Теҳронда ҲАМАС сиёсий бюроси раҳбари Исмоил Ҳания ва унинг қўриқчиси уларга қилинган ҳужум оқибатида ҳалок бўлди. Ҳания Эроннинг янги президенти Масъуд Пезешкиённинг инаугурация маросимида қатнашиши учун Теҳронга келганди.
Туркия парламенти қаровсиз итларни тутиш ва бошпаналарга жойлаштириш ҳақидаги қонунни маъқуллади. Мамлакат бўйлаб ҳужжатга қарши норозиликлар бўлиб ўтди, фаоллар бу ҳайвонлар эвтаназиясининг кучайишига олиб келади, деб ҳисобламоқда. Мухолифат қонунга суд орқали эътироз билдиришга ваъда берди.
Сурхондарё вилояти Денов туманида икки нафар фуқаро чўл тошбақасига нос чектиргани аниқланди. Уларга нисбатан БҲМнинг 3 баравари миқдорида жарима белгиланди.
Устун мавқега эгалиги тан олинган Knauf Gips Buxoro, март ойидан бери энг паст даражагача тушган доллар, мактаб ва боғча болаларида аниқланган касалликлар, «Onasini emsin» ахборот кампанияси ва бошқалар — «Газета.uz»нинг кунлик дайжестида.
Самарқанд вилояти Пастдарғом туманида 6-синфдаги синглисига севишини айтгани учун 15 ёшли болани «самосуд» қилган эркак 1,5 йилга озодликдан маҳрум қилинди.
Футбол бўйича Ўзбекистон олимпия терма жамоаси Париж Олимпиадасидаги сўнгги учрашувида Доминикан Республикаси билан дуранг ўйнади (видео, статистика).
«Ўзгидромет» синоптиклари август ойи об-ҳавоси учун дастлабки прогнозини тайёрлади. Ой иссиқ ҳаво билан бошланади, кейинчалик жазирама бироз пасаяди. Илк ўн кунликда кундузги ҳарорат +36…+39 даражада бўлади. Август ойи қуруқ келади, учинчи ўн кунликда қисқа муддатли ёмғир ёғиши мумкин.
Тошкентда кун давомида LED экранларда «Onasini emsin» ибораси акс этди ва бу шаҳарликларни шошириб қўйди. Бу Бутунжаҳон эмизиш ҳафталиги (1−7 август) учун ахборот кампаниясининг бир қисми эди. Ташаббускорлар бу иборанинг «асл маъно»сини қайтаришга қарор қилди.
Фарғона вилояти Бувайда туманидаги мактаб директори рўмол ўраб келган 7-синф ўқувчисини калтаклаб, ҳақорат қилганди. У МЖТКнинг 2 та моддаси бўйича айбдор деб топилиб, БҲМ 10 баравари миқдорида жаримага тортилди.
АҚШ доллари ўзбек сўмига нисбатан пасайишда давом этмоқда, у 12 мартдан бошлаб ўзининг минимал қийматига — 12 541 сўмгача тушди. Ўзбекистонга пул ўтказмалари, инвестициялар ҳажмининг ўсиши ва бошқа омиллар фонида миллий валюта мустаҳкамланмоқда.
БМТ Тараққиёт дастури тизимида 25 йилдан ортиқ тажрибага эга Акико Фужии БМТТДнинг Ўзбекистондаги янги доимий вакили этиб тайинланди. У аввал Мальдив оролларидаги доимий вакил ҳамда Вьетнам ва Фижидаги кўп давлат идорасида доимий вакил ўринбосари бўлиб ишлаган.
Яқинда Ўзбекистоннинг Владивостокдаги бош консули бўлган Юсуп Кабулжанов ўз вазифасини бажаришга киришди. У Приморск ўлкаси омбудсмани ва ИИВ вакиллари билан учрашди, улар билан меҳнат миграцияси соҳасида ҳамкорлик қилиш, шунингдек, фуқаролар ҳуқуқларининг бузилиши ҳолатларини муҳокама қилди.
Соғлиқни сақлаш вазири в.б. Асилбек Худаяров мактаб ва боғчаларда ўтказилган тиббий кўрик натижалари ҳақида маълумот берди. Ўқувчиларининг деярли 28 фоизида ва тарбияланувчиларнинг 26 фоизида турли хил касалликлар, жумладан, анемия, асаб тизими касалликлари ва юрак нуқсонлари аниқланган.
АҚШ Давлат департаменти ноқонуний миграцияга кўмаклашувчи сайёҳлик агентликлари ва туроператорлари раҳбарларига нисбатан виза чекловлари жорий этилишини эълон қилди.
Омбудсман идораси меҳнат қуллигидан қочган аёлнинг Ўзбекистонга қайтишига ёрдам берди. Йил бошида уни алдов йўли билан Россияга олиб кетишган, паспортини олиб қўйишган ва далада мажбурлаб ишлатишган.
Биринчи ярим йиллик якунларига кўра, аҳолининг реал даромадлари 8,6 фоизга ўсди, бу ўтган йилнинг шу даврига нисбатан юқоридир. Энг бой учта ва энг камбағал учта ҳудуд ўртасидаги аҳоли жон бошига даромадлар фарқи 2,28 баравардан 2,5 баробарга ошди.
Венесуэланинг амалдаги раҳбари Николас Мадуро ғалаба қозонган президентлик сайловларидан сўнг Каракас ва мамлакатнинг бошқа шаҳарларида минглаб одамлар намойишга чиқди. У 2013 йилдан буён шу лавозимда қолмоқда.
Тошкент шаҳрида ИИБ Миграция ва фуқароликни расмийлаштириш бўлимининг собиқ бошлиғи ва унинг шериги чет эл фуқароларига пул эвазига ноқонуний равишда ID карта ва хорижга чиқиш паспортларини расмийлаштириб келгани аниқланди. Улар 7 ва 5 йилга қамалди.
Санэпидқўмита кўча-кўйда сотилаётган музқаймоқдан заҳарланиш ҳолатлари учраётгани ҳақида огоҳлантирди. Унга кўра, бундай музқаймоқларда стафилококк бактерияси бўлиши мумкин, маҳсулот солинган аксарият идишлар санитария-гигиена талабларига жавоб бермайди.
Рақобат қўмитаси Knauf Gips Buxoro гипсокартон бозорида 40 фоиздан ортиқ улуш билан устун мавқега эга эканини маълум қилди. Энди компания устун мавқеи тан олинган компаниялар реестрига киритилиши, сўнгра монопол нархлардан фойдаланишнинг олдини олиш бўйича ҳаракатларни назорат қилиши керак.
Қўшимча имкониятларга эга булиш учун сайтда рўйхатдан ўтинг