Paynet тўлов хизматини бошқарувчи Uzpaynet компанияси таъсисчисини ўзгартирди, бунга Bankers.uz нашри эътибор қаратди.
Корхоналар ва ташкилотларнинг ягона давлат регистрига (КТЯДР) кўра, Давлат активларини бошқариш агентлиги (Давактив) балансидаги 100 фоиз улуш New Industrial Technologies`га ўтказилган. Компания эгаси ўзгариши ҳақида ноябрь ойида маълумотлар пайдо бўлганига қарамай, Давактив улуш сотилгани бўйича расман хабар бермаган. «Газета.uz» масала юзасидан агентликка сўров юборди.
New Industrial Technologies МЧЖ 2019 йил апрель ойида давлат рўйхатидан ўтган бўлиб, 273,56 млрд сўм устав капиталига эга. Компаниянинг 60 фоиз улуши чет эл фуқароси ҳисобланган Алекс Лига тегишли (июнь ойида у ягона таъсисчи бўлган). 40 фоиз улуш Мустафа Абдураҳмоновга тегишли бўлиб, у айни вақтда Asia Alliance Bank`нинг мажоритар акциядори саналган Asia Alliance Group`нинг ҳам 77,6 фоиз улушига эгалик қилади.
Spot маълумотларига кўра, Paynet хизмати 2005 йилда Ботир Арифжонов томонидан яратилган. Кейинчалик тадбиркор корхонани давлат вакили сифатидаги Халқ банкига сотиб, унинг бошқарувини тарк этган.
Платформа орқали 390 дан ортиқ хизмат кўрсатувчиларга, жумладан, уй-жой коммунал хизматлари, интернет ва мобил алоқа хизматлари учун тўловлар қабул қилинади. 2022 йил ҳолатига кўра Paynet`дан кунига 1,3 миллиондан ортиқ киши фойдаланган.
2022 йил август ойида Давактив Uzpaynet`нинг 100 фоиз улушини сотувга қўйганди. Кейинги бир ой ичида потенциал харидорлардан еттита ариза келиб тушди, бироқ таклифларни қабул қилиш «қўшимча аниқлаштиришлар» важи билан кейинга қолдирилди.
«Газета.uz» аввалроқ «Ўзбекнефтгаз»нинг ёнилғи қуйиш шохобчалари тармоғи ва Чиноз нефтни қайта ишлаш заводининг анонсларсиз хусусийлаштирилгани ҳақида хабар берганди. Perfectum уяли алоқа операторининг давлат улуши ҳам оммага эълон қилинмасдан хусусий эгаси қўлига ўтказилганди.
