Бухоро аеропорти чегара божхона пости орқали қадимий нумизматика буюмларини олиб чиқиб кетишга бўлган уриниш бартараф этилди, деб хабар бермоқда вилоят Божхона бошқармаси ахборот хизмати.
Бухоро-Внуково йўналишидаги авиарейс орқали хорижий давлатга учиб кетаётган икки нафар фуқаро ўзи билан республика ҳудудидан олиб чиқиб кетиш таъқиқланган маданий мерос ашёларини олиб чиқишга уринган вақтда божхона ходимлари томонидан тўхтатиб қолинган. Бартараф этилган икки ҳолатда жами 4 дона қадимий тангалар борлиги аниқланган.
Ашёвий далил сифатида вақтинча сақловга олинган тангаларнинг қадимийлик даражасини аниқлаш мақсадида Бухоро вилояти маданий мерос бошқармаси томонидан бадиий экспертиза ўтказилган.
Унга кўра, мазкур тангалар 1751 йилда Россия императори Пётр I ҳукмронлиги даврида Екатеринбург зарбхонасида зарб этилгани тасдиқланган.
Қадимий нумизматика ашёлари доимий сақлаш учун Бухоро давлат музей-қўриқхонасига тақдим этилди, дейилади хабарда.
Бошқарманинг эслатишича, «Маданий бойликларнинг олиб чиқилиши ва олиб кирилиши тўғрисида»ги қонунга асосан зарб этилганига 50 йилдан ошган нумизматика буюмларини Ўзбекистон ҳудудидан олиб чиқиб кетиш тақиқланади.
Аввалроқ Бухоро аэропортида 96 дона, Урганч аэропортида 50 дона қадимий танга олиб чиқилишининг олди олингани, Сурхондарёда ХIХ асрга оид олтин тангани, Тошкентда 32 грамм олтин тангани 100 минг долларга сотмоқчи бўлганлар ушлангани хабар қилинган эди.
