Arxiv
3 fevral kuni O‘zbekistonda sodir bo‘lgan eng muhim xabarlar dayjesti
24 fevralgacha bosqichma-bosqich oflaynga o‘tadigan OTMlar, kamida bitta milliy cholg‘u asbobini chalishni bilishi kerakligi aytilgan maktab o‘quvchilari, telegramda dars o‘tganlarni tanqid qilgan oliy ta’lim vaziri, Chimyonda quriladigan 269 mln dollarlik oromgoh, «prava» olish uchun ishga tushgan Yagona imtihon markazi, endi faqat bilimi borlar rulga o‘tirishini aytgan ichki ishlar vaziri o‘rinbosari Bekmurod Abdullayev va boshqalar — «Gazeta.uz» ning 3 fevraldagi eng muhim xabarlari dayjestida.
Asakada 10 tup ko‘p yillik daraxt kesib tashlandi
Andijon viloyatining Asaka tumanida xususiy korxona tomonidan 10 tup ko‘p yillik daraxt kesib tashlandi.
Toshkentga 20 ta elektrobus yetib keldi
Xitoyning Yutong kompaniyasi tomonidan ishlab chiqarilgan 20 ta elektrobus Toshkentga olib kelindi.
Endi intellektual mulk huquqini buzgan shaxslar jarimaga tortiladi
Intellektual mulk sohasidagi qonunchilikka kiritilgan o‘zgartishlarga ko‘ra, tovar belgilari va firma nomlaridan noqonuniy foydalangan shaxslar BHMning 100 baravaridan 200 baravarigacha (27 mln so‘mdan — 54 mln so‘mgacha) miqdorda jarimaga tortiladi. Qolaversa, endi barcha yuridik va jismoniy shaxslar o‘z nomiga tovar belgisini ro‘yxatdan o‘tkazishi mumkin.
«Endi puli yoki tanishi borlar emas, faqat bilimi borlargina rulga o‘tiradi, bundan boshqasiga rozi emasmiz» — vazir o‘rinbosari
Ichki ishlar vaziri o‘rinbosari Bekmurod Abdullayevning so‘zlariga ko‘ra, haydovchilik guvohnomasini olish uchun imtihonlar inson omilidan holi, avtomatlashtirilgan tarzda o‘tkazilishi jarayondagi korrupsion holatlarga chek qo‘yadi. «Imtihondan pul, tanish-bilish orqali bilan o‘tishning imkoni bo‘lmagach, hamma o‘z-o‘zidan o‘qishga majbur bo‘ladi, mas’uliyatsiz avtomaktablar esa yoki ishini yig‘ishtiradi, yoki sifatli ta’lim berishni boshlaydi», — dedi vazir o‘rinbosari.
Andijondagi maktablarda tungi tadbirlar prezident topshirig‘i asosida o‘tkazilmoqda — viloyat XTB
Andijon viloyatida joylashgan maktablarda kechasi uyushmagan yoshlar uchun o‘tkazilayotgan tadbirlar prezident topshirig‘i asosida amalga oshirilmoqda, deb ma’lum qildi viloyat XTB boshlig‘i Azizbek Mirkomilov. Uning so‘zlariga ko‘ra, maxsus jadvallar asosida har kuni maktablarda soat 18:00 dan 22:00 gacha turli tadbirlar o‘tkazib kelinmoqda. Avvalroq, deputat Rasul Kusherbayev sovuq payti ko‘chada o‘tkazilayotgan ushbu tadbirlarni tanqid qilgandi.
Chimyonda 6 ming sayyohga mo‘ljallangan kurort barpo etiladi
Chimyonda Fransiya ishtirokida 6 ming o‘rinli dam olish maskani quriladi. Oromgoh 20 km uzunlikdagi chang‘i yo‘laklari, dor yo‘li va boshqa attraksionlarni o‘z ichiga oladi. Loyihaga kiritilgan sarmoyaning umumiy hajmi 269 mln dollarga teng.
