Тошкентда ўзбек тилидаги 1000 дан ортиқ электрон ва аудиокитобларни жамлаган Мутолаа бепул мобил иловаси тақдимоти бўлиб ўтди, деб хабар бермоқда «Газета.uz» мухбири.
Лойиҳа учун ўзбек ва хорижий адабиётлар Ўзбекистоннинг профессионал дубляж актёрлари томонидан ижро этилди. Бундан ташқари, ўқиш монотон бўлмаслиги учун матнга мусиқий ҳамроҳлик қўшилган.
Ёшлар ишлари агентлиги директори Алишер Саъдуллаев лойиҳа тарихи ҳақида сўзлаб берди. Агентлик буни Халқ банки билан ҳамкорликда амалга оширди.
«Бу ном ёш жамоага жадид Маҳмудҳўжа Беҳбудийнинг мақолаларини ўқиб чиққандан кейин келди. «Беҳбудий илм-маърифат зарурлиги ҳақида кўп ёзган, уйида кутубхона ташкил этган ва «мутолаа» сўзини кўп ишлатган. Унинг мақолаларидан илҳомланиб, лойиҳага шундай ном беришга қарор қилдик», — дея тушунтирди у.
Алишер Саъдуллаев. Фото: Ёшлар ишлари агентлиги
Лойиҳа Ўзбекистон президентининг «Ёшлар учун минг китоб» лойиҳасини амалга ошириш тўғрисидаги қарори ижроси доирасида амалга оширилмоқда.
«Биз ёшлардан ўз олдига қандай мақсад қўйганингизни тез-тез сўраймиз, — дейди Алишер Саъдуллаев. «Кўпчилик пул топиб, машина сотиб олмоқчилигини айтади, бу албатта тушунарли. Ўз олдига маърифат ва билимни мақсад қилиб қўйганлар оз. Биз ёшлар эл-юрт равнақи учун китоб ўқишини, юртимиз равнақи йўлида меҳнат қилишини истаймиз».
Бугунги кунда Mutolaa иловасида 1000 дан ортиқ электрон китоблар мавжуд. Бундан ташқари, уларнинг 500 дан ортиқ аудио версиялари ёзиб олинган. Илова тўпламига бадиий адабиёт, болалар ва илмий-оммабоп адабиётлар киритилган. Лойиҳа жамоаси маълумотларига кўра, иловадан фойдаланувчилар сони аллақачон 300 мингга яқин.
Мутолаа лойиҳаси раҳбари Сирожиддин Олимовнинг айтишича, лойиҳа ўз олдига қисқа муддатли учта мақсадни қўйган:
- 2024 йил охиригача фойдаланувчилар сонини 1 миллионга етказиш;
- Ўзбек адабиётини инглиз тилига таржима қилиш ва хорижга экспорт қилиш;
- Болалар китоблари бозорини яратиш.
Сирожиддин Олимов. Фото: Ёшлар ишлари агентлиги
Узоқ муддатда Mutolaa ёзувчилар ўз асарларини нашр этишлари ва нашриётларга мурожаат қилишлари мумкин бўлган платформага айланиш ниятида.
Бундан ташқари, лойиҳа муаллифлари аудиторияни жалб қилиш, яъни адабий асарларга шарҳлар яратиш ва ўқиш таҳлилларини ўтказиш учун ўқиш жараёнини «ўйинлаштирмоқчи». Ва ниҳоят, лойиҳа ёзувчилар ўз асарларини тижоратлаштиришлари мумкин бўлган платформага айланиши керак.
Тақдимот доирасида ёш ўзбек ёзувчиси Жавлон Жовлиевнинг «Қўрқма» романи видеотаҳлилининг премьераси бўлиб ўтди.
