17 fevral kuni O‘zbekistonda sodir bo‘lgan eng muhim xabarlar dayjesti
$4 ming olganlikda gumonlanayotgan Yashnobod tumani sudi sudyasi, quyosh panellarini o‘rnatgan aholi uchun rag‘batlar, yangi ko‘p qavatli uy tomlarining yarmiga quyosh panellarini o‘rnatish talabi, 2022 yilda daraxtlarni noqonuniy kesishdan ko‘rilgan 10 mlrd so‘m zarar va boshqalar — «Gazeta.uz»ning kun dayjestida.
Jo Bayden Shavkat Mirziyoyevga maktub yo‘lladi
AQSh prezidenti O‘zbekiston prezidentiga yo‘llagan maktubida AQSh uchun O‘zbekiston bilan iqtisodiyot va energetika sohalarida aloqalarni rivojlantirish, shuningdek, mamlakat siyosiy tizimini modernizatsiya va isloh qilish bo‘yicha sa’y-harakatlarni qo‘llab-quvvatlash ustuvor vazifa hisoblanishini ta’kidladi.
Issiqxonalar, korxonalar, ijtimoiy obyektlar ommaviy ravishda gazdan ko‘mirga o‘tkaziladi
O‘zbekistonda gazni tejash maqsadida issiqxonalar, sement va g‘isht zavodlari, bolalar bog‘chalari, maktab va shifoxonalarning bir qismi ko‘mir yoqilg‘isiga o‘tkaziladi. 2023 yilda 5407 ta ijtimoiy obyekt, 1147 ta issiqxona va 250 ta zavodning ko‘mirdan foydalanishga o‘tkazilishi kutilmoqda.
O‘zbekistonda yo‘lovchi tashish hajmi pandemiyadan oldingi yilga nisbatan 22 foizga oshdi — Uzbekistan Airports
Uzbekistan Airports rahbari Ra’no Jo‘rayeva yo‘lovchi tashish hajmi pandemiyadan oldingi yilga nisbatan 22 foizga oshganini ma’lum qildi. 2023 yilda yangi mahalliy aviakompaniyalar tashkil etish va xorijiy kompaniyalarni jalb qilish hisobiga ko‘rsatkichni 18 foizga oshirish rejalashtirilgan.
Qashqadaryoda yigit qizning shaxsiy suratlarini tarqatmaslik uchun 5000 dollar talab qilgani aytilmoqda
Shahrisabzda gaplashib yurgan qizining shaxsiy suratlarini qo‘lga kiritib, ushbu rasmlarni ijtimoiy tarmoqlarda tarqatib yuborish bilan qo‘rqitgan va undan 5 000 AQSh dollar talab qilganlikda gumonlangan yigit qo‘lga olindi. Holat bo‘yicha jinoyat ishi qo‘zg‘atildi.
Sag‘indiq Turmanov Qoraqalpog‘iston kambag‘allikni qisqartirish va bandlik vaziri bo‘ldi
Qoraqalpog‘iston Respublikasi kambag‘allikni qisqartirish va bandlik vaziri lavozimiga Sag‘indiq Turmanov tayinlandi.
Mirzo Ulug‘bek, Uchtepa va Yunusobod tumanlari hokimlariga hayfsan berildi
Poytaxt hokimi v.b. Baxtiyor Rahmonov Mirzo Ulug‘bek, Uchtepa va Yunusobod hokimlariga hayfsan berdi. Bunga Shavkatbek Irgashev, Farxod Abdullayev va Boxadir Abduvaliyevlarning qishga tayyorgarlik va uni betalafot o‘tkazish bo‘yicha zarur choralarni ko‘rmagani, aholi bilan muloqot qilmagani sabab bo‘lgan.
2022 yilda daraxtlarni noqonuniy kesishdan ko‘rilgan zarar 10 mlrd so‘mni tashkil etdi
O‘zbekistonda 2022 yilda daraxt va butalarni noqonuniy kesish bo‘yicha 4599 ta holat aniqlangan. Taqqoslash uchun, 2021 yilda 8243 ta qoidabuzarlik qayd etilgan. Tabiatga yetkazilgan zarar 10 mlrd so‘mga baholanmoqda. Qurilish maydonchalarida to‘siqlar bilan o‘ralgan 24 ming daraxt xavf ostida qolmoqda.
Yashnobod tumani sudi sudyasi $4 ming olganlikda gumonlanmoqda
Jinoyat ishlari bo‘yicha Yashnobod tumani sudi sudyasi (erkak) 4000 dollar olganlikda gumonlanmoqda. Sudyalar oliy kengashi bosh prokuror taqdimnomasiga ko‘ra uni javobgarlikka tortishga rozilik berdi va sudyalik vakolatini tugatdi. Oliy sud roziligi bilan sudya qamoqqa olindi.
