолатли тўлаб бериладиган тизим яратилади. Энди уларга 4 ойга 2 млн сўм миқдорида бир марталик нафақа берилади.
Энг кўп ўқилган хабарлар | Сўнгги янгиликлар
Қўшимча имкониятлардан фойдаланиш учун сайтда рўйхатдан ўтинг