Qozog‘iston 2023 yilda O‘zbekistondan Qozog‘iston orqali Rossiyaga o‘tuvchi «Buxoro-Ural» gaz quvurining uchinchi tarmog‘i qurilishini boshlashni rejalashtirmoqda. Loyiha qiymati 95,6 mln dollarga baholangan.
Bosh prokuror buyrug‘i bilan Murodxon Axmedov Xorazm viloyati prokurori lavozimiga tayinlandi. U shu paytga qadar Farg‘ona viloyati prokurori o‘rinbosari lavozimida ishlagan.
Do‘stlik tumanida 218 dona baliqni noqonuniy ovlagan fuqarolar qo‘lga olindi. Ularga nisbatan ma’muriy bayonnoma rasmiylashtirildi hamda hayvonot dunyosiga 28 mln so‘m zarar belgilandi. Hujjatlar jinoyat ishlari bo‘yicha tuman sudiga taqdim etildi.
Toshkent shahar IIBB fevral oyida Sergeli, Mirobod va Shayxontohur tumanlarida noqonuniy diniy ta’lim berish faoliyati bilan shug‘ullangan 6 kishini aniqladi. Ular 300 ming so‘mdan 3 mln so‘mgacha bo‘lgan miqdorda jarimaga tortildi.
Adliya vazirligi OAV va blogerlarni «jamiyatdagi muammolarni faqat huquqiy vositalar asosida hal qilish»ga chaqirib, OAVdagi tuhmat va haqorat uchun jazolarni eslatdi. Faollar esa bu kabi eslatmalardan «so‘z erkinligi yutqazayotgani», «erkin matbuot hali adliyaning o‘ziga ham kerak bo‘lishi»ni ta’kidladi.
Ellikqal’a tumanida prezident qaroriga asosan ichki xo‘jalik yo‘llarini ta’mirlash, ichimlik suv ta’minoti va oqova suv tarmoqlarini, elektr ta’minotini yaxshilash, transformator punktlarini ta’mirlash, temir beton tutqichlarini almashtirish hamda 4 MFY binosini yangidan qurish amalga oshiriladi.
Sirdaryo viloyatidagi bir oilani 40 ming dollar evaziga AQShga yuborishini va’da qilgan shaxs qo‘lga olindi. O‘tkazilgan tezkor tadbir davomida u fuqarodan 12 ming dollar olayotgan vaqtida ushlandi. Holat bo‘yicha jinoyat ishi qo‘zg‘atildi.
Dushanba kuni erta tongda Sergeli tumanida tez yordam mashinasi haydovchisi kaltaklandi. Aniqlanishicha, bemorning yaqini feldsherga yaxshi qaramagani uchun kuch ishlatmoqchi bo‘lgan, haydovchi esa uni himoya qilmoqchi bo‘lgan. Hozirda holat bo‘yicha jinoyat ishi qo‘zg‘atildi.
Prezident qaroriga ko‘ra, 2023 yil bahoridan tajriba tariqasida Bo‘ka va Ohangaron tumanlaridagi manzil-koloniyalarda pilla yetishtirish amaliyoti yo‘lga qo‘yiladi.
Endi «Soliq» mobil ilovasida keshbek olish uchun Face ID bo‘yicha identifikatsiyadan o‘tish talab qilinadi. Ilgari faqat 500 000 so‘mdan ortiq mablag‘ni olish uchun fotosurat yordamida shaxsni tasdiqlash talab qilinardi.
2022 yil dekabrda Surxondaryo viloyati hokimi lavozimidan ozod etilgan To‘ra Bobolov Savdo-sanoat palatasi raisining birinchi o‘rinbosari sifatida ish boshlagan. U O‘zbekiston-Ozarbayjon ishbilarmonlar kengashi yig‘ilishida birinchi o‘rinbosar va kengash hamraisi bo‘lib ishtirok etdi.
17-mart kuni Toshkentdagi Intercontinental Hotel Tashkent mehmonxonasida britaniyalik olim, Chikago universiteti professori Jeyms Robinson bilan uchrashuv bo‘lib o‘tadi. Tadbirda uning hammuallifligidagi “Mamlakatlar tanazzuli sabablari” (Why Nations Fail) kitobining taqdimoti ham bo‘lib o‘tadi.
O‘zbekiston-Ozarbayjon hududlararo forumida o‘zaro savdo va iqtisodiy hamkorlikni rivojlantirish bo‘yicha 11 ta hujjat imzolandi. Tomonlar loyihalarni o‘z vaqtida moliyalashtirish uchun $500 mlnlik qo‘shma investitsiya jamg‘armasini tashkil etishga kelishib oldi.
Jizzax shahridagi 11-maktabda ota qizining 3 nafar sinfdoshini kaltakladi. Voqeaga bolalarning qizga gap otgani sabab bo‘lgani aytilmoqda. Holat bo‘yicha jinoyat ishi qo‘zg‘atildi.
16−23 fevral kunlari Farg‘ona, Qashqadaryo, Xorazm va Samarqand viloyatlarida o‘lim bilan bog‘liq 4 ta YTH sodir bo‘ldi. Ularda 6 nafar inson vafot etdi.
O‘zbekistonda hafta davomida havo asta-sekin isib, harorat kunduzi +22 darajagacha yetadi. 27−28 fevral kunlari tog‘larda qor ko‘chishi xavfi bor. 3 martda esa Kavkaz hududlaridan biroz nam havo kirib kelishi hisobiga ba’zi joylarda yomg‘ir yog‘adi.
O‘zbekiston prezidenti Administratsiyasi rahbari Sardor Umurzakov Qatar amiri Shayx Tamim bin Hamad Ol Soniyga Shavkat Mirziyoyevning maktubini yetkazdi. Unda ikki tomonlama munosabatlar haqida so‘z borgan.
Qozog‘iston Markaziy Osiyo davlatlari orasida birinchi bo‘lib Xitoyning «Ukraina inqirozi»ni hal qilish bo‘yicha «tinchlik rejasi»ga munosabat bildirdi. Avvalroq Rossiya tashabbusni qo‘llab-quvvatlagan. Zelenskiy taklifda «tinchlik rejasi»ni ko‘rmagan, Bayden esa buni faqat Rossiya uchun manfaatli deb hisoblaydi.
«O‘zavtoyo‘lbelgi» DUK mansabdorlari 2 mlrd 701 mln so‘m miqdoridagi budjet mablag‘larini talon-toroj qilganlikda gumonlanmoqda. Ular o‘zlariga tanish firmalar bilan 9 mlrd so‘mlik shartnoma tuzib, yo‘l belgilarini yasash va chizishda foydalaniladigan mahsulotlarni qimmat narxlarda xarid qilgan.
Bolgariyada 74-bor «Kichik jahon chempionati» nomini olgan «Stranja» turniri o‘tkazildi. Unda o‘zbekistonlik bokschilar 7 ta oltin, 5 ta kumush va 6 ta bronza olib, umumjamoa hisobida yana 1-o‘rinni egalladi. O‘tgan yili ular turnirni 7 ta medal bilan yakunlagandi.
Qo‘shimcha imkoniyatlarga ega bulish uchun saytda ro‘yxatdan o‘ting