Poytaxt hokimi Jahongir Ortiqxo‘jayev Gruziyaning O‘zbekistondagi elchisi Zurab Abdushelishvili bilan uchrashuvda Shota Rustaveli haykali atrofidagi xiyobonni rekonstruksiya qilishga kelishib oldi. Hozirda uning loyihasi ishlab chiqilmoqda. Shuningdek, Gruziya bosh vazirining O‘zbekistonga tashrifi kutilayotgani ham ma’lum qilindi.
«Parmuda», «trio», dangasa somsa, turkcha somsa, kabob-somsa, mini-somsalar, cho‘pchalarga terib pishirilgan go‘shtli va ko‘katli somsa — Zira.uz 8 xil somsani tayyorlash retseptlari ro‘yxatini taqdim etadi.
O‘zbekiston so‘nggi 4 oy mobaynida xorijdan 38,5 mln dollarga 124,8 ming tonna un sotib oldi. Shundan eng katta qismi (122,8 ming tonna) Qozog‘iston hissasiga to‘g‘ri kelmoqda. Qolaversa, Rossiyadan 1,9 ming tonna, AQShdan 50 tonna, Hindiston va Fransiyadan esa 2 tonna atrofida un import qilindi.
Jahon banki hisobotiga ko‘ra, 2025 yilga borib O‘zbekistonda hokimiyatni shaxsiy manfaatlar egallab olish xavfi maksimal darajaga yetishi kutilmoqda. Tashkilot maxsus va noshaffof imtiyozlar berishni asosiy xususiyatlardan biri deb biladi. Maslahatlashuvlar chog‘ida tadqiqotchilar yer va davlat korxonalarini xususiylashtirish jarayonlari bilan bog‘liq yuqori tashvishlarni qayd etdilar.
OTMlarda chet tilidan o‘tkaziladigan ijodiy imtihon shartlari, «O‘zbekneftgaz» AI-80 benzini narxini oshirgani, eng ko‘p Andijondan tushayotgan korrupsiya bo‘yicha murojaatlar, iyuldan ishga tushishi kutilayotgan «Raqamli mobil pasport», dam olish kunlaridagi yog‘ingarchilik va boshqalar — «Gazeta.uz»ning 27 maydagi eng muhim xabarlari dayjestida.
Metaverse, o‘zimizning tilda aytganda metaborliq yoki metamakon — o‘zi nima? Bu g‘oya qanday paydo bo‘lgan? Nega Facebook o‘z strategiyasini metaborliq g‘oyasiga qaratdi? Metaborliqdan kelajakda nima kutish mumkin?
Abdumalik Nazirov «O‘zbekiston milliy elektr tarmoqlari» boshqaruvi raisining birinchi o‘rinbosari etib tayinlandi. Bunga qadar u Energetika vazirligida boshqarma boshlig‘i bo‘lib ishlagan.
Juma kuni Yevroosiyo iqtisodiy ittifoqining navbatdagi sammiti bo‘lib o‘tdi. Unda ishtirok etgan Shavkat Mirziyoyev YeOII davlatlarini bozorga chiqishdagi texnik to‘siqlarni bartaraf etish, mehnat migratsiyasi tartib-tamoyillarini soddalashtirish, transafg‘on temir yo‘li doirasida hamkorlik qilish, agrokooperatsiya dasturini ishlab chiqishni taklif qildi. Qolaversa, prezident ittifoq mamlakatlarini yo‘lovchi tashish aloqalarini to‘liq qayta tiklashga chaqirdi.
Mirzo Ulug‘bek tumanida arzon narxda AI-80 markali benzin olib berishni va’da qilgan bir nechta shaxslar tadbirkorning 1,4 mlrd so‘mini o‘zlashtirgani aniqlandi. Holat yuzasidan tergov harakatlari olib borilmoqda.
Qurilish vazirligi tarmoqlarda videosi tarqalgan Samarqand viloyatidagi 12 qavatli bino noqonuniy qurilganini ma’lum qildi. Bino egasi Qurilishda nazorat inspeksiyasi tomonidan bir necha marta ogohlantirilgan, biroq 2012 yildan beri qurilish ishlari davom ettirilgan. “O‘zog‘irsanoatloyiha” binoning seysmik holati talablarga javob bermasligi, kolonnalarning ayrim joylari darz ketganini tasdiqladi. Binoni buzib tashlash bo‘yicha xulosa berildi, ish sudda ko‘rib chiqiladi.
Dinozavrlar Yer yuzida taxminan 233 million yil muqaddam paydo bo‘lgan. Yerning turli qismlarida, jumladan, zamonaviy O‘zbekiston hududida ham ko‘plab dinozavrlar qoldiqlari topilgan. O‘zbekiston Milliy universiteti Geologiya kafedrasi mudiri Abdulla Qo‘shoqov «Gazeta.uz»ga dinozavrlar qoldiqlari saqlanib qolishi uchun ularning ideal o‘lim holati, O‘zbekistonda ular topilgan hududlar, mamlakatimizda paleontologiya fanining bugungi holati haqida so‘zlab berdi.
