DXX Toshkent shahri va Namangan viloyatida qo‘shni davlatdan kontrabanda yo‘li bilan olib kelingan kuchli ta’sir qiluvchi dori vositalarini saqlagan va savdosi bilan shug‘ullangan shaxslarni aniqladi. Bu haqda “Xavfsizlik” Telegram kanali xabar qildi.
Xususan, Davlat xavfsizlik xizmatining Toshkent shahri bo‘yicha boshqarmasi xodimlari tomonidan bojxona idoralari bilan hamkorlikda Namangan shahrida tezkor tadbir o‘tkazildi.
Unda Qirg‘izistonning Jalolobod viloyati Olabuqa tumanida yashovchi, 1985-yilda tug‘ilgan fuqarosi hamda Namangan viloyatining Yangiqo‘rg‘on tumanida istiqomat qiluvchi, 1980 va 1998-yillarda tug‘ilgan 2 nafar shaxs o‘zaro kelishgan holda Qirg‘izistondan O‘zbekistonga aylanma yo‘llar orqali olib kirilgan 16 800 dona “Regapen” kuchli ta’sir qiluvchi dori vositalarini 36 ming AQSh dollariga sotgan vaqtlarida qo‘lga olindi.
Toshkent shahrida o‘tkazilgan tezkor tadbirda esa, Shayxontohur tumanida yashovchi, 1982-yilda tug‘ilgan fuqaroning yoni va avtomashina xolislar ishtirokida ko‘zdan kechirilganda 15 dona “Regapen” kuchli ta’sir qiluvchi dori vositalari borligi aniqlanib, tegishli tartibda rasmiylashtirib olindi.
Shuningdek, uning tanishi bo‘lgan, 1978-yilda tug‘ilgan, muqaddam giyohvandlik vositalari savdosi bilan bog‘liq jinoyati uchun sudlangan shaxsning Uchtepa tumanidagi yashash xonadoni ko‘zdan kechirilganda, 2967 dona “Regapen” dori vositasi borligi ma’lum bo‘lib, protsessual tartibda rasmiylashtirib olindi.
DXX Toshkent shahri bo‘yicha boshqarmasi xodimlari tomonidan bojxona idoralari bilan hamkorlikda o‘tkazilgan tezkor tadbirda “Farg‘ona-Toshkent” yo‘nalishida harakatlanayotgan Nexia rusumli avtomashina Sergeli tumani hududida to‘xtatilib, ko‘zdan kechirilganda, unda Farg‘ona shahrida yashovchi, 1989-yilda tug‘ilgan fuqaroga tegishli 1400 dona “Regapen”, 30 dona “Tropikamid” kuchli ta’sir qiluvchi dori vositalari borligi aniqlanib, protsessual tartibda rasmiylashtirib olindi.
DXX Namangan viloyati bo‘yicha boshqarmasi xodimlari tomonidan bojxona idoralari bilan hamkorlikda o‘tkazilgan tezkor tadbirda Namangan shahrida istiqomat qiluvchi, 1989-yilda tug‘ilgan, shaxsning Lacetti rusumli avtomashinasi xolislar ishtirokida ko‘zdan kechirilganda, unda 6034 dona “Regapen” kuchli ta’sir qiluvchi dori vositalari borligi aniqlanib, tegishli tartibda rasmiylashtirib olindi.
Shuningdek, tezkor tadbir davom ettirilib, mazkur fuqaroning yashash xonadonidan ham 2800 dona “Regapen” dori vositalari olindi.
Yuqoridagi barcha holatlarda musodara qilingan kuchli ta’sir qiluvchi dori vositalari Qirg‘izistondan O‘zbekistonga kontrabanda yo‘li bilan olib kelingan.
Hozirda holatlar yuzasidan mazkur shaxslarga nisbatan jinoyat ishlari qo‘zg‘atilib, tergov harakatlari olib borilmoqda.
