Arxiv
27 iyul kuni O‘zbekistonda sodir bo‘lgan eng muhim xabarlar dayjesti
O‘zbekistonda pandemiya boshlangandan beri koronavirusdan kunlik kasallanish bo‘yicha eng yuqori antirekord qayd etilishi, vaksinadan bosh tortganlar ishdan chetlatilishi mumkinligi, O‘zbekiston Olimpiadaning to‘rtinchi kunini ham medalsiz yakunlashi — “Gazeta.uz"ning 27 iyuldagi eng muhim xabarlari dayjestida.
Doimiy yashash uchun xorijga ko‘chib ketganlar soni keskin oshdi
2021 yilning birinchi yarmida doimiy yashash uchun xorijga ko‘chib ketganlar soni 10 ming nafardan oshdi. Bu 2020 yilning yanvar-iyun oylariga nisbatan 4,5 barobarga, 2019 yilning dastlabki olti oyiga nisbatan 2,2 barobarga ko‘p demakdir.
O‘zbekiston aholisi soni 34,86 million kishiga yetdi
Yarim yil ichida O‘zbekistonning doimiy aholisi soni 301,3 ming kishiga yoki 0,9 foizga oshib, 34,86 mln nafarga yetdi. Tug‘ilish va o‘lim darajasi 2020 yilning birinchi yarmiga nisbatan qariyb 7 foizga o‘sgan.
OTMlarga kirish imtihonlari 5 avgustdan boshlanadi. Savollar soni qisqartirildi
OTMlarga kirish test sinovlari 5-avgustdan boshlanadi. Test sinovlari qoida tariqasida, kuniga ikki smenada o‘tkaziladi. Shuningdek, test savollari qisqartirilib, majburiy fanlardan ular 10 tadan bo‘ladi.
10 avgustdan xorijliklarga Umra ziyoratini amalga oshirishga ruxsat berildi
Saudiya Arabistoni 10 avgustdan boshlab xorijlik ziyoratchilar uchun Umra mavsumi tiklanishini e’lon qildi. Ziyoratchilar koronavirusga qarshi Pfizer, Moderna, AstraZeneca yoki J&J vaksinalari bilan to‘liq emlangan bo‘lishi kerak.
Tokio-2020: O‘zbekiston musobaqaning to‘rtinchi kunini ham medalsiz yakunladi
Tokiodagi Olimpiadaning to‘rtinchi kunida dzyudochi Sharofiddin Boltaboyev kuchli sakkizlikdan joy olgan bo‘lsa, bokschi Bobousmon Baturov o‘zining dastlabki jangini g‘alaba bilan boshladi. Bugungi kun ham O‘zbekiston uchun medalsiz bo‘ldi.
Vaksinadan bosh tortganlar ishdan chetlatilishi mumkin
Qonunchilik palatasi deputatlari ma’qullagan qonun loyihasiga ko‘ra, endilikda aholining ayrim qatlamlarini koronavirusga qarshi majburiy emlash hamda vaksina olmagan xodimni ishdan chetlatish mumkin bo‘ladi. Quyi palata vakillari ommaviy emlash koronavirusning yangi to‘lqinlarining oldini olishga yordam berishiga ishonmoqda. Qonun loyihasi Senat tomonidan ko‘rib chiqiladi.
Toshkent viloyatida sodir bo‘lgan YTHda besh kishi jarohat oldi
Toshkent viloyatining Ohangaron tumanida Captiva rusumli avtomashina ag‘darilib ketdi. Natijada besh kishi jarohat oldi.
Dollarning rasmiy kursi ketma-ket to‘rtinchi kun ko‘tarildi
Dollarning rasmiy kursi 12,65 so‘mga ko‘tarildi va jami 10 670,00 so‘m etib belgilandi. Shuningdek, rubl kursi ham ko‘tarildi, yevro kursi esa biroz pasaydi.
Adliya vazirligi «Gazeta.uz» va boshqa OAVlar bilan memorandum imzoladi
Adliya vazirligi «Gazeta.uz» va boshqa to‘rtta onlayn OAVlar bilan memorandum imzoladi. Hamkorlik huquqiy ma’lumotlarning tarqalishini kengaytirishga qaratilgan.
Gumbaz qurilish bozori avtomobil tanlovi aksiyasini yakunladi
Gumbaz qurilish bozori Chevrolet Cobalt avtomashinasini yutuq sifatida o‘ynadi. Toshkent shahrida istiqomat qiluvchi Baxtiyor Toshmuhamedov bosh sovrin egasiga aylandi.
Kvartiralar, Tesla va Rolex: dunyo mamlakatlari vaksina olganlarni qanday rag‘batlantirmoqda?
Dunyoning bir nechta mamlakatlarida koronavirusga qarshi emlash jarayonlariga ko‘proq fuqarolarni jalb qilish uchun targ‘ibot ishlaridan tashqari, mukofot pullari, sovg‘a kartalari va ta’tillar joriy etilgan. Bundan tashqari, faqatgina vaksina olganlar ishtirok etishi mumkin bo‘lgan katta yutuqli lotereyalar tashkil etilgan. Xorijiy mamlakatlarda koronavirusga qarshi vaksina olganlarga taklif qilinayotgan «bonus"lar haqida.