Qashqadaryoning Qarshi shahri va Chiroqchi tumanidan 3 ta avtomobilda poytaxtga sifatsiz go‘sht mahsulotlari olib kelinayotgani ma’lum bo‘ldi. Shahar veterinariya boshqarmasi 700 kg go‘sht og‘ir kasalliklarga chalingani uchun so‘yilgan hayvonlarga tegishli ekanligini aniqladi. Go‘shtlarni olib kelayotgan haydovchilarga nisbatan ma’muriy bayonnoma tuzildi.
Iyul oyidan boshlab Toshkentda tajriba tariqasida «raqamli mobil pasport»ni joriy qilish taklif etildi. Pasportdan tashqari yana 8 ta hujjatlarni elektron tarzda mobil ilova orqali taqdim etish mumkin bo‘ladi. Davlat xizmatlari, bank, avia va temiryo‘l kassalari, mehmonxonalar va boshqa tashkilotlar ushbu hujjatlarni qog‘oz shaklida talab qilishni to‘xtatadi. Mobil ilovadagi elektron hujjatlar qog‘oz hujjatga tenglashtiriladi.
IIV Yo‘l harakati xavfsizligi xizmati O‘zbekiston aholisidan avtomobillarni daraxt yoki kuchli shamolga chidamsiz vositalar yaqinida qoldirmaslikni so‘radi. FVV esa kuchli shamol vaqtida amal qilish zarur bo‘lgan xavfsizlik choralarini eslatib o‘tdi. O‘zgidromet ma’lumotiga ko‘ra, shamol tezligi 18−23 m/s gacha kuchayishi kutilmoqda.
O‘zbekiston qilichbozlik federatsiyasi raisi Rustam Shoabdurahmonov o‘z arizasiga ko‘ra lavozimidan ozod etildi. U fevral o‘rtalarida MOQ rahbarligidan ham ketgandi. Federatsiyada uning o‘rnini «Kapitalbank» Kuzatuv kengashi raisi Maqsud Abdusamatov egalladi.
Prezident virtual qabulxonasi va Xalq qabulxonalariga aholisi korrupsiya bo‘yicha eng ko‘p murojaat qiladigan hududlar ichida Andijon 1-o‘rinni egalladi, deya ma’lum qildi Antikorrupsiya agentligi. 2021 yilda o‘zlashtirish, mansab vakolatini suiiste’mol qilish, pora olish kabi jinoyatlarni sodir etganlarning 4 nafarini viloyat hokimligi, 18 nafarini tuman va shahar hokimliklari xodimlari tashkil qilgan.
Dekabrdan beri ilk bor «O‘zbekneftgaz» kompaniyasiga qarashli yoqilg‘i quyish shoxobchalarida AI-80 benzini narxi 6800 so‘mgacha (4,3%) ko‘tarildi. Kompaniya buni import qilinayotgan 30 foiz neft mahsulotlarining jahon bozorlaridagi narxi oshgani bilan izohladi. Biroq, bunga qadar «O‘zbekneftgaz» vakillari AI-80 benzini mahalliy xom ashyodan ishlab chiqarilishini aytgandi.
Joriy yildan boshlab 6 ta OTMga kirish uchun chet tilidan ijodiy imtihon bo‘lib o‘tadi. Unda abituriyentlarning xorij tili fanidan tinglab tushunish, o‘qish, yozish va gapirish kompetensiyalari baholanadi. DTM 2 soat 45 daqiqa vaqt ajratiladigan mazkur imtihonning formati va qoidalarini e’lon qildi.
Urganch xalqaro aeroporti direktori Ruslan Agabullayev egallab turgan lavozimidan ozod etildi. U bu lavozimda bir yildan kamroq vaqt ishladi. Uzbekistan Airports raisining birinchi o‘rinbosari Javlonbek Umarxo‘jayev direktor vazifasini bajaruvchi etib tayinlandi.
National Interest nashri Cotton Campaign koalitsiyasi O‘zbekiston paxtasiga boykotni to‘xtatganidan so‘ng Adidas, H&M, Gap, Zara va boshqa xalqaro brendlar mamlakat to‘qimachilik mahsulotlarini xarid qilishni qayta yo‘lga qo‘yishi mumkinligini ta’kidladi. O‘zbekiston paxtasining yirik importichisi Rossiyadagi moliyaviy sanksiyalar, inflyatsiyaning o‘sishi va iste’mol bozorining qisqarishi natijasida mamlakat yangi xaridorlarni izlashiga to‘g‘ri kelishi aytilgan.
Qo‘shimcha imkoniyatlarga ega bulish uchun saytda ro‘yxatdan o‘ting