Jamiyat
23 noyabr kuni O‘zbekistonda sodir bo‘lgan eng muhim xabarlar dayjesti
Prezident “Yangi O‘zbekiston ma’muriy islohotlari dasturi"ni ishlab chiqish bo‘yicha topshiriq berishi, “Gender zo‘ravonlikka qarshi 16 kunlik faol harakatlar” kampaniyasi e’lon qilinishi, prezident poytaxt mahallalarini aylanishi — “Gazeta.uz"ning 23 noyabrdagi eng muhim xabarlari dayjestida.
95 yoshli otaxon bilan suhbat, maktabga tashrif, keksalar bilan ko‘chat o‘tqazish, yosh bola bilan tanishuv — prezident poytaxt mahallalarini aylandi
O‘zbekiston prezidenti Shavkat Mirziyoyev Shayxontohur tumani Sarhumdon va Gulobod mahallalarini aylandi. Bunda davlat rahbari ko‘p qavatli uyda yashaydigan fuqarolar bilan suhbatda bo‘ldi, maktabga tashrif buyurib o‘quvchi va maktab xodimlari bilan gaplashdi, keksalar bilan birga ko‘chat o‘tqazdi, aylanishga chiqqan bolakay bilan tanishdi (video).
Odam savdosi bilan shug‘ullanadiganlar ro‘yxati yuritiladi
Hukumat qarori bilan odam savdosi sohasidagi jinoyatlar to‘g‘risidagi ma’lumotlarning yagona axborot bazasi yuritiladi. Unga odam savdosi bilan shug‘ullanuvchi shaxslar, jabrlanganlar, jabrlangan deb taxmin qilinayotganlar kiritiladi. Ayollar va bolalar haqidagi axborot alohida ajratilgan holda, ularga ko‘rsatilgan yordam natijalari bilan ko‘rsatiladi.
Toshkent viloyatida ikki tadbirkor 100 ming xonadonning bir kunlik iste’moliga teng tabiiy gazdan noqonuniy foydalangan
Chirchiqdagi SHIRINA PETROL va Toshkent tumanidagi CLEAN GAS SERVICE MCHJlariga qarashli avtomobillarga gaz to‘ldirish shoxobchalari 1,635 mln kub metr gazdan noqonuniy foydalanib kelgani aniqlandi. Ushbu miqdordagi gaz 100 mingta xonadonning bir kunlik iste’moliga teng ekani aytildi.
Toshkentda «Aviatsiya sohilbo‘yi» paydo bo‘ladi
Uzbekistan Airports kompaniyasi Yangixayot tumanida «Aviatsiya sohilbo‘yi» deb nomlangan yashil hudud yaratishni boshladi. Kompaniya rahbariyati ko‘chat ekish haqidagi topshirig‘ini hisobot berish uchun emas, odamlarga sayilgoh qilish uchun bajarishga qaror qilganini ma’lum qildi.
O‘zbekistonda yil yakuniga qadar 560 ming gektar maydonda «yashil qoplamalar» tashkil etiladi — Aziz Abduhakimov
Bosh vazir o‘rinbosari Aziz Abduhakimov mamlakatda 2021 yil oxiriga qadar 560 ming gektar maydonda «yashil qoplamalar» tashkil etilishini ma’lum qildi. Shundan 375 ming gektarida o‘rmonzor barpo etiladi.
O‘zbekistonda Xalqaro qishloq xo‘jaligi universiteti ochilishi rejalashtirilmoqda
Angliyaning Qirollik qishloq xo‘jaligi universitetida (Royal Agricultural University) O‘zbekistonda Xalqaro qishloq xo‘jaligi universitetini tashkil etish bo‘yicha muzokaralar o‘tkazildi.
Andijonda tuman elektr tarmoqlari buxgalteri bloger ayolni kaltaklagani aytilmoqda (to‘ldirildi)
Andijonlik bloger Fatima Jo‘rayeva Ulug‘nor tumani elektr tarmoqlari buxgalteri tomonidan kaltaklanganini ta’kidlamoqda. Bunga fermerlarga sun’iy ravishda qarzdorlik yozilgani bo‘yicha izoh so‘ragani sabab bo‘lgani aytilmoqda. Mazkur holat bo‘yicha tuman IIB tomonidan tergovga qadar tekshiruv harakatlari boshlandi. Tekshiruv harakatlari Bosh prokuratura tomonidan nazoratga olindi. Andijon tuman elektr tarmoqlari korxonasi esa ayolning kaltaklanganini rad etib, voqea joyidan olingan yozuvni taqdim etdi.
«Gender zo‘ravonlikka qarshi 16 kunlik faol harakatlar» kampaniyasi e’lon qilindi
25 noyabrdan O‘zbekistonda «Gender zo‘ravonlikka qarshi 16 kunlik faol harakatlar» kampaniyasi boshlanadi. Kampaniya boshlanishini e’lon qilgan Senat raisi Tanzila Narbayeva zo‘ravonlikka qarshi kurashda «uzoq va mashaqqatli ishlar» turganini va unda «har birimizning ishtirokimiz muhim» ekanligini ta’kidladi.
Toshkentning ikki tumanida kuchli ta’sir qiluvchi dorilarning noqonuniy savdosi aniqlandi
Poytaxtning Mirzo Ulug‘bek va Bektemir tumanlaridagi dorixonalarda tegishli hujjatlari bo‘lmagan kuchli ta’sir qiluvchi “Regapen” va “Zardeks” dorilarining noqonuniy savdosi to‘xtatildi.
