Arxiv
13 avgust kuni O‘zbekistonda sodir bo‘lgan eng muhim xabarlar dayjesti
Prezidentning olimpiada ishtirokchilari bilan uchrashuvi, Oqqo‘rg‘onda bolalar bog‘chasi tarbiyalanuvchilari zaharlanishi, O‘zbekistonga yuborilayotgan 276 mingdan ortiq AstraZeneca vaksinasi — “Gazeta.uz"ning 13 avgustdagi eng muhim xabarlari dayjestida.
Jahon yangiliklari dayjesti
Isroil va Marokashning o‘z elchixonalarini ochishga kelishib olishgani, Litvaning 1,5 mingga yaqin noqonuniy muhojirning boshpana so‘rovlarini rad etgani, Afg‘oniston mojarosi bo‘yicha so‘nggi xabarlar va boshqa yangiliklar — «Gazeta.uz»ning jahon yangiliklari dayjestida.
Google, Alibaba, Quadriga — mashhur boylar nima uchun g‘oyib bo‘ladi?
Yirik kompaniyalar, korporatsiyalar asoschilari va umuman katta miqdordagi pullarga egalik qiladigan shaxslar odamlarning e’tiborida bo‘lishi tabiiy hol. Shuningdek, dunyo millioner va milliarderlari orasida omma e’tiboridan chetga chiqish va butunlay yo‘qolish holatlari ham ko‘p uchrab turadi. Google, Alibaba, Africrypt va Quadriga asoschilarining g‘oyib bo‘lishi va buning taxminiy sabablari haqida.
«Parij Olimpiadasiga tayyorgarlikni shu bugundan boshlashimiz kerak» — prezident
Shavkat Mirziyoyev navbatdagi olimpiadada jamoaviy sport turlari bo‘yicha ham yo‘llanmalarni qo‘lga kiritish asosiy maqsad bo‘lishi zarurligini ta’kidladi. «Agar kimdir, bundan keyin ham oldingi Olimpiya o‘yinlarida bo‘lgani kabi, faqat yakkakurash sport turlari hisobidan yutuqlarga erishamiz, deb o‘ylasa, adashadi», — dedi prezident.
Prezident xorijdan legioner sportchi olib kelish amaliyotidan voz kechish kerakligini ta’kidladi
Prezident legioner sportchilarni olib kelish tajribasi o‘zini oqlamayotganligini ta’kidladi. «Xorijdan legionerlar emas, yetuk mutaxassislarni hamda sportchilarni tayyorlash metodikasini olib kelish kerak», — dedi u.
Dollarning rasmiy kursi ketma-ket to‘rtinchi kun ko‘tarildi
Dollarning rasmiy kursi 11,00 so‘mga ko‘tarildi va jami 10 683,00 so‘m etib belgilandi. Shuningdek, yevro va rubl kurslari ham biroz ko‘tarildi.
Oksana Chusovitinaga “O‘zbekistonda xizmat ko‘rsatgan sport ustozi” faxriy unvoni berildi
Sport gimnastikachisi Oksana Chusovitina “O‘zbekiston Respublikasida xizmat ko‘rsatgan sport ustozi” faxriy unvoni bilan taqdirlandi. Shuningdek, Chusovitinaning sport mahorati maktabini tashkil etish vazifasi qo‘yildi.
Olimpiada sovrindorlari murabbiylari va musobaqa ishtirokchilariga ham pul mukofoti beriladi
Prezident topshirig‘i bilan Olimpiya chempionlarining murabbiylari — 40 ming AQSh dollaridan, bronza medal sohiblarining murabbiylarini 20 ming AQSh dollaridan mukofotlanadi. Shuningdek, Olimpiadada ishtirok etgan har bir sportchi 5 ming AQSh dollari miqdoridagi pul mukofoti bilan rag‘batlantiriladi.
Bahodir Jalolovning sport mahorati maktabi tashkil etiladi
Prezident topshirig‘i bilan boks bo‘yicha Tokio-2020 Olimpiada o‘yinlarida oltin medal sohibi bo‘lgan Bahodir Jalolovning sport mahorat maktabi tashkil qilinadi.
Prezident «Rasmiy statistika to‘g‘risida"gi qonunni imzoladi
11 avgust kuni O‘zbekiston prezidenti tomonidan imzolangan «Rasmiy statistika to‘g‘risida"gi qonun rasmiy statistik raqamlarni tayyorlash uslublari hamda barcha uchun ochiq statistik ma’lumotlar to‘g‘risidagi qoidalarni belgilab beradi.
