Jahon
Afg‘onistonda siyosiy inqirozga barham berildi
Afg‘onistonda siyosiy inqirozga prezident Ashraf G‘ani va uning siyosiy raqibi Abdulloh Abdulloh kelishuvi bilan barham berildi. Unga ko‘ra, Ashraf G‘ani prezident maqomini saqlab qoladi va Abdulloh Abdulloh esa Afg‘oniston Oliy milliy yarashuv kengashi raisi bo‘ladi. Shuningdek, sobiq vitse-prezident general Abdulrashid Do‘stumga marshal unvoni berilishi kelishilgan.
Italiya 3 iyundan chegaralarni ochadi
Italiya hukumati 3 iyundan boshlab mamlakatning bir viloyatidan ikkinchisiga o‘tishga ruxsat beradi. Shu bilan birga, 18 may kunidan bitta viloyat ichida sayohat cheklovlari bekor qilinadi. Mahalliy hokimlarga ijtimoiy masofalanish tadbirini amalga oshirib bo‘lmaydigan hududlarni vaqtincha yopib ko‘yish vakolati beriladi.
Tojikistonda koronavirusga chalinganlar soni 907 kishiga yetdi
Tojikistonda koronavirus holatlari soni bir kunda 106 taga oshib, jami 907 taga yetdi. Shu vaqtga qadar 29 ta o‘lim qayd etildi.
Sloveniya mamlakatda COVID-19 epidemiyasi tugaganini e’lon qildi
Sloveniya Yevropada birinchi bo‘lib mamlakatda koronavirus epidemiyasi yakuniga yetganini e’lon qildi. Fuqarolar Avstriya, Italiya va Vengriya hududidan chegarani kesib o‘tishlari mumkin, mamlakatda savdo markazlari, kafe va mehonxonalar ochiladi.
Litva, Latviya va Estoniya bir-biriga chegaralarini ochdi
Boltiqbo‘yi davlatlari bir-biriga chegaralarini qaytadan ochdi. Biroq Estoniya, Latviya va Litva tashqarisidan kelgan sayohatchilar ikki haftani karantinda o‘tkazishlari kerak.
BMT: Koronavirus sababli jahon iqtisodiyoti 8,5 trln dollar yo‘qotadi
COVID-19 pandemiyasi sababli dunyo iqtisodiyoti 8,5 trln dollar yoqotishi (3,2 foizga qisqarish) prognoz qilinmoqda. Bunda, rivojlangan mamlakatlarning YAIM 5 foizga, rivojlanayotganlarda esa 0,7 foiz pasayadi. Bu 1930 yillardagi “Buyuk Depressiya"dan keyingi keskin iqtisodiy inqirozni anglatadi, deyiladi BMTning iqtisodiy hisobotida.
Jahon banki Markaziy Osiyoga 370 mln dollar ajratdi, asosiy qismi O‘zbekistonga
Jahon banki koronavirusga qarshi kurash doirasidagi chora-tadbirlarni qo‘llab-quvvatlash maqsadida Markaziy Osiyo davlatlariga 370 mln dollar ajratdi. Shundan O‘zbekistonga davlat byudjetini qo‘llab-quvvatlash uchun 200 mln, sog‘liqni saqlash milliy tizimini yaxshilash va kam ta’minlangan aholini qo‘llab-quvvatlash maqsadida 95 mln, hamda tezkor tibbiy yordam tizimini isloh qilishga 17 mln dollar taqdim etilgan.
Twitter xodimlari bir umr uydan turib ishlashlari mumkin
Twitter xodimlari koronavirus sababli o‘rnatilgan karantin cheklovlari olib tashlangandan keyin ham uyda qolib ishlashlari mumkin.
Uxan shahri aholisi 10 kun ichida koronavirusga qayta tekshiriladi
Xitoyning Uxan shahrida koronovirus bemorlari aniqlanganligi sababli, shahar ma’muriyati Uxanning barcha 11 mln aholisini koronavirus infeksiyasiga qayta tekshirishga buyurdi. Tahlillarni 10 kun ichida o‘tkazish rejalashtirilgan.
Rossiya prezidentining matbuot kotibi koronavirusga chalindi
Rossiya prezidentining matbuot kotibi Dmitriy Peskovda koronavirus infeksiyasi aniqlandi.
Janubiy Koreya, Xitoy va Germaniyada koronavirus tarqalishi yana jonlandi
Avvalroq karantin choralarini yumshatgan Janubiy Koreya, Xitoy va Germaniyada koronavirus bilan kasallanish holatlari soni oshgani qayd etildi. Dunyo bo‘yicha COVID-19 holatlari soni 4 milliondan oshdi.
