Jamiyat
20 iyul kuni O‘zbekistonda sodir bo‘lgan eng muhim xabarlar dayjesti
Qoraqalpog‘istonda tugatilgan favqulodda holat, oltin-valyuta zaxiralari oshgan O‘zbekiston, chet tilidan ijodiy imtihon sanalari, daraxtga osilgan holda topilgan ohangaronlik erkak, psixotrop moddalarni ko‘p iste’mol qilayotgan yoshlar, Nukusdagi o‘lik itlar va boshqalar — «Gazeta.uz» da kun dayjesti.
Jazirama tufayli metro poyezdlari tezligi pasaytirildi
Toshkent metropolitenining yer usti uchastkalarida relslar 65 darajagacha qizigani sababli chorshanba kuni poyezdlar tezligi 25 km/soatgacha pasaytirildi. Poyezdlar harakat jadvalini me’yorda saqlash maqsadida «Chilonzor» yo‘nalishining yer osti yo‘li qismida poyezdlar tezligi 40 km/soatga tushirildi.
Chet tilidan kasbiy (ijodiy) imtihon sanalari aniq bo‘ldi
23 — 26 iyul kunlari barcha hududlarda 6 ta OTMning tegishli bakalavriat ta’lim yo‘nalishlariga o‘qishga kirish uchun chet tilidan kasbiy (ijodiy) imtihonlar o‘tkaziladi.
Samarqanddagi to‘yda 11 kishi ovqatdan zaharlandi
Dushanba kuni Urgutdagi to‘yxonada 56 yoshli ayol ovqatdan zaharlanib, shifoxanaga yotqizildi. Qolaversa, u bilan birga yana 10 kishi tibbiy tekshiruvdan o‘tkazildi. Ularning barchasiga «ovqat toksikoinfeksiyasi» tashxisi qo‘yildi. Urgut tumani prokuraturasi vaziyatni o‘rganmoqda.
Notariuslarga nikohni qayd etish huquqi berilishi mumkin — adliya vaziri
Adliya vazirligi notariuslarga ham nikohni ro‘yxatdan o‘tkazish huquqini berish tashabbusi bilan chiqishni rejalashtirmoqda. Adliya vaziri Ruslanbek Davletovning ishontirishicha, «notariuslar ikki tomonning xohish-irodasini tasdiqlab, shahodatlay oladi».
Toshkentda jinoyatchilikni jilovlash qiyin kechmoqda — poytaxt hokimligi
Poytaxt hokimligi profilaktik chora-tadbirlarga qaramasdan shaharda jinoyatchilikni jilovlash qiyin kechayotganini ma’lum qildi. Jumladan, 6 oy davomida 10381 ta jinoyat sodir etilgan. Qolaversa, 5436 nafar fuqaro tilanchilik va 19 749 nafar fuqaro daydilikda gumonlanib, profilaktik suhbatdan o‘tkazilgan.
Toshkent viloyatida 26 yoshli erkak daraxtga osilgan holda topildi
Ohangaron tumanida 26 yoshli erkak yo‘l chetidagi daraxtga osilgan holda topildi. Sud-tibbiy ekspertizasi xulosasiga ko‘ra, uning o‘limiga bo‘yin qismi sirtmoq bilan siqilishi sabab bo‘lgan, marhumning tanasida boshqa tan jarohatlari aniqlanmagan. Prokuratura tekshiruv o‘tkazmoqda.
Toshkentda yoshlar orasida psixotrop moddalarni iste’mol qilish juda ko‘paygan — IIBB
Poytaxtda yoshlar orasida tramadol va boshqa psixotrop moddalarni iste’mol qilish holatlari juda ko‘paygan, deya ta’kidladi Toshkent shahar IIBB boshlig‘i o‘rinbosari Murodilla Aliqoriyev. Uning so‘zlariga ko‘ra, dorilar asosan mamlakatga aylanma yo‘llar orqali kirib kelmoqda va «qora bozor» da sotilmoqda.
Jazirama kunlarda «tez yordam»ga 130 mingdan ortiq chaqiriq kelib tushdi
Jazirama issiq kunlar boshlangan 17 iyuldan 20 iyulga qadar tez tibbiy yordam xizmatiga 130 mingdan ko‘proq chaqirik kelib tushgan. Murojaatchilarning aksariyati qon bosimi ko‘tarilishi, nafas yetishmovchiligi, astma xurujlari va boshqa surunkali kasalliklardan shikoyat qilgan.
Pokistonning Toshkentdagi elchixonasi insholar tanlovini e’lon qildi
Pokistonning Toshkentdagi elchixonasi insholar tanlovini o‘tkazmoqda. G‘oliblar smartfonlarga ega bo‘lishadi.
