Namanganda kuchli yog‘ingarchilik oqibatida ko‘chalarni suv bosdi
Ijtimoiy tarmoqlarda 20 dekabr kuni Namangan ko‘chalari, xususan «Lola» bozori va NamDU oldini suv bosgani aks etgan videolar tarqaldi.
Jahongir Ortiqxo‘jayev va Ruslanbek Davletov — ijtimoiy tarmoqlar bloklanishi haqida
Toshkent hokimi Jahongir Ortiqxo‘jayevning fikricha, O‘zbekistonda TikTok faoliyatini tarmoqda «keraksiz kontentni» ko‘rganlarning o‘zi cheklagan. Adliya vaziri Ruslanbek Davletov esa axborot almashinuvi erkinligi tarafdori ekanligini ma’lum qildi. «Hozirgi asrda axborotni hech qachon cheklab, siz uni ustiga o‘tirib, jilovlay olmaysiz» — dedi u.
Sherzod Shermatov O‘zbekistonda PayPal tizimi joriy etilishi yuzasidan o‘zgarishlar bo‘lishiga umid bildirdi
AKT vaziri Sherzod Shermatov «Toshkent yoshlar forumi — 2021» doirasida O‘zbekistonda PayPal elektron to‘lov tizimining faoliyat yuritmasligi masalasida berilgan savolga javob berar ekan, bu borada o‘zgarishlar bo‘lishiga umid bildirdi.
Dollarning rasmiy kursi ko‘tarildi
Dollarning so‘mga nisbatan rasmiy kursi 7,05 so‘mga ko‘tarilib, 10 828,37 so‘m etib belgilandi. Shuningdek, yevro va rubl kurslari esa pasaydi.
«Malika» savdo majmuasi hali sotilmagan — Moliya vazirligi
Moliya vazirligi «Malika» bozori 125 mlrd so‘mga sotilgani haqida xabarlarni rad etdi. Tarqatilgan ma’lumotlarda sotilgan va sotilishi rejalashtirilgan obyektlar bitta jadvalda ketib qolgani, ammo «Malika» savdo majmuasi hali sotilmagani ma’lum qilindi.
Maktablarda yangi yilni nishonlash bilan bog‘liq hech qanday cheklovlar mavjud emas — XTV
Xalq ta’limi vazirligi maktablarda yangi yil bayramini nishonlashni cheklash to‘g‘risidagi o‘zining avvalgi xabarini rad etib chiqdi. Vazirlikning yangi bayonotiga muvofiq, maktab o‘quvchilarining ota-onalaridan pul yig‘ishning oldini olish maqsadida restoran va kafelarda yangi yil bayramini o‘tkazish tavsiya etilmaydi.
21 dekabr kuni kuchli shamol va chang bo‘roni bo‘lishi kutilmoqda
21 dekabr kuni bir qator hududlarda shamol 17−22 m/s gacha, ayrim joylarda esa 25−28 m/c gacha kuchayishi mumkin. 21−22 dekabrda ba’zi joylarda yomg‘ir yog‘adi. Hafta davomida mamlakat bo‘ylab ob-havo o‘zgaruvchan bo‘ladi. Cho‘l hududlarda esa chang bo‘roni kuzatilishi mumkin.
Toshkentda qariyb 5 ming yevrolik soxta tangalar muomalaga kiritilgani aniqlandi
Poytaxtning Mirobod tumanida 4940 yevro miqdoridagi 2470 dona 2 yevrolik tanga bank orqali almashtirilgani, bank xodimlari esa ularni tekshirmasdan qabul qilib olgani aniqlandi. Qashqadaryoda esa 2 bosh qo‘y evaziga berilgan pullarning 20 donasi soxta 100 minglik kupyura ekanligi ma’lum bo‘ldi.
Jizzaxlik deputatlar viloyat hokimi murojaatnomasida savol bermasligi haqida ogohlantirilgani aytilmoqda
Jizzaxlik deputatlar viloyat hokimi Ergash Soliyevning murojaatnomasida savol bermasligi, qolaversa, telefon bilan kiritilmasligi haqida ogohlantirilgani aytilmoqda. Qonunchilik palatasi deputati Rasul Kusherbayev ushbu tashabbus kengash kotibiyati mudiri tashabbusi ekanligini ma’lum qildi. Jizzax viloyati hokimiyati munosabat bildirdi.
Toshkentda avtobus yonib ketdi
Uchtepa tumanida 125 yo‘nalishda harakatlanayotgan «Mercedes-Benz» avtobusi yonib ketdi. FVV yong‘in-qutqaruv ekipaji voqea joyiga 6 daqiqada yetib borgani va olov 4 daqiqada o‘chirilganini ma’lum qildi.
