«Ўзбекнефтгаз» нефть-газ компанияси томонидан Бурғилаш ишларини бошқариш маркази фойдаланишга топширилди, деб хабар бермоқда «Газета.uz» мухбири.
15 май куни бўлиб ўтган ишга тушириш маросимида энергетика вазири Жўрабек Мирзамаҳмудов, «Ўзбекнефтгаз» раиси Баҳодир Сидиқов ва «Газпром нефть» бошқаруви раиси Александр Дюков иштирок этди.
«Ўзбекнефтгаз» мазкур марказ Шавкат Мирзиёев топшириғи ижроси доирасида очилганини маълум қилди.
«Ўзбекнефтгаз» маълумотларига кўра, марказлаштирилган ташкилий-рақамли бошқарувнинг яратилиши компанияга қудуқларни бурғилаш муддатини 45 фоизга қисқартириш, уларни қуриш таннархини эса 35 фоизга камайтириш имконини беради. Қайд этилишича, ҳар бир қудуқни қуришда лойиҳа қийматидан 4 миллиард сўмдан 10 миллиард сўмгача тежаш мумкин бўлади.
Очилиш маросимида Россиянинг Муравленко шаҳрида жойлашган, тезлаштирилган бурғилаш жараёнларига масофавий муҳандислик ёрдамини кўрсатувчи Қудуқ қурилишини бошқариш маркази ҳамда «Денгизкўл» конидаги 326-сонли қудуқ билан телекўприк ташкил этилди.
Россиялик мутахассислар «Денгизкўл» конидаги 326-сонли қудуқни бурғилашдаги ўз ишлари ва эришилган натижалари ҳақида гапирди.
Бурғилаш ишларини бошқариш марказининг вазифалари орасида бурғилаш жараёнларини реал вақт режимида кузатиш ҳам бор. Бурғилаш режимларининг асосий параметрлари тўғрисидаги маълумотлар ҳар бир ўрнатишда компаниянинг бош офисдаги серверига узатилади. Сўнгра дастурий таъминот маълумотларни экранда параметрлар ва диаграммалар кўринишида кўрсатади.
«Бурғилаш ишларини рақамлаштириш, замонавий технологиялар ва масофавий мониторинг тизимлари туфайли марказ мутахассислари юзага келиши мумкин бўлган авария ва бахтсиз ҳодисаларни тезкорлик билан аниқлаш ва олдини олиш имкониятига эга бўлади», — дейилади компания хабарида.
Марказ Ўзбекистоннинг чекка ҳудудларида жойлашган «Денгизкўл», «Зеварда», «Янги Тегирмон», «Шўртан», «Қуйи Шарқий Бердақ» ва «Жанубий Сурғил» конларида 23 та бурғилаш ускунасининг бурғилаш жараёнини кечаю кундуз кузатиб боради.
«Бизда бундан ҳам катта режалар бор. Шуни таъкидлашни истардимки, бу ҳамкорлик нафақат Ўзбекистон ҳудудида бўлади, бу ерда қўшниларимиз (Афғонистондан келган делегация — таҳр.) иштирок этишади, биз қўшни давлатларга бирга бориб, ушбу технологияларни жорий қиламиз, деган умиддамиз», — деди энергетика вазири.
«Ўзбекнефтгаз» раҳбари Баҳодир Сидиқовнинг маълум қилишича, кейинги босқичларда компания «Газпром нефть»нинг бошқа дастурий тизимларини жорий этиш, жумладан, Капитал таъмирлаш бошқармаси, Жароҳатларни минималлаштириш бошқармаси ва бошқаларни ташкил этишни режалаштирмоқда.
Буларнинг ҳаммаси қанчага тушди?
«Газета.uz» томонидан ўрганилган давлат харидлари портали маълумотларига кўра, 2023 йил 22 август куни «Ўзбекнефтгаз» «Газпромнефть-Ноябрьскнефтегаз» билан конлардаги бурғилаш пудратчи томонидан амалга оширилаётган қудуқларни бурғилашни оптималлаштиришга қаратилган консальтинг хизматларини кўрсатиш бўйича шартнома имзолаган.
Хизмат нархи ҳар бир қудуқ учун 22,2 миллион рублни (эълон қилинган вақтдаги курс бўйича 243,3 минг доллар / 3,07 миллиард сўм), шунингдек, қудуқни бурғилаш муддатини қисқартирган ҳар бир кун учун бонус мукофотини ташкил этади. Бу 88 кунлик (лекин баъзи ҳолларда кўпроқ бўлиши мумкин ва 50 суткадан кам бўлмайди) базавий давр ўртасидаги кунлардаги фарқ учун ставкани 600 минг рублга кўпайтириш орқали ҳисобланган (тахминан 6500 доллар).
Масалан, «Шўртан» конидаги лойиҳа доирасида бурғилаш режалаштирилган 88 кун ўрнига 58 кун давом этгани (фарқ 30 кун) маълум қилинган. Ҳисоб-китобларга кўра, бонус тўлови 18 миллион рублни ташкил қилади (ёки шартнома бўйича фарқ камида 50 кун бўлиши кераклиги ҳисобга олинса, 30 миллион рубль).
Хизмат кўрсатишни бошлашдан аввал «Ўзбекнефтгаз» шартнома бўйича «Газпромнефть-Ноябрьскнефтегаз»га лойиҳа тўғрисидаги маълумотлар ва ҳужжатларни, қатлам гувоҳномасини, юқори ангидрид томининг конструктив хариталарини, газга тўйинган қатлам қалинлиги хариталарини ва бошқаларни тақдим этиши шарт.
Иккинчи шартнома 2023 йил 21 ноябрда Бурғилаш ишларини бошқариш маркази / Қудуқ қурилишини бошқариш марказининг оператив ритмини яратиш бўйича хизматлар кўрсатиш юзасидан имзоланган. Шартнома бўйича хизматлар қиймати ҚҚСсиз 406,8 миллион рублни (4,45 миллион доллар / 56,36 миллиард сўм), шу жумладан, хизматларнинг кафолатланган ҳажми 273,47 миллион рубль (тахминан 3 миллион доллар) ва кафолатланмаган ҳажми 133, 37 миллион рублни ташкил этади.
«Газпромнефть-Ноябрьскнефтегаз» — «Газпром нефть»нинг шуъба корхонаси. Компания Россиянинг Ямало-Ненец ва Ханти-Манси автоном округларидаги 37 та конда нефть ва газ ишлаб чиқаради. 2014 йилда Европа Иттифоқи Россиянинг нефть компанияларига, жумладан, «Газпром нефть»га қарши санкциялар жорий қилган эди.
2023 йил якунига кўра, «Ўзбекнефтгаз»нинг соф фойдаси икки баравардан кўпроққа — 611,6 миллиард сўмга қисқарган, сўнгги уч йилда эса бу кўрсаткич беш бараварга камайган. «Газета.uz» аввалроқ «Ўзбекнефтгаз» газ қазиб олишни кўпайтириш учун юзлаб миллион доллар сармоя киритаётгани, бироқ унинг қазиб чиқариш ҳажми ҳар йили пасайиб бораётгани ҳақида ёзган эди.