AQSHda ishsizlik “Buyuk Depressiya” darajasiga yetishi taxmin qilinmoqda
AQSHda ishsizlik darajasi 1930 yillardagi “Buyuk Depressiya” davridan beri eng yuqori ko‘rsatkichga yetmoqda — 14,7 foiz. Donald Trampning ikki yuqori darajali iqtisodiy maslahatchilari AQSHda koronavirus pandemiyasi davom etavergan holda ishsizlik darajasi ko‘tarilashi va iyun oyida ishsizlik ko‘rsatgichi 20 foizgacha yuqorilashi mumkinligini ma’lum qilishdi.
AQSH Sardoba suv ombori falokatidan aziyat chekkan oilalarga yordam beradi
AQSH hukumati Sardoba suv ombori o‘pirilishining oqibatlarini bartaraf etish uchun 100 ming dollar ajratadi. Ushbu mablag‘ suv ombori o‘pirilishi natijasida o‘z uylaridan ko‘chirilgan muhtoj oilalarga oziq-ovqat va boshqa zarur vositalarni tarqatish uchun O‘zbekistonga mazkur inqirozdan qutulish va qayta tiklanishda yordam berishga yo‘naltiriladi.
Pavel Durov AQSHga ko‘chib o‘tmaslikning 7 sababini sanadi
Pavel Durov IT-tadbirkorlar uchun AQSH eng yaxshi joy deb hisoblamasligini ma’lum qildi. Telegram asoschisi buning 7 ta sababini sanadi. Durov bu masaladagi fikrlari bilan o‘rtoqlashishga Yuriy Dudning Kremniy (Silikon) vodiysidagi hayot va ish tarzi to‘g‘risidagi filmi turtki bo‘lganini aytib o‘tdi.
Saakashvili Ukraina islohotlar qo‘mitasi rahbari etib tayinlandi
Ukraina prezidenti Vladimir Zelenskiy Gruziyaning sobiq prezidenti Mixail Saakashvilini islohotlar qo‘mitasi rahbari etib tayinladi. Oldinroq Saakashvilining nomzodi bosh vazir o‘rinbosarligiga ko‘rsatilgan edi.
Futbol bo‘yicha Germaniya chempionati may oyining ikkinchi yarmidan qayta tiklanadi
Germaniya may oyining ikkinchi yarmidan futbol bo‘yicha chempionatni qayta tiklaydi. Angliya va italyan jamoalari ham o‘z turnirlarini yakunlab olishni xohlashmoqda, biroq hukumatlar qarorlarini kutishga majbur. Fransuz chempionati aprel oyida “Pari Sen-Jermen"ning muddatidan oldingi g‘alabasi bilan yakunlandi.
Tramp uning harbiy vakolatlarini cheklaydigan Kongress qaroriga veto qo‘ydi
Donald Tramp uning Eronga qarshi harbiy vakolatlarini cheklaydigan AQSH Kongressi rezolyutsiyasiga veto qo‘ydi. Mazkur rezolyutsiya “qonunlarni noto‘g‘ri talqin qilishga asoslangan, haqoratli va AQSH o‘zining ittifoqchilari va sheriklarini himoya qilish vakolatlariga katta zarar yetkazgan bo‘lar edi”, dedi Oq uy rahbari.
Qozog‘istonda suv toshqinidan jabrlanganlarga 1000 dan ziyodroq uy qurib beriladi
O‘zbekistondagi suv ombori to‘g‘oni o‘pirilishi natijasida boshpanasidan mahrum bo‘lgan qozog‘istonliklarga 1000 dan ziyodroq uy qurib beriladi. Jabrlanganlarga moddiy tovon ham to‘lanadi.
Qozog‘iston koronavirusga qarshi choralarga 13 mlrd dollar sarfladi
Qozog‘iston prezidenti Kasim-Jomart Tokayev koronavirus pandemiyasiga qarshi kurashga 13 mlrd dollar yoki YAIMning 8 foizdan ko‘prog‘i sarflanganini ma’lum qildi.
BAAdagi 48 qavatli osmono‘par binoda katta yong‘in sodir bo‘ldi
BAAning Sharja shahrida 48 qavatli osmono‘par binoda kuchli yong‘in sodir bo‘ldi. Ko‘p qavatli bino va eng yaqin uylarda yashovchilar evakuatsiya qilindi.
Eng ko‘p o‘qilgan xabarlar | So‘nggi yangiliklar
- Yevropa Ittifoqi Rossiyaga qarshi sanksiyalarning 16-paketi bo‘yicha kelishib oldi
- Ar-Riyodda o‘tgan Rossiya va AQSh muzokaralari: nimalar muhim?
- Tramp tahdidlari fonida Kanadaning siyosiy kun tartibi o‘zgarib ketdi — Reuters
- “Zelenskiyning reytingi — 4%”. Tramp Ukrainada saylovlar o‘tkazishga chaqirdi
Qo‘shimcha imkoniyatlardan foydalanish uchun saytda ro‘yxatdan o‘ting