Aydar-Arnasoy ko‘llar tizimida suv sathi 2 metrgacha pasaygan
Aydar-Arnasoy ko‘llar tizimidagi suv sathi 2 metrgacha pasayib, hajm 36,8 mlrd metr kubga tushgan. Oqibatda qirg‘oq bo‘ylari 15−50 metrga chekinib, tuz qatlami hosil bo‘lgan. Senatga ko‘ra, bu o‘zgarishlar noyob qushlarning yo‘qolib ketishiga sabab bo‘lishi mumkin.
O‘zbekiston ochiq ma’lumotlar bo‘yicha jahon reytingidagi o‘rnini yaxshiladi
Open Data Inventory ma’lumotlarning ochiqligi global reytingida O‘zbekiston 40-o‘ringa ko‘tarilib (2020 yilda 44-o‘rin), Markaziy Osiyo davlatlari orasida yetakchilik qilmoqda. Shunga qaramasdan, ifloslanish bo‘limidagi ko‘rsatkich 0 ballgacha tushib ketdi.
Qayta tiklanuvchi energiya manbalarini o‘rnatgan shaxslar soliq imtiyozlariga ega bo‘ladi
Qayta tiklanuvchi energiya manbalari uchun quvvati 100 kVtgacha bo‘lgan qurilmalarni o‘rnatgan jismoniy va yuridik shaxslar 1 apreldan ushbu qurilmalar bo‘yicha mol-mulk solig‘i, u egallab turgan uchastkalar uchun yer solig‘i va ishlab chiqarilgan energiyani sotishdan olingan foyda solig‘ini to‘lashdan ozod qilinadi.
Dam olish kunlari faqat ayrim hududlardagina yomg‘ir yog‘adi
Shanba kuni O‘zbekistonning faqat janubi-sharqiy qismida yomg‘ir davom etadi, yakshanba kuni esa yog‘ingarchilik kutilmaydi. Shanba kuni havo harorati kunduzi +10 darajagacha, yakshanba kuni esa +12 darajagacha isiydi. Joylarda tuman tushishi mumkin.
O‘zbekistonda yangi ko‘p qavatli uylar tomlarining kamida 50 foizi quyosh panellari bilan qoplanadi
O‘zbekistonda yangi ko‘p qavatli uylar tomlarining bo‘sh qismining kamida 50 foiziga quyosh batareyalarini o‘rnatish talabi joriy etildi. Bu haqda prezident qaror qabul qildi.
2023-yilda 4300 MVtlik qayta tiklanuvchi energiya manbalari ishga tushirilishi rejalashtirilmoqda
O‘zbekistonda 2023 yilda umumiy quvvati 4300 MVt bo‘lgan qayta tiklanuvchi energiya manbalari (QTEM) ishga tushirilishi rejalashtirilmoqda. Bunga 15,4 mlrd dollar yo‘naltiriladi. Ijtimoiy obyektlar va davlat organlari binolariga bunday qurilmalarni o‘rnatish bo‘yicha “Yashil energiya” kompaniyasi tashkil etilmoqda.
Turkiyada ikki kishi zilziladan deyarli 11 kun o‘tib vayronalar ostidan qutqarib olindi
Qahramonmarash zilzilasidan 261 soat (10 kun 21 soat) o‘tib Antokiya shahrida ikki erkak vayronalar ostidan tirik holda qutqarib olindi. Birinchi tibbiy yordam ko‘rsatilgach, ular shifoxonaga yetkazilgan.
Shavkat Mirziyoyev Buxoro viloyatiga tashrif buyuradi
O‘zbekiston prezidenti rasmiy tashrif bilan Buxoro viloyatiga boradi. U yerda mahallalar hayoti, korxonalar faoliyati bilan yaqindan tanishadi. Shuningdek, yangi loyihalarni ishga tushirish, hududni rivojlantirish masalalari muhokamasida ishtirok etadi.
Samarqandda fuqarolar 1 mln dollarga radioaktiv qurilma sotganlikda gumonlanmoqda
DXX va Samarqand viloyati IIB radioaktiv va zaharli qurilmalarni 1 mln dollarga sotmoqchi bo‘lgan fuqarolarni aniqlagani aytilmoqda. Ular qurilmani 200 ming dollarga sotayotgan paytda qo‘lga olingani aytilmoqda.
O‘zbekistonda quyosh panellarini o‘rnatgan aholi rag‘batlantiriladi
O‘zbekistonda uylarga kichik quyosh panellarini o‘rnatish bo‘yicha «Quyoshli xonadon» dasturi boshlanadi. 2023 yilda 37 ming aholi xonadoniga panellar o‘rnatish rejalashtirilgan. Yagona elektr energetika tizimiga o‘tkazilgan har bir kVt/soat uchun 1000 so‘m subsidiya ajratiladi.
Banklarda dollarning sotish kursi 11 410 so‘mgacha tushdi
Tijorat banklari 17 fevral kuni aholidan 1 AQSh dollarini 11 250 — 11 350 so‘mdan sotib olmoqda, sotish kursi esa aksariyat banklarda 11 410 so‘m.
Qo‘shimcha imkoniyatlarga ega bulish uchun saytda ro‘yxatdan o‘ting