Андижонда талаба ётоқхона ҳожатхонасида осилган ҳолда топилди
Андижон машинасозлик институти ётоқхонаси ҳожатхонасида 2-босқич талабаси осилган ҳолда топилди. Бош прокуратура маълумотларига кўра, марҳум ўз жонига қасд қилган.
Тошкент аэропортида Британиянинг қалбаки паспортлари бўлган Афғонистон фуқаролари қўлга олинди
Етти нафар Афғонистон фуқароси Тошкентдан Лондонга сохта Британия паспортлари билан учиб кетишга уринди. Улар қўлга олиниб, жиноий иш қўзғатилган.
Дунё аҳолиси сони 8 млрддан ошди
Countrymeters лойиҳаси ҳисоб-китобларига кўра, 15 август куни дунё аҳолисининг сони 8 млрддан ошди. Уларнинг 4,04 млрд нафари эркак, 3,96 млрд нафари аёллардир. Дунёнинг қарийб 70% аҳолиси 20 давлатда яшамоқда. Қитъалар бўйича эса энг кўп инсонлар Осиёда — 4,7 млрд киши.
Жазони ижро этиш тизими ходимларининг бодикамералардан фойдаланиш тартиби белгиланди
Жазони ижро этиш тизими ходимларининг шахсий видеорегистраторлардан фойдаланиш тартиби белгиланди. Унга кўра, ️бодикамера ходим хизмат вазифасини бажаришга киришганидан бошлаб ишга туширилиши ва нарядни топширгунига қадар ишлатилиши лозим. Ундан шахсий мақсадларда фойдаланиш тақиқланади.
Икки вилоятдан 250 нафарга яқин хотин-қиз электрон тижорат, SMM ва реклама бўйича ўқитилади
USAID ташаббуси билан Тошкент ва Қашқадарё вилоятларидан 250 нафарга яқин хотин-қиз электрон тижорат, ижтимоий тармоқлар маркетинги ва реклама бўйича ўқитилади. Машғулотлар якунида улар онлайн дўконларини очиш, глобал ва маҳаллий платформалар орқали товарларни сотиш имкониятига эга бўлишади.
Фарғонада икки нодавлат ОТМ фуқароларнинг 2,1 млрд сўмини ўзлаштиргани аниқланди
Қўқон ва Фарғонада нодавлат ОТМлар тармоқлар орқали фуқаролар мазкур муассасада бакалавр даражасини берувчи халқаро дипломга эга бўлишлари ҳақида хабар тарқатган. Олийгоҳлар раҳбар ва ходимлари шу орқали 345 кишининг 2,1 млрд сўмини ўзлаштиргани айтилмоқда. Ҳолат юзасидан жиноят иши қўзғатилди.
Наманганда эр-хотин тарвуздан заҳарланиш оқибатида вафот этди
Норин туманида катта ёшли эр-хотин тахминан тарвуздан заҳарланиш оқибатида оламдан ўтди. Уларнинг икки қизи ва икки набираси шифохонага ётқизилди.
Маҳкум ва унинг оиласи ИИО ходимларига қаршилик кўрсатишди
Тошкентда пробация хизматида ҳисобда турувчи маҳкум пичоқ билан ўз билакларини кесиб, профилактика инспекторларига ҳам таҳдид қилди. Жанжалга маҳкумнинг оиласи қўшилиб, профилактика инспекторларининг хизмат кийимларини йиртишган.
Қозоғистон нефтни Озарбайжон орқали ташиш ҳақидаги хабарларни рад этади
Қозоғистон энергетика вазири Болат Акчулаков Қозоғистоннинг куздан бошлаб Баку-Тбилиси-Жайҳан йўналиши бўйича нефть ташиш нияти ҳақидаги маълумотни рад этди. Аввалроқ Reuters Қозоғистон ҳукумати нефтнинг бир қисмини Россияни четлаб ўтиб экспорт қилмоқчи экани ҳақида хабар берган эди.
Андижонда фуқарони $1500 эвазига ишга киритишга уринган шахс ушланди
Андижонда фуқарони танишлари орқали ҳамшира лавозимига ишга киритишга уринганликда гумонланган шахс 1500 доллар олганида ушланди. Фарғонада эса бошқа бир шахс Жанубий Кореяга ишга жўнатиш эвазига олган 5400 доллардан 1000 долларини қайтарган вақтида қўлга олинди.
