22 sentabr kuni O‘zbekistonda sodir bo‘lgan eng muhim xabarlar dayjesti
Toshkent viloyati hokimi lavozimiga tasdiqlangan Zoyir Mirzayev, uning prezidentga kiritgan takliflari, ishdan olingan 4 nafar tuman bosh imomi, O‘zbekistonning Rossiyadagi elchixonasi fuqarolarni da’vatlarga berilmaslikka chaqirgani, Jizzaxdagi YTH va boshqalar — «Gazeta.uz»da kun dayjesti.
Eronda talaba qiz o‘limidan so‘ng yuz bergan tartibsizliklarda insonlar halok bo‘ldi
Eronda hijob tufayli politsiya tomonidan hibsga olingan qizning o‘limi sabab tartibsizliklar bo‘ldi. Unda kamida 8 kishi, jumladan, 2 huquq-tartibot xodimi halok bo‘ldi. Ayrim hududlarda ijtimoiy tarmoqlar va internetdan foydalanish cheklangan. Ayollar norozilik sifatida hijoblarini yoqib, sochlarini kesmoqda.
RF yaqin 10 yilda mamlakat fuqaroligini olgan MOliklar uchun majburiy harbiy xizmat joriy etishi mumkin
Rossiya yaqinda mamlakat fuqaroligini olgan Markaziy Osiyodan bo‘lganlar uchun majburiy harbiy xizmatni qonuniylashtirmoqchi. «[Bu] tashabbus ushbu mamlakatlar rasmiylarining o‘z fuqarolarining maxsus operatsiyada ishtirok etishini taqiqlaganiga adekvat javob bo‘ladi», deyiladi xabarda.
Shavkat Mirziyoyev Serdar Berdimuhamedovni tug‘ilgan kuni bilan tabrikladi
Shavkat Mirziyoyev 22 sentabr kuni Serdar Berdimuhamedov bilan telefon orqali muloqot qildi. O‘zbekiston prezidenti Turkmaniston prezidentini tavallud kuni bilan qutlab, unga mustahkam sog‘lik, baxt-saodat va katta muvaffaqiyatlar, turkman xalqiga esa farovonlik tiladi.
Samarqandda ShHT ishtirokchilarining ekspress-testi ROSSA PZR-to‘plamlari yordamida amalga oshirildi
15−16 sentabr kunlari sammit o‘tkaziladigan joyda COVID-19 kasalligini aniqlash uchun tashkilotchi va ishtirokchilarning testi amalga oshirildi.
Dollarning rasmiy kursi yana ko‘tarildi
AQSh dollarining so‘mga nisbatan rasmiy kursi 30,32 so‘mga qimmatlab, 11 010,33 so‘m etib belgilandi. Shuningdek, yevro kursi pasaydi, rubl esa ko‘tarildi.
Zoyir Mirzayev prezident bilan uchrashuvda qanday takliflarni ilgari surdi?
22 sentabr kuni Nurafshon shahrida xalq deputatlari Toshkent viloyati Kengashi sessiyasi bo‘lib o‘tdi. Unda Shavkat Mirziyoyev ishtirok etib, tadbirkorlik, sanoat, agrar soha rivoji, turizm va ijtimoiy himoya masalalari bo‘yicha Zoyir Mirzayev taqdim etgan loyihalar bilan tanishdi va tegishli ko‘rsatmalar berdi.
PMTI iqlim o‘zgarishi sharoitida «yashil» elektr energiyasini ishlab chiqarishga ta’sir etuvchi omillarni o‘rgandi
Prognozlashtirish va makroiqtisodiy tadqiqotlar instituti o‘rganish natijalari shuni ko‘rsatdiki, iqtisodiy tarmoqlar uchun zarur elektr energiya resursini rejalashtirish bevosita suv oqimi hajmini prognozlashtirish imkoniyatlari va salohiyatiga bog‘liq.
Toshkent viloyatida turizm bo‘yicha favqulodda holat e’lon qilinadi
Prezident dam olish kunlari Bo‘stonliq yo‘lida tirbandliklar bo‘lishini tanqid qildi. «Nega Parkentda ham shunaqa tizim qilmaymiz? Parkent shashligi va somsasini ko‘pchilik yaxshi ko‘radi-ku», — dedi u. Viloyatda favqulodda holat e’lon qilinadi, Parkent, Angren va Ohangaronda turizm klasterlari tashkil etiladi.
Zoyir Mirzayev Toshkent viloyati hokimi lavozimiga tasdiqlandi
Shavkat Mirziyoyev ishtirokida xalq deputatlari Toshkent viloyati kengashi sessiyasi o‘tkazildi. Unda 2021 yil noyabr oyidan buyon Toshkent viloyati hokimi vazifasini bajarib kelayotgan Zoyir Mirzayev nomzodi viloyat hokimi lavozimiga tasdiqlandi.
