АҚШ Федерал авиация бошқармаси (FAA) Boeing ходимлари 787 Dreamliner самолётига оид техник ҳужжатларни қалбакилаштирган бўлиши мумкинлиги маълум бўлгач, компанияга нисбатан янги текширув бошлади, деб хабар бермоқда Reuters.
Регулятор Boeing 787 Dreamliner самолётларининг қанот-фюзеляж туташувларида боғланганлик ва ерга уланганлик тўғри амалга оширилганини тасдиқлаш учун текширувларни якунлаган ёки йўқлигини аниқламоқда.
Корпорация аллақачон ушбу сериядаги барча самолётларни қайта текширмоқда ва эксплуатация паркидаги аниқланган носозликларни бартараф этиш режасини ишлаб чиқмоқда, дея қўшимча қилди FAA.
Boeing аввалроқ FAA`га унинг бир қанча ходимлари «керакли синовларни ўтказмай туриб, ишни тугаллаганини қайд этиб, компания сиёсатини бузгани» ҳақида маълум қилган эди, деб ёзди Reuters 787 Dreamliner дастури раҳбари Скотт Стокернинг ушбу самолётлар йиғиладиган Жанубий Каролинадаги ходимларига йўллаган хатига таяниб. «Бизнинг муҳандислик гуруҳимиз ушбу қоидабузарлик авиация хавфсизлигига бевосита таҳдид солмаган, деган хулосага келди», — дея қўшимча қилди у.
Апрель ойида Boeing компанияси «бир нечта асосий компонентлар» учун қисмлар етишмаётгани сабабли Boeing 787 Dreamliner самолётларини ишлаб чиқариш ва етказиб бериш секинлашиши кутилаётганини маълум қилганди, дея таъкидлади Reuters.
Март ойи охирида Boeing авиакомпанияси самолёт хавфсизлиги билан боғлиқ бир қатор можаролар фонида ўз раҳбариятида жиддий ўзгаришларни эълон қилганди. Сўнгги бахтсиз ҳодиса январь ойида бўлган: Alaska Air авиакомпаниясининг 737 MAX 9 самолётидаги эшик панели парвоз пайтида чиқиб кетганди. Текширув шуни кўрсатдики, унда тўртта мурват йўқ бўлган. Шундан сўнг FAA дарҳол 737 MAX 9 самолёти эксплуатациясини тўхтатган, аммо кейинроқ парвозларни давом эттиришга рухсат берган.