Surxondaryodagi «Xo‘jayikon» tuz g‘oridan tuman tibbiyot birlashmasi noqonuniy foydalanib kelayotgani aniqlandi
Madaniy meros agentligi Surxondaryo viloyatidagi «Xo‘jayikon» tuz g‘oridan Sherobod tuman tibbiyot birlashmasi hujjatlarsiz foydalanib kelayotganini ma’lum qildi. Tuz g‘ori 2019 yilda Moddiy madaniy merosning ko‘chmas mulk obyektlari milliy ro‘yxatiga kiritilgan.
Oltita hududda harorat 47 darajagacha ko‘tarilishi kutilmoqda
Haftaning ikkinchi yarmida Qoraqalpog‘iston, Xorazm, Buxoro, Navoiy, Qashqadaryo va Surxondaryoda havo harorati 47 darajagacha, Toshkentda esa 45 darajagacha ko‘tarilishi kutilmoqda. Farg‘ona vodiysida esa harorat pastroq bo‘ladi, So‘x, Shohimardon, Isfayramsoy daryolaridan muzli sel kelishi mumkin.
Nukus yaqinida 100 dan ortiq kuchuk va mushuklarning o‘ligi topildi
«Mehr va Oqibat» jonivorlarni himoya qilish jamiyati Nukusda kuchuk va mushuklarning ommaviy o‘ldirilayotgani haqida ariza kelib tushganini ma’lum qildi. O‘ldirilgan hayvonlarning og‘zi va panjalari sim bilan bog‘langan holda ekanligi aytilmoqda.
Yarim yil ichida YTHlar oqibatida 784 kishi halok bo‘ldi
O‘zbekistonda olti oyda 3559 ta YTH sodir bo‘ldi (bu o‘tgan yilning mos davriga nisbatan 5,2 foizga kam), ularda 2775 kishi jarohat oldi (-2,4%), 784 kishi esa halok bo‘ldi (-13,9%). YTHlarning qariyb to‘rtdan biri tezlikni oshirish oqibatida yuzaga kelgan. Salkam yarmi esa piyodalarni urib ketish bilan bog‘liq.
19 iyul kuni O‘zbekistonda sodir bo‘lgan eng muhim xabarlar dayjesti
Markaziy Osiyo davlatlari rahbarlari sammitida qatnashadigan Shavkat Mirziyoyev, Shota Rustaveli ko‘chasida tramvay liniyasi tiklanishi, Qoraqalpog‘istonda o‘chib-yonayotgan internet, xotin-qizlarga 7 yilga foizsiz ta’lim krediti, 2,6 mlnta kadastrsiz xonadon va boshqalar — «Gazeta.uz» da kun dayjesti.
Toshkent hokimligi Shota Rustaveli ko‘chasi bo‘ylab tramvay liniyasini tiklashni rejalashtirmoqda — Tbilisi meriyasi
Toshkent hokimligi Shota Rustaveli ko‘chasi bo‘ylab tramvay harakatini tiklashni rejalashtirmoqda. Bu haqda Tbilisi meriyasi Toshkent hokimiga tayanib xabar berdi. Gruziya poytaxti meri Kaxa Kaladze Gruziya bosh vaziri Irakliy Garibashvili tashrifi doirasida ayni damda O‘zbekistonda bo‘lib turibdi.
Iqtisodiy taraqqiyot va kambag‘allikni qisqartirish vaziri o‘rinbosari ishdan bo‘shatildi
Iqtisodiy taraqqiyot va kambag‘allikni qisqartirish vaziri o‘rinbosari Bobur Abdinazarov ishdan bo‘shatildi. U mazkur lavozimga 2020 yilning martida tayinlangan edi.
Andijonda qariyb yarim kilogramm «gashish»ni sotmoqchi bo‘lgan ikki fuqaro ushlandi
Huquq-tartibot idoralari xodimlari Andijon viloyatining Paxtaobod tumanida salkam 500 gramm gashishni 5 ming dollarga sotishga uringanlikda gumonlab, ikki shaxsni qo‘lga oldi. Ularning aybi sudda isbotlansa, gumondorlar 10 yildan 20 yilgacha qamalishi mumkin.
XTV: Xalq ta’limi xodimlarining katta qismi mehnat ta’tili pullarini olib bo‘ldi
XTV Xorazmda 17 mingdan ortiq xalq ta’limi xodimlari mehnat ta’tili pullarini vaqtida ololmagani haqidagi xabarlarga munosabat bildirar ekan, pullar iyul boshida to‘langanini qayd etdi. Hozirgacha respublika bo‘yicha xodimlarning jami 3,8 trln so‘m ta’til pullaridan 3,65 trln so‘mi to‘lab berilgan.
Qoraqalpog‘istonda internet ishlay boshladi. Hozircha bu vaqtincha yoki doimiyligi noma’lum
Qoraqalpog‘istonda soat 13:45 lar atrofida internet yana ishlab ketdi, deya ma’lum qildi Nukus aholisi. Telegram-kanallar va saytlar jonlana boshladi. Iyul boshidan beri respublikada internetga kirishning imkoni bo‘lmayotgandi.
Qo‘shimcha imkoniyatlardan foydalanish uchun saytda ro‘yxatdan o‘ting