Samarqand shahrida avtobus fuqaroni urib yubordi, deya xabar bermoqda viloyat Ichki ishlar boshqarmasi matbuot xizmati. Qayd etilishicha, voqea 18-dekabr kuni soat 07:30 atrofida shaharning Narpay yo‘li ko‘chasida sodir bo‘lgan.
Avtobus haydovchisi yo‘lning belgilanmagan qismidan o‘tayotgan piyodani urib yuborgan. 35 yosh atrofidagi ayol olgan tan jarohatlari bilan voqea joyida vafot etgan.
Foto: Ijtimoiy tarmoqlar
E’tiborli jihati, avtobusning orqa qismiga “Umr tezlikdan muhimdir” deb yozilgan YHXB banneri o‘rnatilgan.
Holat yuzasidan Jinoyat kodeksining 266-moddasi (Transport vositalari harakati yoki ulardan foydalanish xavfsizligi qoidalarini buzish) 2-qismi bilan jinoyat ishi qo‘zg‘atildi. Dastlabki tergov harakatlari olib borilmoqda.
