Архив
27 октябрь куни Ўзбекистонда содир бўлган энг муҳим хабарлар дайжести
Ўзбекистонда Эрон дронлари ишлаб чиқарилиши ҳақидаги баёнотлар рад этилгани, «хатолар» учун огоҳлантирилган Ikkichi, Москвада техник хатолар туфайли ўзбекистонликларга чақирув қоғозлари келгани, ёш болани уриб кетгани айтилган Наманган ҳокимлиги машинаси ва бошқалар — «Газета.uz»нинг кун дайжестида.
«Ёпиқ эшиклар ортидаги учрашув». Иссиқхоналар газдан узилмайдиган бўлди
Пайшанба куни уч нафар вазир газдан узилган иссиқхона эгалари билан салкам 3 соатлик учрашув ўтказди. Тадбиркорлар муаммосига «Газета.uz» эътибор қаратгач, иссиқхоналар газдан узилмайдиган бўлди. Тез кунларда соҳага қатор имтиёзлар беришни назарда тутувчи президент қарори ҳам қабул қилинади.
Шавкат Мирзиёев Европа Иттифоқини «ақлли» қишлоқ хўжалигини ривожлантиришга чақирди
Шавкат Мирзиёев «Марказий Осиё — Европа Иттифоқи» саммитида давлатларни «яшил» тараққиёт соҳасидаги ҳамкорликни фаоллаштиришга, «ақлли» қишлоқ хўжалигини ривожлантиришга чақирди. Президент мамлакатларнинг барқарор тараққиёти йўлида саммит форматидаги очиқ мулоқот тарафдори эканини таъкидлади.
ТИВ Украина ҳукуматидан ОАВларда Ўзбекистонга нисбатан асоссиз айбловлар тарқатилишига йўл қўймасликни сўради
Ўзбекистон ТИВ мамлакат Эрон билан ҳарбий-техник соҳада ҳамкорлик қилмаслиги ва ҳарбий дронлар ишлаб чиқармаётганини қайд этди. Вазирлик Украина расмийларига мурожаат қилиб, Ўзбекистон тўғрисида ОАВларда асоссиз айбловлар тарқатилишига йўл қўймасликни сўради.
Ўзбекистон Европа инвестиция банкининг минтақавий офисини очишга тайёрлигини билдирди
Остонада ўтказилаётган «Марказий Осиё — Европа Иттифоқи» саммитида Ўзбекистон президенти ЕИ бозорларига чиқиш учун самарали транспорт-логистика коридорларини яратиш зарурлигини таъкидлади. Мамлакат Европа инвестиция банкининг минтақавий офисини очиш учун тайёрлигини билдирди.
Ўзбекистон мамлакатда Эрон дронлари ишлаб чиқарилиши ҳақидаги баёнотларни қатъиян рад этди
Мудофаа саноати давлат қўмитаси украиналик журналист Дмитрий Гордон ва унинг меҳмони Леонид Невзлин Ўзбекистонда Эрон дронлари йиғилиши ҳақида айтган фикрларини рад этди. Бу каби хабарлар Ўзбекистоннинг бошқа давлатлар билан муносабатларига салбий таъсир қилиши мумкин, деди қўмита.
Тошкентдан Дубайга учаётган самолёт Шерозга фавқулодда қўнди
Тошкентдан Дубайга учаётган Fly Dubai авиакомпаниясининг самолёти фавқулодда Эроннинг Шероз шаҳрига қўнди. Бунга экипаж аъзоларидан бирининг аҳволи ёмонлашгани сабаб бўлган. Ҳозирда самолёт парвозга ҳозирлик кўрмоқда.
Ikkichi дўкони «хатолар» учун огоҳлантирилди
Яккасарой ҳокимлиги пешлавҳасидаги матн атайлаб хатолар билан ёзилган Ikkichi дўконини «Давлат тили тўғрисида»ги қонунни бузгани учун огоҳлантирди. Бренд асосчиси Паҳлавон Турдиев «Газета.uz»га берган интервьюсида Ikkichi номидан: «Bugn oqutuv4m kankretniy ikki q6ydi dnevnigimga», дея изоҳ берди.
Ўзбекистон фуқаролари техник хатолар туфайли чақирув қоғозларини олмоқда — Москвадаги элчихона
Ўзбекистоннинг Москвадаги элчихонаси 26 нафар ўзбекистонлик чақирув қоғозини олганини тасдиқлади. Дипмиссия ўзбекистонликлар чақирув қоғози олаётган шу ва бошқа ҳолатларни «техник хатолик» деб атади ва ҳужжатлар текширувидан сўнг сафарбарлик учун чақирув бекор қилинаётганини қайд этди.