Ҳафта охирига келиб ҳаво ҳарорати пасайиши кутилмоқда — Ўзгидромет
Ҳафта бошида +39 даражагача бўлган қуруқ ва бироз иссиқ об-ҳаво сақланиб қолади. Ҳафта ўрталаридан республикага Урал ҳудудларидан салқин ҳаво кириб кела бошлайди, ҳарорат кечалари +20 даражагача, кундуз кунлари +33 даражагача пасаяди.
Президентнинг тадбиркорлар билан мулоқоти 22 август куни бўлиб ўтади
Шавкат Мирзиёевнинг тадбиркорлар билан очиқ мулоқоти 20 августда эмас, балки 22 август куни бўлиб ўтади. Мулоқот арафасида 8500 дан ортиқ мурожаат келиб тушгани, шундан 72 фоизи аллақачон ҳал этилгани айтилмоқда.
Еревандаги портлаш оқибатида камида 6 киши ҳалок бўлди
Якшанба куни Еревандаги «Сурмалу» савдо мажмуасида йирик портлаш юз берди. Бунинг оқибатида камида 6 киши ҳалок бўлди. Яна 60 дан ортиқ киши жароҳатлангани айтилмоқда, 17 киши эса бедарак йўқолган деб ҳисобланмоқда.
Ходимларга экологик ҳуқуқбузарлик бўйича ундирилган жариманинг 30 фоизи тўлаб берилади
Профилактика инспектори, ППХ ва Миллий гвардия ходимларига экологик ҳуқуқбузарлик содир этган шахсларга нисбатан қўлланилган жариманинг 30 фоизи миқдорида мукофот пули тўланади. Шунингдек, «Экологик патруль» ишлаш тизими янада кенгайтирилади.
«Асоссиз хабарлар». Экология қўмитаси раҳбари тўртта хизмат машинасидан фойдаланишига муносабат билдирилди
Давлат экология қўмитаси раҳбари тўртта — «Mercedes», «Тoyota 200», «E-bora» ва «Volkswagen ID-6» хизмат машинасидан фойдаланиши рад этилди. Қўмита матбуот хизмати ушбу «хабар асоссизлиги», автомобилларнинг фақат иккитаси Нарзулла Обломуродовга бириктирилганини маълум қилди.
1 ноябрдан чиқинди хизмати учун тўлов қилмаганларнинг хорижга чиқиши тақиқланиши мумкин
Президент фармони билан маиший чиқинди хизмати учун тўлов қилмаганларнинг хорижга чиқиши тақиқланиши мумкин. 1 ноябргача тизим «Электрон ҳукумат» ва «Хорижга чиқиш паспорти» платформалари билан боғланади. Қолаверса, 2023 йилдан янги кўп қаватли уйларни чиқинди тўплаш жойларисиз қуриш тақиқланади.
Санитар тозалаш корхоналарига қўшимча имтиёзлар тақдим этилади
Президент фармони билан 2026 йилгача санитар тозалаш корхоналаридан фойда ва ижтимоий солиқ ставкаси 1 фоиз миқдорида ундирилади. Шунингдек, инвестиция лойиҳаларини амалга ошириш учун 2,5 млрд сўмдан ошмаган миқдорда кредитлар ажратилади.
Шавкат Мирзиёев Саудия Арабистонига ташриф буюради
17−18 август кунлари Шавкат Мирзиёев Подшоҳ Салмон бин Абдулазиз Ол Сауднинг таклифи билан Саудия Арабистонига боради. Бу охирги 30 йил ичида Ўзбекистон президентининг ушбу давлатга илк ташрифи бўлади. Музокаралардан ташқари, Маккаи Мукаррама ва Мадинаи Мунавварани зиёрат қилиш режалаштирилган.
«Когон магистрал газ қувурлари» бошқармасидаги авария Фарғона водийсига таъсир қилмайди — «Ўзтрансгаз»
Июнь бошларида Бухородаги «Когон магистрал газ қувурлари» бошқармасида ёнғин содир бўлганди. Шундан сўнг, авария оқибатида Фарғона водийси қиш мавсумида газсиз қолиши ҳақида гап-сўзлар тарқалди. Бошқарма раҳбари буни рад этиб, улар фақат Бухоро, Навоий, Самарқандга газ етказиб беришини маълум қилди.
Тошкентдаги ЙТҲда «Жигули» иккига бўлиниб кетди
Тошкентнинг Сергели туманида «ВАЗ-2106» русумли автомашина дарахтга бориб урилиши натижасида иккига бўлиниб кетди. Ҳайдовчи касалхонага ётқизилган.
Қўшимча имкониятлардан фойдаланиш учун сайтда рўйхатдан ўтинг