25 yanvar kuni O‘zbekistonda sodir bo‘lgan eng muhim xabarlar dayjesti
«Gazprom» bilan imzolagan hujjatning suverenitetga tahdidi yo‘qligini aytgan Energetika vazirligi, Turkmanistondan neft sotib oladigan O‘zbekiston, cheklangan hukumat vakillari, mashina ichida o‘zini yoqqan homilador ayol, 14 foizga tushgan kambag‘allik darajasi va boshqalar — «Gazeta.uz»ning kun dayjestida.
Germaniya Ukrainaga Leopard 2 tanklarini yuboradi
Germaniya bir necha oylik munozaralardan so‘ng Ukrainaga Leopard 2 tanklarini yetkazib berishi va ukrainalik ekipajlarni o‘qitishini ma’lum qildi. Ukraina tanklar Rossiya tomonidan bosib olingan hududlarni ozod qilish uchun muhim deb atadi.
O‘zbekistonda ayrim AYOQSHlarda AI-80 markali benzinni AI-91 (92) marka deb sotish holatlari aniqlandi
Raqobatni rivojlantirish va iste’molchilar huquqlarini himoya qilish qo‘mitasi O‘zbekistonning qator hududlarida benzinni boshqa marka deb sotish va kam to‘ldirish holatlari aniqlanganini ma’lum qildi. Zarar 489 mln so‘mni tashkil etadi.
Oilaviy tadbirkorlarga kredit miqdori oshiriladi — prezident
Prezident topshirig‘i bilan 2023 yilda tadbirkorlikni kengaytirish uchun kredit miqdori 225 mln so‘mdan 300 mln so‘mgacha oshiriladi. Dehqon xo‘jaliklariga 50 mln so‘mgacha garovsiz kredit berish mumkin bo‘ladi. Qolaversa, kredit olib yaxshi natija ko‘rsatgan oilaviy tadbirkorlar yana kredit olishiga imkon beriladi.
Tojikiston va Qirg‘izistondan olib kirilgan giyohvand moddalar aniqlandi
Farg‘ona va Sirdaryo viloyatlarida giyohvandlik vositalari savdosiga chek qo‘yildi. Tojikiston va Qirg‘izistondan olib kirilgani aniqlangan ushbu giyohvandlik vositalari musodara qilinib, gumonlanuvchilarga nisbatan jinoiy ish ochildi.
“Fashistning ishini qilishyapti”. Denovda karam, sabzi va piyoz ekilgan dalalarga traktorlar “tashlandi”
Surxondaryoning yangi tayinlangan hokimi Denovda fermerlar bilan o‘tkazilgan yig‘ilishda yerlarni paxtaga tayyorlash, shudgor qilish haqida ko‘rsatma bergan. Hokimning topshirig‘i bajaralishi uchun karam, sabzi va piyoz ekilgan dalalar haydalmoqda. Fermerlar bu holatga ochiq norozilik bildirishdan qo‘rqmoqda.
O‘zbekistonlik sportchilar boks bo‘yicha chempionatda beshta oltin medalni qo‘lga kiritdi
Boks bo‘yicha Osiyo chempionatida 22 yoshgacha bo‘lgan O‘zbekiston sportchilari 10 ta medal — beshta oltin, uchta kumush va ikkita bronzani qo‘lga kiritdi. Erkaklar o‘rtasidagi final 26 yanvar kuni bo‘lib o‘tadi.
O‘zbekistonda kambag‘allik darajasi 14 foizga tushdi
2022 yil respublikada kambag‘allik darajasi 17 foizdan 14 foizga tushdi. Bunda hokim yordamchilarining 1 mln nafar aholini kasb-hunarga o‘qitib, ish bilan band qilgani muhim omil bo‘ldi, deyiladi prezident ishtirokidagi videoselektor yig‘ilishida.
«Suverenitetimizga qandaydir tahdid yo‘q» — Energetika vazirligi «Gazprom» bilan imzolagan «yo‘l xaritasi» haqida
O‘zbekiston Energetika vazirligi Rossiyaning «Gazprom» kompaniyasi bilan gaz sanoati sohasida hamkorlik bo‘yicha imzolagan «yo‘l xaritasi» bo‘yicha tushuntirish berdi. «Bunda gaz transport tizimi kimgadir berilishi yoki suverenitetimizga qandaydir tahdid umuman yo‘q», — deyiladi xabarda.
