Жамият
5 январь куни Ўзбекистонда содир бўлган энг муҳим хабарлар дайжести
Қисқа таътилга чиққан Шавкат Мирзиёев, умра сафарларига тайёргарликнинг бошланиши, хорижга чиқиш паспортини беришни бошлаган ДХМ, Бухорода ишга тушган ИЭС, имтиҳон харажатларини қайтариб олган ёшлар статистикаси ва бошқа хабарлар — «Газета.uz» нинг 5 январдаги энг муҳим хабарлари дайжестида.
Uzbekistan Airways 6 январдаги Олмаота ва Актобега парвозларни бекор қилди
«Uzbekistan Airways» 6 январга мўлжалланган Нукусдан Актобега ва Тошкентдан Олмаотага авиарейсларни бекор қилди. Парвозлар қачон тикланиши ҳозирча маълум эмас.
Талабалар қулайлиги учун қўшимча авиарейслар амалга оширилади
Uzbekistan Airways компанияси талабаларга қулайлик яратиш учун 7−9 январь кунлари Урганч, Бухоро, Наманган, Қарши ва Нукус шаҳарларидан Тошкентга қўшимча рейслар ташкиллаштиради.
Ўзбекистонда умра сафарларига тайёргарлик бошланди
Ўзбекистон мусулмонлари идораси 2022 йилги умра саёҳати мавсумига тайёргарлик бошланганини маълум қилди. Муфтий Нуриддин Холиқназаров Саудия Арабистонидаги «Abu Sarhad» ҳамкор ширкати билан бу ҳақда шартнома имзолади. Навбат асосида белгиланган тўловларни амалга оширган, тегишли вакцинани олган ва Саудия Арабистонининг карантин талабларини бажарган фуқаролар тартиб билан сафарга жўнатилади.
Давлат хизматлари маркази хорижга чиқиш паспортини беришни бошлади (рўйхат)
Эндиликда ички ишлар бўлимларидан ташқари, айрим давлат хизматлари марказларида ҳам хорижга чиқиш биометрик паспортини олиш мумкин. Йил охирига келиб, бундай имконият барча ДХМларда пайдо бўлади.
Май ойидан бери ёшларнинг 5,2 млрд сўмлик халқаро имтиҳон харажатлари компенсация қилинган
1 майдан бери 2848 нафар ёшларга халқаро имтиҳонлар учун харажатлари компенсация қилинди. Бунда жами 5 млрд 218 млн сўмдан ортиқ харажат қоплаб берилган. Компенсация олганларнинг қарийб 92% IELTS имтиҳонини топширган. Ҳудудлар бўйича энг кўп компенсация Тошкент шаҳри ёшларига тўланган.
Урганчдан Оқтовга парвозлар бекор қилинди
«Uzbekistan Airways» компанияси Оқтовга парвозлар бекор қилинганини маълум қилди. Бу Оқтов халқаро аэропортининг халқаро парвозларни қабул қилишни ва амалга оширишни ёпганлиги билан боғлиқ.
Фуқароларни текшириш учун ИИБга олиб бориш тартиби бекор қилиниши кутилмоқда
Тараққиёт стратегияси лойиҳасига асосан, текшириш учун фуқарони ички ишлар бўлимига олиб бориш тартиби бекор қилиниши кутилмоқда. Унга кўра, апрель ойигача «Е-патруль» тизими жорий этилиб, барча маълумотлар жойида текширилиши кўзланган. Стратегия лойиҳасида жиноят ва маъмурий ҳуқуқбузарликлар ҳақида хабар бериш ва рўйхатга олиш учун «Е-ҳуқуқбузарлик» ягона ахборот тизимини ташкил этиш ҳам таклиф этилган.
Самарқанддаги туннелдан сув сизиб чиқиши юзасидан изоҳ берилди
Ўзбекистон темир йўллари Самарқандда 31 декабрь куни фойдаланишга топширилган автомобиль-трамвай туннели деворларидан сув сизиб чиқаётганига изоҳ берди. Таъкидланишича, бу лотоклар тиқилиши оқибатида юзага келган. «Туннель деворлари орасидан сув ўтиши йўл ўтказгичнинг конструктив элементлари мустаҳкамлигига салбий таъсир этмайди», — дейилади хабарда.
АОКА қайта ташкил этилиши кутилмоқда
Тараққиёт стратегияси лойиҳасига асосан Ахборот ва оммавий коммуникациялар агентлиги қайта ташкил этилиши кутилмоқда. Энди у Олий Мажлис палаталари олдида ҳисобдор бўлади. Қолаверса, 2022 йилда Ахборот кодекси ҳам ишлаб чиқилади. Ўзбекистон журналистика ва оммавий коммуникациялар университети эса АОКА таркибига ўтказилади.
13,5 млн нафардан ортиқ фуқаро коронавирусга қарши тўлиқ эмланди
2021 йилда коронавирусга қарши 39,2 млн доза вакцина қўлланилган. Жумладан, 13,5 млн нафардан ортиқ фуқаро коронавирусга қарши тўлиқ эмланди. Вакцина олганларнинг энг катта қисми Самарқанд вилоятида.
