Жамият
14 февраль куни Ўзбекистонда содир бўлган энг муҳим хабарлар дайжести
Ўзбекистон барча нефть ва газ конларини Россияга бермаганини айтган энергетика вазири, Орол денгизи майдонида барпо этиладиган ўрмонзорлар, бир кунга ёпиладиган «Ер усти ҳалқа йўли» метро йўналиши, коммунал хизматга йиғилган пулни ўзлаштирган ширкат ва бошқалар — «Газета.uz»нинг кун дайжестида.
Наманганда ўзига ўт қўйиб, жонига қасд қилган талаба вафот этди
Наманган муҳандислик-қурилиш институтининг 3-курс талабаси оралиқ назоратни топширмагани учун отасидан танбеҳ эшитгани сабаб ўзига ўт қўйиб, ёқиб юборди. Танаси чуқур куйгани туфайли шифохонада вафот этди. Ҳозирда ҳолат бўйича «ўзини ўзи ўлдиришга ундаш» моддаси билан жиноят иши қўзғатилди.
Ўзбекистон Туркияга 170 тонна инсонпарварлик ёрдами жўнатди
Туркиядаги зилзилалардан жабрланганларга ҳукумат, тадбиркорлар ва Ўзбекистон аҳолиси томонидан 170 тонна инсонпарварлик ёрдами йиғилиб, улар 6 та юк самолёти ва 7 та юк машинасида мамлакатнинг турли ҳудудларига етказилди.
Пойтахт отчопарида отларнинг ўлимига сабабчи бўлганлар жаримага тортилди
Тошкент отчопарида икки бош отнинг очликдан ўлишига сабабчи бўлган шахслар ҳайвонларга шафқатсиз муносабатда бўлганликлари учун маъмурий жавобгарликка тортилди.
Тарих сохталикларидан холи китоб — «Бобурнома»ни нега ўқимаймиз?
Шоҳ Бобурнинг дурдона мемуарини тўлиқ ўқиганлар кам. Аксаримиз дарсликдаги парчалар билан кифояланганмиз. Тили, услуби қийинлигини баҳона қиламиз. Лекин орамизда шундай ўқувчилар борки, фарзандларининг исмларини Бобур мирзога атаб қўйган. «Газета.uz» ана шундай китобхонлар билан суҳбатлашди.
Ёшлар нима хоҳлайди?
Ёшлар давлат ва жамиятдан нима истайди? YouTube’даги «Улар» лойиҳасининг янги сони шу мавзудаги муҳокамаларга сабаб бўлди. Кўпчилик давлатдан эркинлик ва қонун устуворлигини таъминлашни, жамиятдан эса шахсий ҳаётга «бурун суқмаслик»ни сўраган. «Газета.uz» ёшларнинг фикрларини бир саҳифага жамлади.
Олий таълим вазири ишсиз битирувчилари кўп бўлган университетлар ёпилишини билдирди. Муносабатлар
«Ишга жойлашмаган битирувчилари кўп бўлган нодавлат олий ўқув юртлари сифатсиз таълим берувчи муассаса сифатида тан олинади ва уларнинг фаолияти тугатилиши мумкин», — деди Ўзбекистон олий таълим вазири Иброҳим Абдураҳмонов. Баёнот тармоқларда танқидларга сабаб бўлди. Вазирлик бунга жавоб қайтарди.
Тошкентда аҳолидан коммунал хизматлар учун йиғилган 158,5 млн сўмни ўзлаштирган ширкат аниқланди
Яккасарой туманида яшовчи фуқаролардан коммунал тўловлар учун йиғилган 158,5 миллион сўмни ўзлаштирган хусусий уй-жой мулкдорлари ширкати аниқланди. Ҳолат юзасидан жиноят иши қўзғатилиб, тергов ҳаракатлари бошланган.
Фарғонада Nexia-2 каналга тушиб кетди
Олтиариқ туманидан оқиб ўтувчи «Базиқувур» каналига Nexia-2 автомобили тушиб кетди. Воқеага ҳайдовчининг эҳтиётсизлиги сабаб бўлган. Машина ФВБнинг махсус техника ва асбоб-анжомлари ёрдамида чиқариб олинди.
Ўзбекистоннинг уч вилоятида 460 млн сўмдан ортиқ қалбаки пуллар мусодара қилинди
Жиззах, Самарқанд ва Бухоро вилоятларида қалбаки банкнотларни тайёрлаш ва сотиш билан шуғулланган бир гуруҳ шахслар қўлга олиниб, улардан жами 462,4 миллион сўмлик қалбаки пуллар олиб қўйилди.