UzAuto Motors fevralgacha to‘rtta mashina bo‘yicha ariza qabul qilishni to‘xtatdi
UzAuto Motors 1 fevralgacha Nexia, Spark, Cobalt va Lacetti avtomobillariga arizalar qabul qilishni to‘xtatdi. Kompaniya bu vaqt ichida avvalgi buyurtmalar yetkazib berilishini ma’lum qilib, xaridorlardan noqulayliklar uchun uzr so‘ragan.
Angrenda ikki yuk poyezdi to‘qnashdi
Angren ko‘mir konida 2 ta elektrovoz to‘qnashishi natijasida 20 ta vagon ag‘darilib ketgan, shundan 14 tasida ko‘mir bo‘lgan. 2 kishi yengil tan jarohati oldi.
Samarqand viloyatidagi portlashda 10 kishi jabrlandi
Samarqand viloyatining Oqdaryo tumanidagi oshxonada portlash sodir bo‘ldi. Dastlabki ma’lumotlarga ko‘ra, 10 kishi jarohatlangan.
Afg‘oniston fuqarolarini majburan, kuch bilan o‘z vataniga qaytarish rejalashtirilmagan — Ismatulla Irgashev
Prezidentning Afg‘oniston bo‘yicha maxsus vakili Ismatulla Irgashev O‘zbekistondan o‘z vataniga qaytgan afg‘onistonlik qochoqlardan birortasi ham o‘ldirilgani yoki qamoqqa olinmaganini ma’lum qildi. Bundan tashqari, uning so‘zlariga ko‘ra, O‘zbekistonda yashayotgan Afg‘oniston fuqarolarini majburan qaytarish rejalashtirilmagan.
«Orginfo.uz kabi elektron platformalar yopilishi tarafdori emasmiz» — Statistika qo‘mitasi bayonoti
Davlat statistika qo‘mitasi orginfo.uz sayti bilan bog‘liq vaziyat yuzasidan bayonot berar ekan, faqatgina qo‘mita nomining manba sifatida keltirilishiga e’tiroz bildirganini ma’lum qildi. «Davlat statistika qo‘mitasi Orginfo.uz va shu kabi boshqa elektron platformalarning yopilishi tarafdori emas», — deyiladi bayonotda.
Toshkentdan Dehliga parvozlar soni ko‘paytiriladi
Uzbekistan Airways 24 dekabrdan Toshkent — Dehli — Toshkent yo‘nalishi bo‘yicha parvozlar haftasiga 2 marotaba amalga oshirilishini ma’lum qildi.
Boks. Isroil Madrimov raqibi Mishel Soroni mag‘lub etdi
Toshkentda o‘tkazilgan professional boks kechasida Isroil Madrimov fransiyalik raqibi Mishel Soroni texnik nokautga uchratdi, biroq hakamning harakatlari tufayli jang yakuni baxslarga sabab bo‘ldi. Bundan tashqari, kechada Iqboljon Xoldorov, Hasanboy Do‘smatov va Elnur Abduraimov o‘z raqiblarini nokautga uchratgan bo‘lsa, Shahram G‘iyosov, Bektemir Meliqo‘ziyev va Dilshodbek Ro‘zmetov ochkolar hisobiga g‘alabaga erishdi.
Odil Ahmedov futboldagi faoliyatini yakunladi
O‘zbekiston milliy terma jamoasida 108 ta o‘yin o‘tkazib, 21 ta gol urishga muvaffaq bo‘lgan Odil Ahmedov futboldagi faoliyatiga yakun yasadi. «Sizlarning ko‘z oldilaringizda butsilarimni mixga ilib, futbolchilik faoliyatimni tugatganimni e’lon qilaman», — dedi u.
Senator Toshkentdagi G‘afur G‘ulom bog‘i bo‘yicha shartnomalar tuzilmaganini ma’lum qildi
Senator Tolibjon Madumarov Toshkentdagi G‘afur G‘ulom bog‘i yuzasidan shartnomalar tuzilmaganini ma’lum qildi. Senator Baxtiyor Sayfullayev esa mazkur masala yuzasidan o‘rganish olib borilishini bildirdi. «Bundan keyin shahar hokimligining obyektlarni investorlarga berilishi bo‘yicha o‘ylab ish qilishini nazoratimizga olamiz», — dedi u.
Qirg‘iziston prezidenti futzal turnirida to‘purar bo‘ldi
Qirg‘iziston futbolining 100 yilligiga bag‘ishlangan futzal bo‘yicha o‘rtoqlik turnirida mamlakat prezidenti Sadir Japarov ham qatnashib, jami 9 ta gol urib, turnir to‘purari bo‘ldi. Biroq davlat rahbarining jamoasi uchinchi o‘rinni qo‘lga kiritdi.
Qo‘shimcha imkoniyatlardan foydalanish uchun saytda ro‘yxatdan o‘ting