Toshkentda o‘zbek tilidagi 1000 dan ortiq elektron va audiokitoblarni jamlagan Mutolaa bepul mobil ilovasi taqdimoti bo‘lib o‘tdi, deb xabar bermoqda “Gazeta.uz” muxbiri.
Loyiha uchun o‘zbek va xorijiy adabiyotlar O‘zbekistonning professional dublyaj aktyorlari tomonidan ijro etildi. Bundan tashqari, o‘qish monoton bo‘lmasligi uchun matnga musiqiy hamrohlik qo‘shilgan.
Yoshlar ishlari agentligi direktori Alisher Sa’dullayev loyiha tarixi haqida so‘zlab berdi. Agentlik buni Xalq banki bilan hamkorlikda amalga oshirdi.
“Bu nom yosh jamoaga jadid Mahmudho‘ja Behbudiyning maqolalarini o‘qib chiqqandan keyin keldi. “Behbudiy ilm-ma'rifat zarurligi haqida ko‘p yozgan, uyida kutubxona tashkil etgan va “mutolaa” so‘zini ko‘p ishlatgan. Uning maqolalaridan ilhomlanib, loyihaga shunday nom berishga qaror qildik”, — deya tushuntirdi u.
Alisher Sa’dullayev. Foto: Yoshlar ishlari agentligi
Loyiha O‘zbekiston prezidentining “Yoshlar uchun ming kitob” loyihasini amalga oshirish to‘g‘risidagi qarori ijrosi doirasida amalga oshirilmoqda.
“Biz yoshlardan o‘z oldiga qanday maqsad qo‘yganingizni tez-tez so‘raymiz, — deydi Alisher Sa’dullayev. “Ko‘pchilik pul topib, mashina sotib olmoqchiligini aytadi, bu albatta tushunarli. O‘z oldiga ma’rifat va bilimni maqsad qilib qo‘yganlar oz. Biz yoshlar el-yurt ravnaqi uchun kitob o‘qishini, yurtimiz ravnaqi yo‘lida mehnat qilishini istaymiz”.
Bugungi kunda Mutolaa ilovasida 1000 dan ortiq elektron kitoblar mavjud. Bundan tashqari, ularning 500 dan ortiq audio versiyalari yozib olingan. Ilova to‘plamiga badiiy adabiyot, bolalar va ilmiy-ommabop adabiyotlar kiritilgan. Loyiha jamoasi ma’lumotlariga ko‘ra, ilovadan foydalanuvchilar soni allaqachon 300 mingga yaqin.
Mutolaa loyihasi rahbari Sirojiddin Olimovning aytishicha, loyiha o‘z oldiga qisqa muddatli uchta maqsadni qo‘ygan:
- 2024-yil oxirigacha foydalanuvchilar sonini 1 millionga yetkazish;
- O‘zbek adabiyotini ingliz tiliga tarjima qilish va xorijga eksport qilish;
- Bolalar kitoblari bozorini yaratish.
Sirojiddin Olimov. Foto: Yoshlar ishlari agentligi
Uzoq muddatda Mutolaa yozuvchilar o‘z asarlarini nashr etishlari va nashriyotlarga murojaat qilishlari mumkin bo‘lgan platformaga aylanish niyatida.
Bundan tashqari, loyiha mualliflari auditoriyani jalb qilish, ya’ni adabiy asarlarga sharhlar yaratish va o‘qish tahlillarini o‘tkazish uchun o‘qish jarayonini “o‘yinlashtirmoqchi”. Va nihoyat, loyiha yozuvchilar o‘z asarlarini tijoratlashtirishlari mumkin bo‘lgan platformaga aylanishi kerak.
Taqdimot doirasida yosh o‘zbek yozuvchisi Javlon Jovliyevning “Qo‘rqma” romani videotahlilining premerasi bo‘lib o‘tdi.