Фарғонада турк компанияси 1000 МВт қувватга эга фотоэлектр станцияси қуриши мумкин
Туркия компанияси Фарғона вилоятида 1000 МВт қувватга эга фотоэлектр станциясини қуриши мумкин. Инвесторларга уларни қуриш учун учта туманда жой танлаш таклиф қилинди.
Тошкентда энага 6 ёшли ногирон болани калтаклади
Тармоқларда Чилонзор туманида энага 6 ёшли ногирон болани калтаклагани акс этган видер тарқалди. Уни боланинг онаси фуқароларни огоҳликка чақириш учун тарқатгани маълум бўлди. Ҳолат юзасидан туман ИИО томонидан терговга қадар текширув ўтказилмоқда.
Ҳарбий прокуратура Тошкент вилоятида ҳарбий хизматчининг ўлимида жиноят таркибини аниқламади
Тошкент шаҳри ҳарбий прокуратураси ҳарбий хизматчи Миржалол Имомовнинг ўлим ҳолатини ўрганиб, унда бирор шахснинг ҳаракатларида жиноят таркибини аниқламади. Терговгача текширув материалларига кўра, у ўз жонига қасд қилган. Шу билан жиноий иш қўзғатилиши рад этилди.
Сурхондарёда гиёҳванд моддалар савдоси билан шуғулланганларга суд ҳукми ўқилди
Термиз туманида гиёҳвандлик воситалари савдоси билан шуғулланган 4 нафар шахсга ҳукм ўқилди. Уларга 12 йилдан 14 йилгача бўлган муддатларга озодликдан маҳрум этиш жазоси тайинланди.
2023 йилда Орол денгизининг 100 минг гектар қуриган майдонида ўрмонзорлар барпо этилади
Жорий йилда Орол денгизининг қуриган 100 минг гектар майдонида ҳимоя ўрмонзорлари ташкил этилади. Ҳукумат фармойишига кўра, бунинг учун бир қанча жамғармалар, тижорат банклари ҳамда Қорақалпоғистон бюджетининг ошириб бажарилган қисми ҳисобидан 25 млрд сўм йўналтирилади.
Чирчиқ шаҳрида мактаб биносининг ташқи девори ёрилгани сабаб пойдевор чўкди
Тошкент вилоятининг Чирчиқ шаҳрида мактаб биносининг ташқи девори ёрилиб, ёмғир сувлари бино пойдеворининг бироз чўкишига сабаб бўлди. Қурилиш вазирлигининг маълум қилишича, ёриқлар таъмирланган. Пудратчига баҳорги таътилда бинони қайта тўлиқ таъмирлаш бўйича кўрсатма берилди.
«Ер усти ҳалқа йўли» метро йўналиши бир кунга ёпилади
18 февраль куни Тошкент метрополитенининг «Дўстлик-2» бекатидан то «Қўйлиқ» бекатигача бўлган қисми техник ишлар сабаб ишламайди. Ҳаракат 19 февралдан яна тикланади.
Қашқадарёда зилзила содир бўлди
Сешанба куни эрталаб Ўзбекистон ҳудудида зилзила қайд этилди. Эпицентр Деҳқонобод тумани бўлиб, унинг магнитудаси 3,6 ни ташкил этди.
«Диққат, диққат, радиоузелдан гапирамиз!». Ўзбекистонда радио фаолияти қандай бошланган?
Ўзбекистонда радио эшиттиришлар қачондан бошланган? Дастлабки радио эшиттириш қанча давом этгану, унда нималар эфирга узатилган? Ўзбекистондаги илк радиосухандон ким? 13 февраль — Бутунжаҳон радио куни муносабати билан «Газета.uz» Ўзбекистонда радионинг бошланғич даври тарихини ҳикоя қилади.
13 февраль куни Ўзбекистонда содир бўлган энг муҳим хабарлар дайжести
Ўзбекистонда ёмғирли ҳафта, ректорларга ходимларнинг болалари билан мактуб ёзишиш тавсия қилингани, Туркия вайроналаридан топилган яна ўзбекистонликнинг жасади, Андижонда қулаётган 5 қаватли бино плиталари, 265 млрд сўмга сотилган «Кварц» компанияси ва бошқалар — «Газета.uz»нинг кун дайжестида.
Энг кўп ўқилган хабарлар | Сўнгги янгиликлар
Қўшимча имкониятларга эга булиш учун сайтда рўйхатдан ўтинг