Arxiv
23-may kuni e’lon qilingan eng muhim yangiliklar dayjesti
Sinov rejimida ishga tushayotgan Qirg‘iziston-O‘zbekiston avtomobil zavodi, YTHlardagi o‘limlar sonini kamaytirish uchun yechimlar, farmatsevtika tarmog‘ini rivojlantirishga doir chora-tadbirlar rejasi, Madinaga uchib ketgan ilk ziyoratchilar guruhi va boshqalar — “Gazeta.uz"ning kunlik dayjestida.
Xitoy “jazo” sifatida Tayvan atrofida harbiy mashg‘ulotlar boshladi
Xitoy Tayvanning yangi prezidenti Lay Sinde lavozimiga kirishganidan bir necha kun o‘tib “separatistik harakatlar” uchun “qattiq jazo” sifatida Tayvan bo‘g‘ozida harbiy mashg‘ulotlar boshladi.
Iqlim o‘zgarishi Osiyoga qattiq ta’sir qilmoqda — Jahon meteorologiya tashkiloti
Jahon meteorologiya tashkiloti hisobotiga ko‘ra, 2023-yilda Osiyoda iqlim o‘zgarishi tezlashgan. Mintaqada o‘rtacha global haroratdan tezroq isish kuzatilmoqda. Bu qurg‘oqchilik va issiqlik to‘lqinlaridan suv toshqini va bo‘ronlargacha bo‘lgan ekstremal ob-havo sharoitlariga olib keladi.
Farmatsevtika sohasini raqamlashtirish orqali dorilar narxini 20 foizga arzonlashtirish rejalashtirilmoqda
Shavkat Mirziyoyevga taqdim etilgan farmatsevtika tarmog‘iga oid rejalardan eksportni oshirish, shu bilan birga, ichki bozorning mahalliy mahsulotlarga talabini qondirish o‘rin olgan. Sohani raqamlashtirish orqali narxlarni 20 foizga arzonlashtirish, ishlab chiqarishni xalqaro standartlarga o‘tkazish ko‘zda tutilgan.
Moratoriyga qaramay, Chirchiq daryosi bo‘yida noqonuniy qum-shag‘al qazib olish davom etmoqda
BP Chirchiq daryosining qo‘riqlash zonasida 10 dan ortiq tadbirkor moratoriyga qaramay, noqonuniy ravishda qum-shag‘al qazib olishda davom etayotgani haqida xabar berdi. Qurilish materiallari zavodi ham ishlamoqda. BP kompaniyalarning litsenziyalari haligacha bekor qilinmaganini afsus bilan qayd etdi. Foto.
O‘zbekistonda Davlat sport akademiyasi tashkil etiladi
Kelasi yilda O‘zbekistonda Davlat sport akademiyasi ochilishi kerak, deyiladi prezidentga olib kirilgan taqdimotda. U hozirda qurilayotgan Olimpiya shaharchasida joylashadi. Shuningdek, barcha hududlarda kurash mahorat maktablari ochiladi.
Putin 26−27-may kunlari O‘zbekistonda bo‘ladi
Rossiya prezidenti Vladimir Putin davlat tashrifi bilan 26−27-may kunlari mamlakatda O‘zbekistonda bo‘ladi. Tomonlar bir nechta qo‘shma hujjatlar imzolashni rejalashtirmoqda.
Samarqandlik erkak prezidentni internetda haqoratlagani uchun axloq tuzatish ishlariga hukm qilindi
Sud Samarqand viloyatida tug‘ilgan, Olmaliq shahrida yashovchi 28 yoshli fuqaroni prezidentni haqorat qilgani uchun 2,5 yilga axloq tuzatish ishlariga hukm qildi. Erkak soliq idoralari uni ko‘p marta jarimaga tortgani uchun Instagram`da g‘azablangan holda haqoratomuz izoh va postlar joylaganini bildirdi.
Surxondaryodagi ikkita arxeologik yodgorlikka 227 mlrd so‘m zarar yetkazilgani aniqlandi
Surxondaryodagi qadimiy “Hayvontepa” va “Qorabog‘tepa-1” arxeologik yodgorliklarining ayrim qismlari buzib yuborilishi oqibatida 227,4 mlrd so‘m zarar yetdi. Holatlar bo‘yicha jinoyat ishi qo‘zg‘atildi.
Oksana Chusovitina jarohati sababli Parijdagi Olimpiya o‘yinlarida qatnasha olmaydi
48 yoshli badiiy gimnastikachi Oksana Chusovitina Osiyo chempionati oldidan olgan jarohati sababli Parij-2024 Olimpiya o‘yinlarida qatnashmaydigan bo‘ldi. Bu turnir uning faoliyatidagi to‘qqizinchi Olimpiadaga yo‘llanma olish uchun so‘nggi imkoniyat edi.