UzAuto Motors navbat o‘rinlarini «sotayotganlar» bilan kurashishning yangi usulini ishlab chiqdi
UzAuto Motors Davlat yo‘l harakati xavfsizligi inspeksiyasi bilan avtomashinalarini ro‘yxatdan o‘tkazish uchun ma’lumotlar bazasini sinxronlashtirmoqda. Bu avtomobillarni xarid qilish va sotishdagi noqonuniy xatti-harakatlarning oldini olishga qaratilgan. Kompaniya ma’lumotlariga ko‘ra, ba’zi shaxslar o‘z navbatini pullash maqsadida mashina sotib olish bo‘yicha 10, 20 va hattoki, 200 ta kelishuv shartnomalarini tuzgan.
1 avgustdan O‘zbekistonda nimalar o‘zgaradi?
Hokimliklarning yerni to‘g‘ridan-to‘g‘ri ajratish, zaxiraga olish, olib qo‘yish vakolatining bekor qilinishi, to‘y va marosimlardagi cheklovlar, aholining jismoniy tayyorgarlik darajasini baholash tizimi, xorijdan mahsulot sotib olib, uchinchi davlatga to‘g‘ridan-to‘g‘ri sotishga ruxsat berilishi, turizm sohasida ayrim litsenziya talablarining joriy etilishi — 1 avgustdan O‘zbekiston qonunchiligida qanday o‘zgarishlar bo‘ladi?
Prezident maktablariga kirish imtihonlari jaziramada ochiq osmon ostida o‘tkazildi
Ayrim hududlarda prezident maktablariga kirish imtihonlari boshlandi. 5 va 6-sinflarga qabul sinovlari ochiq osmon ostida bo‘lib o‘tdi. FVV ushbu kunlarda anomal jazirama haqida ogohlantirgan edi. Vaziyatga bolalar ombudsmani izoh berib, nima uchun imtihonlarni boshqa kunlarga ko‘chirish imkoni bo‘lmagani ma’lum qildi.
Tumanlararo qo‘shma shikastlanishlar va o‘tkir qon-tomir kasalliklari markazlari tashkil etiladi
Prezident qarori bilan 35 ta Tumanlararo qo‘shma shikastlanishlar va o‘tkir qon-tomir kasalliklari markazlari bosqichma-bosqich tashkil etiladi. Ularda o‘tkir qon-tomir kasalliklari bo‘yicha shoshilinch yordam hamda buyrak yetishmovchiligi mavjud bemorlarga gemodializ xizmati ko‘rsatiladi.
Javlon Vahobov O‘zbekistonning Braziliyadagi elchisi etib tayinlandi
O‘zbekistonning AQShdagi elchisi Javlon Vahobov endi bir vaqtning o‘zida Braziliyadagi elchi vazifasini ham bajaradi. Shuningdek, u O‘zbekistonning Kanadadagi elchisi vazifasida ham faoliyat olib boradi.
O‘zbekiston 29 iyul kuni 3 mln doza Moderna vaksinasini qabul qiladi
AQShdan O‘zbekistonga 29 iyul kuni koronavirusga qarshi 3 mln doza Moderna vaksinasi olib kelinadi. Preparat AQSh tomonidan COVAX dasturi doirasida ajratilmoqda.
Navbatdagi antirekord: bir kunda 789 kishida koronavirus aniqlandi
Kecha O‘zbekistonda 789 nafar kishida koronavirus infeksiyasi qayd etildi. 521 nafar kishida pnevmoniya aniqlanib, 6 nafar bemor vafot etdi.
AQSh yil oxiriga qadar Iroqdagi harbiy operatsiyalarda ishtirok etishni to‘xtatadi
AQSh 31 dekabrga qadar Iroqdagi harbiy operatsiyalardagi ishtirokini to‘xtatadi. Xavfsizlik bo‘yicha munosabatlar o‘quv mashg‘ulotlari, maslahatlashuvlar, ravzvedka ma’lumotlarini olishga o‘tkaziladi. Shu bilan birga, Qo‘shma Shtatlar Iroq xavfsizlik kuchlarini qo‘llab-quvvatlashda davom etishini ma’lum qildi.
Eng ko‘p o‘qilgan xabarlar | So‘nggi yangiliklar
- O‘zbekistonda chorva hayvonlarini identifikatsiya qilish rejalashtirilmoqda
- Paxta sotib olish bo‘yicha shartnoma shartlari fermerlar zarariga qayta ko‘rib chiqilishi mumkin. Tafsilotlar
- Futzal JCH: O‘zbekiston Paragvayga yirik hisobda mag‘lub bo‘ldi
- Germaniyaning Deutsche Bahn kompaniyasi o‘zbekistonliklarni ishga jalb qila boshlaydi
Qo‘shimcha imkoniyatlarga ega bulish uchun saytda ro‘yxatdan o‘ting