Nukus shahrida joylashgan bozor oldida fuqarolar yo‘lni to‘sib qo‘ydi
2 fevral kuni Nukus shahridagi markaziy dexqon bozor yonida fuqarolar bozor atrofidagi yo‘lni to‘sishgan. «Gazeta.uz» ning aniqlik kiritishicha, bunga «NUKUS DILISHA» kompaniyasiga qarashli binoda ijarada savdo qiluvchi fuqarolarning ijara narxi ko‘tarilganiga noroziligi sabab bo‘lgan.
Maktab o‘quvchilariga kamida bitta milliy cholg‘u asbobini chalish mahorati o‘rgatiladi
Prezident qarori bilan 2022/2023-o‘quv yilidan boshlab umumiy o‘rta ta’lim muassasalarida o‘quvchilarga milliy musiqa cholg‘ularidan kamida bittasini chala olish mahorati o‘rgatiladi va bu ularning shahodatnomasida qayd etiladi. 10130 ta maktab, 323 ta bolalar musiqa maktabi, 826 ta madaniyat markazi 7 turdagi milliy cholg‘ular bilan 3 to‘plamdan ta’minlanadi. Buning uchun 205 mlrd so‘m ajratiladi.
OTMlarda o‘qish 24 fevralgacha bosqichma-bosqich ana’naviy shaklga o‘tkaziladi
Oliy ta’lim muassasalarida o‘quv jarayonlari 7 fevraldan 24 fevralga qadar bosqichma-bosqich ana’naviy shaklga o‘tkaziladi. Bu davr ichida darslar ham onlayn ham oflayn shaklda olib boriladi. OTMlar imkoniyatidan kelib chiqib, alohida reja-grafik asosida oflayn shaklga o‘tadi, bu haqda ular o‘zining rasmiy sayti orqali xabar beradi.
Samarqandga uchayotgan samolyot Qozog‘istonda shoshilinch qo‘nishni amalga oshirdi
Sankt-Peterburgdan Samarqandga qarab uchayotgan «Aeroflot» aviakompaniyasiga tegishli samolyot Qozog‘istonda shoshilinch qo‘nishga majbur bo‘ldi. Bunga reys o‘lovchilaridan biri — O‘zbekiston fuqarosiga shoshilinch tibbiy yordam talab etilgani sabab bo‘lgan.
Foto: Haydovchilik guvohnomasini olish uchun Yagona imtihon markazi ishga tushdi
Haydovchilik guvohnomasi uchun imtihon topshirishga mo‘ljallangan Yagona imtihon markazi o‘z faoliyatini boshladi. Markazga kelgan nomzod nazariy savollarga to‘g‘ri javob berishi va so‘ngra imtihonning amaliy qismidan o‘tishi kerak bo‘ladi. Shundagina u YHXBB yoki davlat xizmatlari markazlaridan haydovchilik guvohnomasi berilishiga asos bo‘ladigan maxsus sertifikatni qo‘lga kiritadi (foto).
Senatorlar geografik ko‘rsatkichlar to‘g‘risidagi qonunni ma’qulladi
Senatning navbatdagi yalpi majlisida «Geografik ko‘rsatkichlar to‘g‘risida» gi qonun ko‘rib chiqildi. Unga ko‘ra, endi tadbirkorlar o‘z tovarlarida ishlab chiqarilgan joy nomini ko‘rsatishi kerak. Qayd etilishicha, hozirgacha O‘zbekistonda faqat 4 ta tovar, xususan, 2 ta mahalliy mahsulotning geografik ko‘rsatkichi ro‘yxatdan o‘tkazilgan. Senatorlar ishontirishicha, mazkur qonun mintaqaviy brendlar rivojlanishi va hududlarning turistik jozibadorligi oshishiga xizmat qiladi.
OTB O‘zbekistonda 2025 yilgacha umumiy qiymati $2,8 milliardlik 27 ta loyihani amalga oshiradi
OTB 2022−2024 yillarda O‘zbekistonda umumiy qiymati 2,8 mlrd dollarga teng 27 ta loyihani amalga oshirishi ko‘zda tutilmoqda. Joriy yilda OTB O‘zbekistonga qayta tiklanadigan energiya manbalari, jumladan, quyosh va shamol energiyasi, suv resurslari, shaharsozlik va yo‘llarga investitsiyalar sohalarida yordam ko‘rsatish, ipoteka bozorini rivojlantirishni davom ettirishni rejalashtirmoqda.
