Бир кун олдин суиқасд уюштирилган Словакия бош вазири Роберт Фицонинг аҳволи барқарор, аммо оғирлигича қолмоқда, дея хабар бермоқда Reuters сиёсатчи ётган шифохона директорига таяниб.
15 май куни кечқурун ҳукумат раҳбари операция қилинган, операция беш соат давом этган. Янгиланган маълумотларга кўра, Фицога беш марта ўқ узилган: бир ўқ ошқозонидан ўтган, иккинчиси бўғимларидан бирига теккан.
Бош вазирга суиқасд Словакия ҳукумати ташриф буюрган йиғилиш бўлиб ўтаётган Гандлова шаҳрида содир бўлган. Номаълум шахс Фицони уни кутиб турган бир гуруҳ фуқаролар билан кўришиш учун бинодан чиқаётганда отган.
Шошилинч касалхонага ётқизилганидан сўнг Фицо вертолётда Банска-Бистрица вилояти марказидаги касалхонага етказилган, чунки унинг аҳволи жуда оғир бўлиб, уни пойтахт Братиславага олиб бориш иложсиз бўлган.
Словакия ОАВлари Фицони отган шахс 71 ёшда эканини, у аввал савдо марказида қоровул бўлиб ишлагани, учта шеърий тўплам муаллифи ва Ёзувчилар уюшмаси аъзоси эканини маълум қилди. tvnoviny.sk хабарига кўра, ҳужум қилган шахс Левица шаҳрида туғилган 71 ёшли ёзувчи Журай Цинтуладир. Aktuality ахборот портали қўлга олинган шахснинг ўғлига таяниб, унинг отасида қуролга эгалик қилиш учун лицензия борлиги ҳақида хабар берди.
tvnoviny.sk маълумотларига кўра, полиция гумонланувчини қотилликка уринишда айблаган, унга 25 йилдан бошлаб умрбод муддатгача қамоқ жазоси берилиши мумкин.
Словакия ички ишлар вазири Матуш Шутай-Эштокнинг айтишича, ҳужум «сиёсий мақсадда» қилинган. Reuters агентлигининг қайд этишича, Facebook ижтимоий тармоғидаги санаси кўрсатилмаган видеода гумонланувчи шундай дейди: «Мен ҳукумат сиёсатига қўшилмайман. ОАВ тугатилмоқда, нега RTVS`га (Словакия радио ва телевидениеси) ҳужум қилинмоқда?». Агентлик видеодаги эркак отишмадан кейин қўлга олинган одамга ўхшашлигини тасдиқлади.
Фицога суиқасд сўнгги 20 йилдан ортиқ вақт ичида европалик сиёсатчига суиқасд уюштиришга қаратилган биринчи йирик уриниш бўлди, дея аниқлик киритмоқда Reuters. ЕИ, АҚШ ва бошқа давлатлар вакиллари ҳужумни қоралади.