Buxoroda «Sinepar» siropidan 23 bola vafot etgani rad etildi
SSV Buxoro viloyatida «Sinepar» siropini ichgan 23 nafar bola vafot etgani haqidagi xabarlar yolg‘on ekanini ma’lum qildi. Shuningdek, fuqarolardan shifokor ko‘rsatmasisiz, o‘zboshimchalik bilan dori ichmaslik so‘raldi.
O‘zbekiston Turkmanistondan neft sotib oladi
«O‘zbekneftgaz» Turkmanistonning Petronas Çarigali kompaniyasidan neft sotib olishni rejalashtirmoqda.
Boks bo‘yicha yoshlar o‘rtasidagi Osiyo chempionatida O‘zbekiston yetakchilik qilmoqda
O‘zbekiston terma jamoasining 18 nafar bokschisi Tailandda o‘tkazilayotgan yoshlar o‘rtasidagi Osiyo chempionati finaliga yo‘l oldi. 22 yoshgacha bo‘lgan 10 nafar yigit va 8 nafar qiz oltin medallar uchun 20 davlatdan kelgan raqiblar bilan kuch sinashadi.
WizzAir Toshkentga parvozlarni yo‘lga qo‘ydi. Chipta narxi 45 dollardan boshlanadi
WizzAir aviakompaniyasi O‘zbekistonga yangi — Abu-Dabi-Toshkent-Abu Dabi parvoz yo‘nalishini ochdi. Bu yo‘nalishdagi chiptalar narxi bir tomonga 45 dollardan boshlanadi.
Surxondaryoning 6 ta tumaniga yangi hokimlar tayinlandi
Angor tumaniga Qosim Mardonov, Termiz tumaniga Shuxrat Nazarov, Jarqo‘rg‘on tumaniga Elmurod Avazov, Muzrabot tumaniga Abdurashid Ismailov, Sho‘rchi tumaniga Ulug‘bek Zokirov va Sariosiyo tumaniga Abduqodir Donayev hokim etib tayinlandi.
O‘zbekistonda vazirlik va idoralar xodimlarining cheklangan soni 56 573 nafar etib belgilandi
Prezident farmoni bilan vazirlik va idoralarda xodimlarning umumiy soni 56 573 nafar etib cheklandi. Hukumatga bo‘ysunadigan mustaqil vazirlik va idoralar soni esa jami 26 ta etib belgilandi.
Birinchi Islom san’ati biyennalesida O‘zbekistonning tarixiy merosi namoyish etildi
Jidda shahridagi Islom san’ati biyennalesida ilk bor XVIII asrga oid «Katta Langar Qur’oni»ning to‘rt sahifasi, XVII asr hadislari to‘plami, Samarqand va Afrosiyobning X-XII asrlarga oid kulolchilik buyumlari va boshqa muzey eksponatlari taqdim etildi.
Surxondaryodagi o‘rmon xo‘jaligidan yolg‘iz ayiq bolasi topildi
Sariosiyo tumanidagi «Uzun» davlat o‘rmon xo‘jaligi hududida onasidan ajralib qolgan qo‘ng‘ir ayiq bolasi topildi. Qish mavsumida ozuqa topishi qiyinchiligi va nobud bo‘lishi ehtimoli borligi sababli jonivor xo‘jalik binosida vaqtinchalik saqlanib turibdi.
Banklar dollar kursi yana tushdi
Tijorat banklari 25 yanvar kuni aholidan 1 AQSh dollarini 11 245 — 11 305 so‘mdan sotib olmoqda, sotish kursi esa aksariyat banklarda 11 325 so‘m.
SSV Toshkent viloyatida kaltaklangan feldsherning ahvoli bo‘yicha ma’lumot berdi
Toshkent tumanida bemorning o‘g‘li chaqiruvga ayol emas, erkak feldsher kelgani uchun xodimni kaltaklagandi. SSV xodimning bosh miya yopiq jarohati va boshqa tashxislar bilan neyroxirurgiya bo‘limiga yotqizilgani, uning muolaja olayotganini ma’lum qildi.
Farg‘onada homilador ayol mashina ichida o‘zini yoqib yubordi
Farg‘ona shahrida erini rashk qilgan homilador ayol mashina ichida o‘ziga benzin sepib, yoqib yubordi. Ayol hodisa joyida, chaqalog‘i esa shifoxonada vafot etgan. Holat yuzasidan jinoyat ishi qo‘zg‘atildi.
Qo‘shimcha imkoniyatlarga ega bulish uchun saytda ro‘yxatdan o‘ting