O‘zbekiston terma jamoasi Shvetsiya bilan o‘rtoqlik uchrashuvi o‘tkazadi
Futbol bo‘yicha O‘zbekiston milliy terma jamoasi 5 sentyabr kuni Shvetsiya termasi bilan o‘rtoqlik uchrashuvi o‘tkazadi.
Dam olish kunlari salqin ob-havo bo‘lishi kutilmoqda
Dam olish kunlari respublika hududiga salqin kirib kelishi davom etadi. Havo harorati +28…+31 daraja, kechasi va erta tongda esa harorat +13…+18 darajada bo‘ladi.
«Tolibon» Qandahor va Hirotni egalladi
«Tolibon» harakati vakillari Afg‘onistonning ikkinchi yirik shahri Qandahorni va eng yirik provinsiyalaridan biri Hirotni egalladi.
Fransiya O‘zbekistonga 276 mingdan ortiq AstraZeneca vaksinasini yubormoqda
14 avgust kuni COVAX dasturi doirasida Fransiyadan O‘zbekistonga 276 480 doza AstraZeneca vaksinasi olib kelinadi.
Bo‘stonliqda 16 gektar yerni 5 mln dollarga sotmoqchi bo‘lgan shaxslar qo‘lga olindi
Toshkent viloyati Bo‘stonliq tumanida hokim qarori bilan bog‘ yaratish uchun ijaraga berilgan 16 gektar yer maydonini 5 mln dollarga sotmoqchi bo‘lgan shaxslar qo‘lga olindi. Holat yuzasidan jinoyat ishi qo‘zg‘atilib, tergov harakatlari olib borilmoqda.
“Bek to‘pi” savdo markazi ro‘parasida avtokran hamda “VOLVO” yuk avtomobili to‘qnashdi
Toshkentdagi “Bek to‘pi” savdo markazi ro‘parasida avtokran hamda “VOLVO” yuk avtomobili ishtirokida to‘qnashuv sodir bo‘ldi. Natijada avtokran haydovchisiga birinchi tez tibbiy yordam ko‘rsatilgan. Holat yuzasidan surishtiruv olib borilmoqda.
«Jinoyat kodeksiga „Kelajakka xiyonat“ bobini qo‘shish kerak» — Alisher Qodirov
«Milliy tiklanish» partiyasi rahbari Alisher Qodirov Oqqo‘rg‘onda bolalar bog‘chasi tarbiyalanuvchilarining zaharlanishi holati yuzasidan munosabat bildirdi. Deputat Jinoyat kodeksiga bolalar bog‘chasi, maktab va oliygohlarda «vazifasiga xiyonat qilayotganlar, bolalarning xaqqi va vaqtini o‘g‘rilayotganlarga» nisbatan choralar belgilanishini taklif qildi.
12 avgust kuni O‘zbekistonda 948 kishida koronavirus aniqlandi
Kecha kun davomida O‘zbekistonda 948 kishida koronavirus infeksiya qayd etildi. 8 nafar COVID-19 bemori vafot etdi. Shuningdek, payshanba kuni 521 kishida pnevmoniya qayd etildi, 4 nafar pnevmoniya bemori vafot etdi.
Oqqo‘rg‘onda bolalar bog‘chasi tarbiyalanuvchilari zaharlandi
Toshkent viloyatining Oqqo‘rg‘on tumanidagi maktabgacha ta’lim tashkilotida 25 nafar tarbiyalanuvchilar zaharlandi. Ulardan 6 nafari og‘ir holatda jonlantirish bo‘limida, 1 nafar tarbiyalanuvchi o‘pkaning sun’iy nafas berish moslamasiga ulangan va 19 nafar tarbiyalanuvchilarning holati o‘rtacha og‘ir deb baholangan. Bolalar klinik ko‘rinishlariga ko‘ra botulizm tashxisiga gumon qilinmoqda. Holat yuzasidan jinoyat ishi qo‘zg‘atildi.
Navoiyda gaz quyish shoxobchasidagi portlashda to‘rt kishi jarohatlandi
Navoiydagi gaz quyish shoxobchasida yuk avtomobiliga o‘rnatilgan gaz balloni portladi. Natijada to‘rt kishi jarohatlandi.
Eng ko‘p o‘qilgan xabarlar | So‘nggi yangiliklar
Qo‘shimcha imkoniyatlardan foydalanish uchun saytda ro‘yxatdan o‘ting