Тошкентда маст ҳолдаги Matiz ҳайдовчиси авария содир этди, 3 бола, жумладан бир яшар чақалоқ жароҳатланди
Тошкентнинг Махтумқули кўчасида маст ҳолдаги Matiz ҳайдовчиси қарама-қарши йўлдаги 2 машина билан тўқнашув содир этди. Бунинг оқибатида жароҳатланган 7 кишининг 3 нафари ёш болалар. Улар орасида травматик шок ташхиси қўйилган чақалоқ ҳам бор.
«Темир дафтар», ёшлар ва аёллар дафтари «Ижтимоий ҳимоя ягона реестри» билан бирлаштирилади
Ўзбекистонда ижтимоий ҳимоя бўйича миллий стратегия ишлаб чиқилди. Унинг доирасида ижтимоий ёрдамга муҳтож фуқаролар бўйича алоҳида маълумотлар базаси яратилиб, барча «дафтарлар» ижтимоий ҳимоя ягона реестрига бирлаштирилади. Шунингдек, кам таъминланган оилаларнинг 3 ёшгача бўлган болалари учун озиқ-овқат маҳсулотлари ҳамда дори-дармонлар бериш дастури қабул қилинади.
Ўзбекистон 9 та шаҳарда Бош консулхоналар очиши мумкин
5 йилга мўлжалланган Тараққиёт стратегиясига мувофиқ, Ўзбекистон Россиянинг — Самара, Астрахань, Тула, Калининград ва Нижний Новгород, Қозоғистоннинг — Чимкент, Чехиянинг — Прага, Канаданинг — Оттава, Корея Республикасининг — Пусан шаҳарларида Бош консулхона очиши кутилмоқда.
1 январдан автомобиль сотиб олганлик учун йиғим тўлиқ бекор қилинди
2022 йил учун Давлат бюджети тўғрисидаги қонунга мувофиқ, 1 январдан бошлаб автомобиль сотиб олганлик учун йиғим тўлиқ бекор қилинди. Ҳозирга қадар янги автомобиль харид қилинганда шартнома нархининг 3 фоизи миқдорида йиғим тўланарди.
Қорақалпоғистон Жўқорғи Кенгеси раисининг онаси вафот этди
Қорақалпоғистон Вазирлар Кенгашининг собиқ раиси Қаллибек Камаловнинг турмуш ўртоғи, Жўқорғи Кенгес раиси Мурат Камаловнинг онаси Любовь Камалова 95 ёшида оламдан ўтди.
Ҳафта давомида ёғингарчилик бўлиши кутилмоқда
Ҳафта давомида Каспий денгизининг жанубидан нам ҳаво массалари кириб келиши ҳисобига республика бўйича ёмғир, шимолий ҳудудларда эса қор ёғиши кутилмоқда. Ҳарорат эса +11…+16 даража илиқ атрофида бўлади.
Қашқадарёдаги аварияда 5 киши ҳалок бўлди
1 январь куни соат 13:00 ларда Деҳқонобод тумани ҳудудидан ўтувчи М-39 «Термиз-Тошкент» автомобиль йўлида Cobalt машинаси бетон тўсиққа урилган. ЙТҲ оқибатида ҳайдовчи ва тўрт нафар йўловчи вафот этган.
Нодирбек Абдусатторовга «Мард ўғлон» давлат мукофоти топширилди
Шаҳматнинг рапид йўналиши бўйича жаҳон чемпиони Нодирбек Абдусатторовга «Мард ўғлон» давлат мукофоти, икки хонали уй калити ва 250 млн сўм пул маблағи топширилди. Унинг мураббийлари Жаҳонгир Воҳидов ҳамда марҳум Дмитрий Қаюмовнинг оиласига 100 млн сўмдан берилди. Нодирбекнинг отаси жаҳон чемпионини тадбирма-тадбир овора қилмасликни сўраб, у ҳали кўп меҳнат қилиши кераклигини айтди.
Қуюқ туман туфайли Урганч ва Нукусга парвозлар кечикмоқда
Қуюқ туман сабабли Урганч ва Нукус аэропортлари якшанба кунидан буён парвозларни қабул қилмаяпти. Йўловчиларга парвоз вақтини алоқа марказидан ёки онлайн жадвал орқали аниқлаштириш тавсия этилди.
Энг кўп ўқилган хабарлар | Сўнгги янгиликлар
- ИИВ Мубашшир Аҳмадга қидирув эълон қилингани хақидаги ахборотни жойлашда техник хатога йўл қўйилганини билдирди (1)
- ЙҲХХ ва ҳокимлик ҳаракатсизлиги туфайли Амир Темур кўчасида яна одам уриб кетилди
- Ўзбекистонда ҳайдовчилар учун жарима баллари тўғрисидаги қонун имзоланди. Асосий маълумотлар
- ИИО ходимининг тўхташ талабини бажармаслик ҳайдовчини бир йилга ҳайдовчилик ҳуқуқидан маҳрум қилиши мумкин
Қўшимча имкониятлардан фойдаланиш учун сайтда рўйхатдан ўтинг