Juma kunidan havo sovib, yomg‘ir va qor yog‘ishi kutilmoqda
Juma kunidan boshlab O‘zbekistonda havo harorat pasaya boshlaydi. Joylarda yomg‘ir yog‘adi, ayrim hududlarda u qorga aylanishi mumkin. Kechalari harorat −8…+2, kunduz kunlari −2…+8 daraja bo‘lishi kutilmoqda.
Rossiya O‘zbekistonga gaz yetkazib berishni ko‘paytirmoqchi
Rossiya prezidenti Vladimir Putin Ostona muzokaralari yakunida Qozog‘iston hududi orqali O‘zbekistonga gaz yetkazib berish hajmini ko‘paytirish rejalarini ma’lum qildi.
Markaziy bank bir foydalanuvchiga beriladigan kartalar sonini cheklashni rejalashtirmoqda
O‘zbekiston Markaziy banki bir foydalanuvchiga beriladigan kartalar sonini cheklamoqchi. Regulyator raisi o‘rinbosari Behzod Hamrayevning ta’kidlashicha, ayrim mijozlar yuzlab kartalarga ega bo‘lib, bu firibgarlar tomonidan kartalardagi mablag‘ o‘zlashtirilishiga olib kelmoqda.
Turkiyalik 7 nafar mutaxassis O‘zbekiston tibbiyotini transformatsiya qilishga yordam beradi
SSV O‘zbekiston sog‘liqni saqlash tizimini tibbiy sug‘urta, farmatsevtika va tez tibbiy yordam kabi yettita asosiy yo‘nalishda o‘zgartirishga yordam berishi kerak bo‘lgan yetti nafar turkiyalik mutaxassisni jalb qildi. Hozir ular barcha darajadagi tibbiyot muassasalarini o‘rganmoqda va hududlarga safar uyushtirmoqda.
Haydovchi tartibga solinmagan o‘tish joyida piyodani urib yuborgani uchun 5 yilga manzil-koloniyaga hukm qilindi
May oyida Spark Toshkentning Yusuf Xos Hojib ko‘chasidagi tartibsiz o‘tish joyida ayolni urib yuborgandi. Jabrlanuvchi shifoxonada vafot etgan. Sud haydovchini 5 yilga ozodlikdan mahrum qildi. Jazo manzil-koloniyada o‘taladi. Ushbu ko‘chadagi piyodalar o‘tish joylari hamon xavfsizlik talablariga javob bermaydi.
O‘zbekistonda qariyb 11 oyda 75 kishi is gazidan zaharlanib vafot etdi
O‘zbekistonda yil boshidan buyon 75 kishi is gazidan zaharlanib vafot etdi. Holatlarning aksariyati Farg‘ona, Xorazm va Jizzax viloyatlariga to‘g‘ri keladi. “Hududgazta’minot” kompaniyasi gaz to‘planganda avtomatik to‘xtatadigan yoki ovozli xabar beradigan uskunalarni o‘rnatishni tavsiya etmoqda.
“Nega propan narxi keskin oshishiga qarshi tezkor choralar ko‘rilmadi?” — “Adolat” deputati davlat organlariga so‘rovlar yubordi
“Adolat” partiyasi deputati Muhammad Valiyev so‘nggi oylarda propan narxi keskin oshgani sababli mas’ul idoralarga so‘rovlar yo‘lladi. So‘rovlarda narxlar oshishining sabablari, ularni barqarorlashtirish va narx shakllanishining shaffofligini ta’minlash chora-tadbirlari to‘g‘risidagi savollar ko‘tarilgan.
Samarqandda tramvayning 3-yo‘nalishi ochilishi rejalashtirilmoqda
Samarqand shahrida tramvayning 3-yo‘nalishi ochilishi mumkin. Hozirda bu uchun Yevropa tiklanish va taraqqiyot banki bilan hamkorlik qilinmoqda.
Dekabrdan Rossiyaga kirishda xorijliklar biometriyadan o‘tadi
1-dekabrdan boshlab Rossiyada eksperiment tarzida xorijlik va fuqaroligi bo‘lmagan shaxslar mamlakatga kirishda biometrik ma’lumotlarini taqdim eta boshlaydi. Birinchi bosqichda yig‘ish Moskva va Moskva viloyati aeroportlarida, shuningdek, Orenburg viloyatidagi “Mashtakovo” nazorat punktida amalga oshiriladi.
Investitsiyalarning nafaqat hajmini, balki sifatini ham oshirish zarur — prezident
Prezident huzurida xorijiy investitsiya jalb qilish sohasidagi natijalar tanqidiy tahlil qilindi. Davlat rahbari yondashuvlarni tubdan o‘zgartirish, investitsiyalarning nafaqat hajmini, balki sifatini ham oshirish zarurligini aytdi. Har bir dollar sanoatni rivojlantirishi, yangi ish o‘rni yaratishi kerak, dedi u.