Toshkent metropolitenida FacePay tizimi sinovdan o‘tkazilmoqda
Toshkent metropolitenining “Buyuk Ipak yo‘li” bekatida FacePay tizimi sinovdan o‘tkazilmoqda. Uning yordamida yo‘lovchi shunchaki validatorga qarab yo‘l haqi uchun to‘lov qilishi mumkin.
Toshkentda Prezident kutubxonasi quriladi
Poytaxtning Adiblar xiyoboni yonida Alisher Navoiy nomidagi adabiyot muzeyi quriladi. Muzey bilan birga ilmiy tadqiqot markazi, O‘zbek tili, adabiyoti va folklori instituti, maktab va yotoqxona ham tashkil etiladi. Milliy bog‘ yaqinida Prezident kutubxonasi qurilishi ham rejalashtirilmoqda. U 4 qavatli bo‘lishi, bir vaqtda 1 ming 400 dan ziyod o‘quvchiga xizmat ko‘rsatishi ko‘zda tutilgan.
O‘zbekistonda tabiiy ofatlardan har yili 1,4 million kishi aziyat chekadi
O‘zbekistonda har yili tabiiy ofatlar o‘rtacha 1,4 million kishilar hayotiga ta’sir o‘tkazadi. Natijada yetkazilgan zarar yiliga qariyb 3 mlrd dollarni tashkil etadi. Prognozlarga ko‘ra, yirik suv toshqini mamlakat YAIMning taxminan 5 foiziga zarar yetkazishi mumkin.
SSV muassasalarini loyihalashtirishga turkiyalik mutaxassis rahbarlik qiladi
Sog‘liqni saqlash vazirligining «O‘ztibloyiha» loyiha tashkilotiga turkiyalik mutaxassis Guray Kaymak rahbarlik qiladi. U poytaxtdagi sobiq Intercontinental mehmonxonasi binosi va O‘zbekistondagi boshqa obyektlarni loyihalashtirishda ishtirok etgan.
Hukumat poytaxt bosh rejasini 2023 yilgacha ishlab chiqish bo‘yicha topshiriq berdi
Hukumat Toshkent hokimligiga 2022 yil oxirigacha shahar bosh rejasini ishlab chiqish yuzasidan topshiriq berdi. Poytaxt bosh rejasini ishlab chiqishni yakunlash muddati bugungi kungacha bir necha bor ortga surilgan.
«Daraxt ekish oson narsa, lekin daraxtni chopmaslik biz uchun qiyin ekan» — Botir Qobilov 200 mln tup daraxt ekilishi haqida
Iqtisodchi Botir Qobilov yiliga 200 mln tup daraxt ekilishi tashabbusi haqida fikr bildirib, mazkur vazifaning ijrosiga ozgina shubhasi borligini ta’kidladi. «Eng muhimi, ekilgan daraxtning „mevasi“ 15−20 yil ichida kelmaydi. Balki 200 mln tup emas, 10 mln tupning o‘zi yetarlidir», — dedi u.
22 noyabr kuni O‘zbekistonda sodir bo‘lgan eng muhim xabarlar dayjesti
Koronavirusga qarshi qo‘shimcha doza bilan emlashga ruxsat berilishi, Zoyir Mirzayev videoselektor tarzida ilk “hokimlik soati"ni o‘tkazishi, Shavkat Mirziyoyev energetika sohasida DXSH loyihalarini ko‘paytirish bo‘yicha yig‘ilish o‘tkazishi — “Gazeta.uz"ning 22 noyabrdagi eng muhim xabarlari dayjestida.
2026 yilga qadar quyosh va shamol elektr stansiyalari umumiy quvvatini 8 ming mVtga yetkazish zarur — prezident
Shavkat Mirziyoyevning topshirig‘iga ko‘ra, O‘zbekistonda 2026 yilga qadar quyosh va shamol elektr stansiyalari umumiy quvvati 8 ming megavattga yetkaziladi. Shuningdek, “yirik sanoat korxonalari ham o‘z energiya ta’minoti bo‘yicha qayta tiklanuvchi energiya manbalarini tashkil etishi uchun zarur sharoitlar yaratish kerak”.
“Hokim buva, svetni yoqing, biz sovqotyapmiz”. Uyida chiroq o‘chgan qashqadaryolik bola mas’ullarga murojaat yo‘lladi
Yakkabog‘ tumanida yashovchi 5 yoshli bola uyida chiroq soatlab o‘chayotgani bois mas’ullarga murojaat yo‘lladi. Qashqadaryo “Hududiy elektr tarmoqlari” AJ bir qator hududlarda “ta'mirlash ishlari olib borilishi sabab elektr ta’minotida uzilish bo‘lishini” ma’lum qilmoqda.
O‘zbekistonda pensiya va nafaqa oluvchilar soni 4 mlndan oshdi
O‘zbekistonda pensiya va nafaqa oluvchilar soni 4 mln nafardan ko‘proqni tashkil etmoqda. Shundan qariyb 3 mln nafari yoshga doir pensiya oluvchilar hisobiga to‘g‘ri keladi.
Eng ko‘p o‘qilgan xabarlar | So‘nggi yangiliklar
Qo‘shimcha imkoniyatlarga ega bulish uchun saytda ro‘yxatdan o‘ting