Самарқандда ИИО ходимлари маҳбусни калтаклагани рад этилди
Самарқандда ИИО ходимлари маҳбусни калтаклагани айтилган хабарлар рад этилди. Вилоят бошқармаси маҳбус қўлга олинган вақтда жароҳати бўлганини маълум қилди. ИИВ матбуот котиби Шоҳруҳ Ғиёсов Омбудсман ахборот хизматини ҳуқуқий баҳо берилмаган мурожаатни бир томонлама ёритганини таъкидлади.
I ва II гуруҳ ногиронлик пенсияси тайинланганидан кейинги ишланган вақт иш стажига қўшилади
Президент имзолаган янги қонун билан энди I ва II гуруҳ ногиронлик пенсияси тайинланганидан кейинги ишланган вақт иш стажига қўшиб ҳисобланади. Махсус иш стажи камида 25 йил бўлган тиббий ходимлари белгиланган ёшни 5 йилга қисқартирилган ҳолда пенсия олиш ҳуқуқига эга бўлади.
Йил якуни бўйича инфляция даражаси 12−12,5% атрофида бўлиши прогноз қилинмоқда
Марказий банк томонидан ўтказилган матбуот анжуманида 2022 йил якунига кўра инфляция даражаси 12−12,5% атрофида бўлиши, 2023 йилда эса 8,5−9,5% гача пасайиши прогноз қилинди. Мос равишда ЯИМ 5,2−5,8%, 2023 йилда 4,5−5% бўлиши кутилмоқда.
Қамчиқ довонида электромобиллар учун TOK BOR қувватлаш станцияси ишга туширилди
Электромобил ҳайдовчилари учун Қамчиқ довонида қулай ва хавфсиз қувватлантириш имконияти пайдо бўлди. TOK BOR компанияси Хитой ва Европа моделлари учун мўлжалланган қуввати 80 кВт бўлган тезкор станцияни ўрнатди.
Тошкент ва Бухоро вилоятларида жами 2,4 тонна яроқсиз гўшт сотуви олди олинди
Зангиота туманида қарийб 1,3 тонна, Жондор туманида эса 1,1 тонна истеъмолга яроқсиз гўшт маҳсулоти сотувга қўйилиши олди олинди. Ҳолатлар юзасидан жиноят ишлари қўзғатилди.
Жиззахда корхона раҳбарлари 2,9 млрд сўм кредит маблағларини талон-торож қилгани айтилмоқда
Жиззах шаҳрида тадбиркор меҳмонхона биносини жиҳозлаш учун ажратилган 1,5 млрд сўмни бошқа мақсадларда сарфлаб юборгани айтилмоқда. Бошқа бир корхона раҳбари эса 1,4 млрд сўм мақсадли кредитни ўзлаштиргани маълум қилинди. Гумонланувчиларга нисбатан жиноят иши кўзғатилди.
Тошкентдаги атроф-муҳитга салбий таъсир кўрсатувчи 15 та корхона фаолияти тўхтатилди — Экоқўмита
Экология қўмитаси 9 ойда 648 та субъектда, пойтахтнинг ўзида эса 60 та корхонада экологик назорат тадбирлари ўтказди. Натижада атроф-муҳитни ифлослантирган корхоналардан 49,5 млрд (Тошкентда — 15,5 млрд) сўмдан ортиқ компенсация ундирилди. Суд қарори билан 15 та корхона фаолияти тўхтатилди.
МБ асосий ставкани 15% даражасида ўзгаришсиз қолдирди
Марказий банк асосий ставкани йиллик 15 фоиз даражасида ўзгаришсиз қолдиришга қарор қилди.
Россияда Ўзбекистон фуқароларини сафарбар қилишга уринишди
Россиядаги чиқиндиларни қайта ишловчи корхонада меҳнат қилаётган Ўзбекистон фуқароларига сафарбарлик учун чақирув қоғозларини топширишди. «Газета.uz» вазиятга ойдинлик киритиш мақсадида корхона раҳбари билан боғланди.
«Abu Saxiy Center»даги автотураргоҳда Orlando машинасида ёнғин чиқди
Чилонзор туманидаги «Тошкент савдо маркази»нинг кўп қаватли автотураргоҳида Orlando машинасининг двигателида носозлик сабаб ёнғин келиб чиқди. Туман ФВБ ходимлари келиб, ёнғинни ўчирди. Ҳодисадан бино ва атрофдаги бошқа авто уловлар зарар кўрмади.
Сурхондарёда 11 кг «гашиш»ни Ўзбекистонга олиб киришга уринганлар ушланди
Сурхондарё вилоятида 11 кг «гашиш» гиёҳвандлик моддасини мамлакатга олиб ўтишга уринганликда гумонланган 11 нафар шахс қўлга олинди. Уларга нисбатан жиноят иши қўзғатилди.
Энг кўп ўқилган хабарлар | Сўнгги янгиликлар
Қўшимча имкониятлардан фойдаланиш учун сайтда рўйхатдан ўтинг