Onkologik va gematologik kasalliklarga chalingan bolalarni sog‘lomlashtirishga ko‘maklashish jamg‘armasi tashkil etildi
Bolalar gematologiyasi, onkologiyasi va klinik immunologiyasi markazini Bolalar onkologiyasi, gematologiyasi va immunologiyasi ilmiy-amaliy tibbiyot markazi etib qayta nomlandi. Markaz huzurida Onkologik va gematologik kasalliklarga chalingan bolalarni sog‘lomlashtirishga ko‘maklashish jamg‘armasi tashkil etildi.
O‘zbekistonda o‘tadigan futzal bo‘yicha Jahon chempionatining logotipi taqdim etildi
O‘zbekistonda 14-sentabrdan 6-oktabrgacha o‘tkaziladigan futzal bo‘yicha Jahon chempionatining rasmiy logotipi e’lon qilindi. U o‘zbek oshxonasida ishlatiladigan qalampirdan ilhom olgan holda ishlangan. Rasmiy brend Registon maydonida 26-may kuni jamoatchilikka taqdim etiladi.
Samarqandda 112 mln AQSh dollarlik to‘rtinchi Coca-Cola zavodi tantanali ravishda ochildi
Samarqandda to‘rtinchi Coca-Cola zavodi ochilishi munosabati bilan Anadolu Group O‘zbekiston iqtisodiyotiga 500 mln dollardan ortiq sarmoya kiritdi va Namangan viloyatida yangi Coca-Sola zavodini qurishni rejalashtirmoqda.
Janubiy Koreya, Xitoy va Yaponiya so‘nggi to‘rt yil ichida birinchi uch tomonlama sammitni o‘tkazadi
Janubiy Koreya, Xitoy va Yaponiya yetakchilari mamlakatlar o‘rtasidagi munosabatlarni normallashtirish maqsadida to‘rt yildan ortiq vaqtdan beri ilk bor uch tomonlama sammitni o‘tkazadi.
O‘zbekistonda charm-poyabzal sanoati klasterlari tashkil qilinadi
Sharof Rashidov va Ohangaron tumanida tashkil etilgan charm-poyabzal kichik sanoat zonasi hududini kengaytiriladi. Shu bilan charmni chuqur qayta ishlash va tayyor mahsulotlar ishlab chiqarishga ixtisoslashgan charm-poyabzal sanoati klasterlari tashkil qilinadi.
Qashqadaryoda KamAZ piyodalar o‘tish joyida urib yuborgan 2-sinf o‘quvchisi halok bo‘ldi
Ko‘kdala tumanida yuqori tezlikdagi KamAZ piyodalar o‘tish joyidan o‘tayotgan 2-sinf o‘quvchisini urib yubordi. Holat bo‘yicha jinoyat ishi ochildi, haydovchi qamoqqa olindi.
Sirdaryoda Xovos tumani hokimi o‘rinbosari korrupsiyada aylanib, qo‘lga olindi
DXX viloyatlarda reyd tadbiri o‘tkazdi. Unda Sirdaryo viloyatining Xovos tumani hokimi o‘rinbosari tadbirkorga yordam berib, $20 ming talab qilgani ma’lum bo‘ldi. Toshkent viloyatida esa “Hududiy elektr tarmoqlari”ning 2 xodimi ishlab chiqaruvchiga transformator o‘rnatib berish uchun $39 ming olgani aytilmoqda.
Toshkentda Navro‘z bog‘i yaqinidagi ko‘prik uch kunga transport harakati uchun yopildi
Toshkent shahrining Abdulla Qodiriy va Shayxontohur ko‘chalari kesishmasidagi ko‘prik ta’mirlash ishlari sabab 25-maygacha transport harakati uchun yopildi.
Qirg‘iziston-O‘zbekiston avtomobil zavodi 28-maydan sinov rejimida ishlashga tayyor bo‘ladi
28-maydan Qirg‘iziston-O‘zbekiston avtomobil zavodi sinov rejimida ishlashga tayyor bo‘ladi. Chuy viloyati Sokuluk tumanida joylashgan zavodda Chevrolet, Daewoo va Isuzu avtomobillarini ishlab chiqarish rejalashtirilgan.
Neo Insurance raqamli sug‘urta kompaniyasi faoliyatining bir yilligini nishonladi
Raqamli sug‘urta kompaniyasi Neo Insurance faoliyatining bir yilligini nishonladi va istiqboldagi rejalari bilan bo‘lishdi.
Eng ko‘p o‘qilgan xabarlar | So‘nggi yangiliklar
- O‘zbekistonda chorva hayvonlarini identifikatsiya qilish rejalashtirilmoqda
- Paxta sotib olish bo‘yicha shartnoma shartlari fermerlar zarariga qayta ko‘rib chiqilishi mumkin. Tafsilotlar
- Futzal JCH: O‘zbekiston Paragvayga yirik hisobda mag‘lub bo‘ldi
- Germaniyaning Deutsche Bahn kompaniyasi o‘zbekistonliklarni ishga jalb qila boshlaydi
Qo‘shimcha imkoniyatlarga ega bulish uchun saytda ro‘yxatdan o‘ting