Toshkent viloyatidagi har bir fuqaroga imtiyozli ipotekaga xonadon olish imkoniyati beriladi
Prezident kelgusi yildan Toshkent viloyatida «Mening birinchi uyim» ipoteka dasturi ishga tushirilishini ma’lum qildi. Viloyatda yashovchi har bir fuqaro yangi xonadondan bir marta imtiyozli ipoteka krediti asosida olish imkoniyatiga ega bo‘lishi kerak, dedi u viloyat kengashi sessiyasida.
«Toshkent viloyatidagi chegaralarimizda minalar turardi. Ularni shaxsan o‘zim nazorat qilib oldirdim» — prezident
Shavkat Mirziyoyev Nurafshonda xalq vakillari bilan suhbatda Qirg‘iziston bilan chegara borasidagi kelishuvlarga to‘xtalib o‘tdi va ilgari chegara hududlarda minalar bo‘lganini aytdi. «Odamlar qarindoshlarining na to‘yiga bora olardi, na azasiga. Shaxsan o‘zim nazorat qilib minalarni oldirdim», — dedi prezident
Tijorat banklari 22-sentabr uchun yangilagan dollar kurslari e’lon qilindi
Markaziy bank 22-sentabr kungi o‘zbek so‘mining AQSh dollariga nisbatan rasmiy kursini 10 980,01 so‘m etib belgiladi. O‘zgarishdan so‘ng tijorat banklari ham o‘z takliflarini yangiladi.
Jizzaxda o‘rmon noziri daraxt kesganlarga jarima qo‘llamaslik evaziga pora olgani aytilmoqda
Jizzax viloyatida o‘rmon noziri 14 dona terak va qayrag‘och daraxtlari noqonuniy kesilgani holati yuzasidan jarima qo‘llamaslik evaziga 3 mln so‘m pora talab qilganlikda gumonlanyapti. Unga nisbatan jinoyat ishi ochildi.
Qarzdorlikni o‘chirib berishni va’da qilgan «elektroset» xodimlari ushlandi
Toshkent, Samarqand va Jizzaxda elektr energiyasi uchun ko‘p miqdorli qarzdorlikni o‘chirib berishni va’da qilgan hududiy elektr ta’minoti korxonalari xodimlari qo‘lga olindi. Ularga nisbatan jinoiy ish ochilgan.
Imomlik maqomiga munosib bo‘lmagan 4 nafar tuman bosh imomi ishdan olindi
O‘zbekiston musulmonlari idorasi raisi, muftiy Nuriddin Xoliqnazarov o‘z vazifasiga vijdonan yondoshmagan va imomlik maqomiga munosib bo‘lmagan 4 nafar tuman bosh imomi ishdan oldi. Shuningdek, 1 nafariga «hayfsan» intizomiy jazosi berildi.
O‘zbekistonning Rossiyadagi elchixonasi fuqarolarni da’vatlarga berilmaslikka chaqirdi
O‘zbekistonning Moskvadagi elchixonasi vatandoshlarga O‘zbekiston fuqarosi bo‘lgan shaxslar boshqa davlat fuqarosi sifatida e’tirof etilmasligini eslatdi. Ularning xorijiy davlatlar hududidagi harbiy harakatlarda ishtirok etishi jinoiy javobgarlikka sabab bo‘ladi.
Toshkentda 63 ta jarimasi bor haydovchidan 50 mln so‘m undirildi
Toshkent shahrining Olmazor tumanida yo‘l harakati qoidalariga amal qilmagani uchun fuqaroga 63 ta ma’muriy jarima rasmiylashtirilgan. MIB uning Cobalt mashinasini xatlab olgach, fuqaro 50 mln so‘mni to‘lashga majbur bo‘ldi.
Jizzaxda Cobalt tirkamaga urildi, bir kishi vafot etdi
Jizzax viloyatida salonida 5 nafar shaxs bo‘lgan Cobalt traktor tirkamasiga urildi. Haydovchi va uch nafar yo‘lovchi jarohat olgan, bir nafar yo‘lovchi vafot etgan.
Qo‘qondagi ishlab chiqarish korxonasida yong‘in sodir bo‘ldi
Qo‘qon shahridagi ishlab chiqarish korxonasida yong‘in chiqdi. Uni bartaraf etish uchun 13 ta yong‘in-qutqaruv ekipaji jalb qilindi. Jarohat olgan va halok bo‘lganlar yo‘q, taxminan 300 kv.m maydonning tom qismi zararlangan.
Qo‘shimcha imkoniyatlarga ega bulish uchun saytda ro‘yxatdan o‘ting