Samarqandda korxonaning 6,4 mlrd so‘mini qimorda yutqazgan hisobchi ushlandi
Samarqanddagi korxonalardan birining hisobchisi 6,4 mlrd so‘mni o‘zlashtirib, keyinchalik mablag‘ni internetdagi qimor o‘yinlarida yutqazib qo‘ydi. U soxta ma’lumotlar orqali pullarni o‘z nomiga ochilgan plastik kartalariga o‘tkazib olgan.
Saidaziz Saidaliyevga (“Saidaziz medgorodok”) nisbatan hukm o‘zgarishsiz qoldirildi
Toshkent shahri sudi apellyatsiya instansiyasi yozda 20 yilga ozodlikdan mahrum etilgan Saidaziz Saidaliyevga (“Saidaziz medgorodok”) nisbatan chiqarilgan hukmni o‘z kuchida qoldirdi. Tovlamachilik ishi bo‘yicha sudlangan yana 13 nafar shaxsning shikoyati ham rad etildi.
Qurilish maydonidagi daraxtlarni payhon qilish va shikastlash uchun ma’muriy javobgarlik belgilandi
Bino qurilishi va rekonstruksiyasida daraxtlarga kimyoviy moddalar orqali shikast yetkazish, payhon qilish yoki yo‘q qilish uchun ma’muriy javobgarlik belgilandi. Tok va portlovchilardan foydalanib ovchilik va baliqchilik, shuningdek, ekologiya inspektorlari ishiga to‘sqinlik qilganlik uchun jarimalar kuchaytirildi.
Rossiyaning Dnepr bo‘ylab uchirgan ballistik raketasida portlovchi moddalar bo‘lmagan — Reuters
O‘tgan hafta Rossiya tomonidan Ukrainaning Dnepr daryosi bo‘ylab uchirilgan “Oreshnik” o‘rta masofali ballistik raketasida portlovchi moddalar bo‘lmagan va “sezilarsiz” zarar yetkazgan, deb xabar berdi Reuters.
Rossiyadan Toshkent atrofidagi qatnovlar uchun elektropoyezd keltirildi
O‘zbekistonga Toshkent atrofidagi qatnovlar uchun Rossiyada ishlab chiqarilgan EP3D elektropoyezdi keltirildi, deya xabar qildi “O‘zbekiston temir yo‘llari” rahbari Zufar Narzullayev. Prezident yangi yil arafasida Buxoro va Xiva o‘rtasidagi elektrlashtirilgan liniyani ham ishga tushirishi kutilmoqda.
Jamg‘arib boriladigan majburiy pensiya badallarini hisoblashning yangi tartibi tasdiqlandi
Ish beruvchilar tomonidan fuqarolarning shaxsiy jamg‘arib boriladigan pensiya hisobvaraqlariga majburiy jamg‘arib boriladigan pensiya badallarini hisoblash va to‘lash tartibi to‘g‘risidagi nizom tasdiqlandi.
“Yo‘ldosh” mavzesi hududida dendropark tashkil etish rejalashtirilmoqda — Toshkent shahar hokimligi
“Yo‘ldosh” mavzesi hududidagi yog‘och uylar buzilishi rejalashtirilgandi. Poytaxt hokimligi huzuridagi Toshkent Invest kompaniyasi mavzeda zamonaviy daraxtzor barpo etish rejalashtirilganini ma’lum qildi. Yog‘och uylarda yashayotgan aholi “Yo‘ldosh” mavzesidan 1,5 km uzoqlikdagi “Gulshonobod” mahallasiga ko‘chiriladi.
Mahallalardagi faol nuroniylar har oy rag‘batlantiriladi
Endilikda har oy mahallalardagi faol uch nafar nuroniyga 577,5 ming so‘m pul beriladi. Buning uchun ular oilalarni kambag‘allikdan chiqarishi, farzandlarini ta’lim olishga ko‘maklashishi va piyoda yurishni targ‘ib qilishi kerak. Keksalarni sportga jalb qilish uchun mahallalarga yiliga 10 mln so‘m ajratiladi.
Isroil va “Hizbulloh” Livanda o‘t ochishni to‘xtatishga kelishib oldi
Isroil va “Hizbulloh” Livan-Isroil chegarasidagi harbiy harakatlarni to‘xtatishga kelishib oldi. Endi Isroil 60 kun ichida Livandan o‘z qo‘shinlarini olib chiqishi kerak bo‘ladi. Netanyahu agar “Hizbulloh” kelishuvning biror qismini buzsa, Isroil zarba berishda ikkilanmasligini aytdi.
O‘zbekistonda bukmekerlik xizmatlarini targ‘ib qilgan 30 ga yaqin sayt bloklandi
Raqobat qo‘mitasi bukmekerlik xizmatlarni targ‘ib qiluvchi 42 ta veb-saytni bloklash bo‘yicha AOKAga takliflar kiritdi. Shundan 30 ga yaqin saytlar belgilangan tartibda bloklandi.
Qo‘shimcha imkoniyatlardan foydalanish uchun saytda ro‘yxatdan o‘ting