Исроил 6 май, душанба куни тинч аҳолини Ғазо сектори жанубидаги Рафаҳ шаҳрининг бир қисмидан чиқиб кетишга чақирди, деб хабар бермоқда Reuters агентлиги. Бу 1 миллиондан ортиқ фаластинлик қочқинлар яшайдиган шаҳардаги ҲАМАС бошпаналарига узоқ кутилган ҳужумга тайёргарлик сифатида кўрилмоқда, деб ёзди агентлик.
Reuters агентлигининг гувоҳларга таяниб ёзишича, фаластинликлар шаҳардан 20 км узоқликдаги «кенгайтирилган гуманитар ҳудуд»га кўчиб ўтиш бўйича кўрсатмалар ёзилган арабча матнли хабарлар, телефон қўнғироқлари ва варақалар ола бошлаган. Баъзи оилалар аллақачон йўлга чиққан.
Times of Israel нашрининг аниқлик киритишича, эвакуация Рафаҳнинг шарқий туманларидан шу атрофдаги Хон Юнус ва Ал-Мувасс дала касалхоналари ва чодир шаҳарларига амалга оширилмоқда.
Исроил Мудофаа кучлари (ЦАХАЛ) Рафаҳда режалаштирилган операциянинг «кўлами чекланган» бўлишини билдирди, аммо ҳеч қандай муддат ҳақида маълумот бермади. Исроил ҳарбийларининг ҳисоб-китобларига кўра, эвакуация 100 мингга яқин одамга таъсир қилади, деб таъкидлайди Reuters.
Ғазо секторини назорат қилувчи Фаластиннинг ҲАМАС гуруҳи вакили ЦАХАЛнинг Рафаҳни эвакуация қилиш ҳақидаги буйруғини «хавфли эскалация» деб атади.
Исроил сўнгги бир неча ойдан бери Рафаҳга қуруқликдан ҳужум уюштириш билан таҳдид қилиб келмоқда. Исроил расмийларига кўра, шаҳарда минглаб ҲАМАС жангарилари ва ўтган йилнинг 7 октябрида Исроилга ҳужуми чоғида гуруҳ томонидан асирга олинган, эҳтимол, ўнлаб исроилликлар жон сақламоқда.
Исроил бош вазири Биньямин Нетаньяху ҳам Рафаҳда операция ўтказмай туриб, ҲАМАСни енгиш мумкин эмаслигини таъкидламоқда. ЦАХАЛ шаҳарда ҲАМАСнинг 4 та ҳарбий баталоньи борлигини, қолган 20 таси аллақачон йўқ қилинганини даъво қилмоқда.
Тинч аҳоли ўртасида кўп сонли қурбонлар келтириб чиқариши мумкин бўлган операция эҳтимоли Исроил ва ҲАМАС ўртасидаги тинчлик музокараларининг янги босқичида воситачилик қилаётган Ғарб давлатлари ва қўшни Мисрни хавотирга солмоқда.
Рафаҳга эҳтимолий ҳужум, шунингдек, Исроил ва АҚШ ўртасида ноодатий ошкорона келишмовчиликни келтириб чиқарди. Исроил мудофаа вазири Йоав Галлант АҚШ мудофаа вазири Ллойд Остин билан телефон орқали суҳбатда гаровга олинганларни озод қилиш ва вақтинчалик ўт очишни тўхтатиш бўйича «кўп сонли саъй-ҳаракатлар» натижа бермаганини ва Тель-Авивнинг Рафаҳда операция бошлашдан бошқа «иложи» қолмаганини айтди.
New York Times газетасининг ёзишича, Исроил ва ҲАМАС ўртасидаги музокараларнинг сўнгги босқичи «тўхтаб қолган» ва ҲАМАС делегацияси келишув муҳокама қилинаётган Қоҳирани тарк этган. Нашрнинг ёзишича, музокараларда асосий тўсиқ сулҳнинг амал қилиш муддати бўлган: ҲАМАС бу доимий бўлишини таъкидламоқда, Исроил бош вазири эса фақат ҳарбий ҳаракатларни вақтинчалик тўхтатишга тайёрлигини билдирган.
Якшанба куни Нетаньяху Исроил қўшинларининг Ғазодан тўлиқ олиб чиқилишига ва урушни тўхтатишга рози бўлмаслигини такрорлади. Унинг сўзларига кўра, бундай талабларнинг маъқулланиши ҲАМАСга Ғазо устидан яна назорат ўрнатиш, ҳарбий салоҳиятини тиклаш ва Исроил фуқароларига таҳдид қилиш имконини беради.