Umra-2022: Ilk ziyoratchilar O‘zbekistonga qaytib keldi
1- fevral kuni “Umra — 2022” mavsumining ilk ziyoratchilari Saudiya Arabistonidan O‘zbekistonga qaytib keldi. Ular “Baqi” qabristoni, “Qubo” va “Qiblatayn” masjidlari va Uxud tog‘ida, shuningdek, Madina shahrida Masjidul Nabaviyda, Payg‘ambarning Ravzai mutohharalarida ziyoratda bo‘lgan.
Oliy ta’lim vaziri Qashqadaryoda 3 ming talaba Telegram orqali o‘qitilayotganini tanqid qildi
Oliy va o‘rta maxsus ta’lim vaziri Abduqodir Toshqulov masofaviy ta’lim uchun ko‘plab maxsus platformalar bo‘lishiga qaramasdan, Qashqadaryo OTMlaridagi talabalar Telegram orqali o‘qitilayotganini tanqid qildi. Masofaviy ta’limni tashkil qilishdagi kamchiliklar uchun Qarshi davlat universitetining Pedagogika instituti rahbarlariga hayfsan e’lon qilindi.
Arzon kvartira haqida e’lon berib, fuqaroning pulini o‘zlashtirganlikda gumonlanuvchi shaxs qo‘lga olindi
IIV Kiberxavfsizlik markazi xodimlari ijtimoiy tarmoqlar va olx.uz saytida kvartirani ijaraga beraman deb, fuqaroning pulini o‘zlashtirganlikda gumonlanayotgan shaxsni qo‘lga oldi. U kvartira uchun avans tariqasida berilgan 500 ming so‘mni o‘zlashtirganligi aytilmoqda.
«Senatorlar qo‘mita majlisi yoki qaysidir tadbirda ishtirok etish bilan cheklanib qolmoqda» — Senat raisi
Senat raisi Tanzila Narbayeva yalpi majlis vaqtida senatorlar faoliyatidagi tadbirbozlikni tanqid qildi. «Senatorlar faqatgina qo‘mita majlisi yoki qaysidir tadbirda ishtirok etish bilan cheklanib qolmoqda» — dedi u. Qolaversa, qo‘mitalar yetarlicha ishlamayotgani, ular faqat rahbarlarning axborotini tinglash bilan shug‘ullanayotgani ta’kidlandi.
«IMEI kerak emas» degan gaplar ortida noqonuniy bozordan «dolya» olib turganlarning lobbisi turibdi — Sherzod Shermatov
AKT vaziri Sherzod Shermatov UzIMEI yashirin iqtisodiyotga qarshi kurashish uchun kerakligini ta’kidladi. «IMEI kerak emas, IMEI`ni yo‘q qilinglar, degan gaplar tagida noqonuniy bozordan „dolya“ olib, foyda qilib turganlarning lobbisi turibdi», — dedi vazir Kun.uz nashriga bergan intervyusida. Shermatov UzIMEI pulli ekanligiga to‘xtalib, uning soliq ekanligini qayd etgan.
1 martdan «Yashil yillik» umummilliy tadbiri boshlanadi
Prezident 1 martdan «Yashil yillik» umummilliy tadbiri boshlanishini ma’lum qildi. Joriy yil bahor mavsumida «Yashil makon» loyihasi doirasida 125 mln dona daraxt ko‘chatlarini ekish rejalashtirilmoqda. Aholiga kamida 10 mln dona mevali va manzarali daraxt ko‘chatlari bepul tarqatiladi. «Agar O‘zbekistonda ekologiyani yaxshilayman desa, har yili har bir xonadon ikkitadan daraxt eksin. Har bir tashkilot beshtadan daraxt eksin, qaysi tashkilot bo‘lishidan qat’i nazar», — dedi prezident.
Eng ko‘p o‘qilgan xabarlar | So‘nggi yangiliklar
Qo‘shimcha imkoniyatlardan foydalanish uchun saytda ro‘yxatdan o‘ting