UNICEF Ўзбекистон ҳукуматига вакциналарни сақлаш омборлари учун 500 минг доллардан кўпроқ қийматдаги 118 музлатгич, 7 минг дона термосумка ва тиббиёт ходимлари учун шахсий ҳимоя воситаларини топширди (фото).
Heritage Foundation томонидан эълон қилинган «Иқтисодий эркинлик индекси — 2022» рейтингида Ўзбекистон 55,7 балл тўплаган ҳолда 177 давлат орасида 117-ўринни эгаллади. Индекс методологиясига кўра, Ўзбекистон иқтисодиёти асосан «эркин бўлмаган мамлакатлар» гуруҳида қолди. Бундан ташқари, 119 давлатда (67,2 фоизида) пасайиш кузатилди.
Қибрай туманидаги 29-мактабда ўқувчи қизлар совуқ ҳаво бўлишига қарамай, юпун кийимда меҳмонларни кутиб олишга чиқарилди. Тошкент вилоят ХТБ тадбир мактаб томонидан эмас, балки «Олтин мерос» хайрия фонди ва «Янги йўл» маҳалласи томонидан ўтказилганини маълум қилди. Мазкур ҳолатга йўл қўйган мактаб раҳбариятига эса чора кўрилиши айтилди.
Долларнинг сўмга нисбатан расмий курси 6,86 сўмга пасайиб, 10 837,16 сўмга тенг бўлди. Шунингдек, евро ва рубль курслари кўтарилди.
Тошкент давлат техника университетидаги қурилишда ишлаган ёлланма ишчи маошини ололмаганлиги сабабли ўзини бешинчи қаватдан ташлашга уринди. Ҳодиса жойига етиб борган Олмазор ИИБ ФМБ бошлиғи музокара ўтказиб, 40 ёшдан ошган фуқарони пастга туширишга эришди. Олий таълим вазирлиги ишчига қурилиш ташкилоти маошини тўлаб берганини қўшимча қилди (янгиланди).
2022 йил январь ойида 113,2 минг дона (2021 январига нисбатан 126,4% кўп) автотранспорт воситалари давлат рўйхатидан ўтказилди. Бундай ўсишга 1 январдан автомобилларни сотиб олганлик учун йиғимнинг тўлиқ бекор қилиниши ва олди-сотди шартномасини нотариал расмийлаштиришда ундириладиган давлат божи БҲМнинг 3 баробаригача камайтирилиши сабаб бўлган.
Украина президенти Владимир Зеленский мамлакат халқига мурожаати чоғида 16 феврални Бирлик куни деб эълон қилди. Шу куни бутун мамлакат бўйлаб Украина байроғи кўтарилади, 10:00да давлат мадҳияси ижро этилади. Аҳоли хавфсизлик ҳолати ҳақида махсус онлайн-платформа орқали хабардор этиб борилади.
Россияда қолиб кетган ўзбекистонликларни мамлакатга олиб келиш учун 2 та махсус поездлар қатнови йўлга қўйилади. Поездлар 18 ва 25 февраль кунлари Волжский шаҳридан йўлга чиқади.
Аҳмад Дониш ва Фарғона йўли кўчаларини тезюрар шосселарга айлантирган Тошкент ҳокимлиги яна бир марказий кўча — Алишер Навоий кўчасига ҳам қўл узатди. Ишлар яна огоҳлантиришсиз бошлаб юборилди. Режа президентнинг шаҳар биринчи навбатда пиёдалар учун қулай бўлиши кераклиги ҳақидаги баёнотига зид келмоқда. «Газета.uz» нашрининг давлат раҳбарига мурожаати.
Божхона ходимлари томонидан Тошкент вилоятидаги «Ойбек» постида тўхтатилган юк машинасида 229,7 кг «героин» гиёҳвандлик воситаси аниқланди. Ушбу наркотик воситаларнинг Европа «қора бозорлари»даги нархи ҳозирда ўртача 12−14 млн долларни ташкил этади.
Пойтахтнинг Шайхонтоҳур туманида жойлашган «Анҳор-Локомотив» кўнгилочар ва дам олиш боғи очиқ аукционда сотувга қўйилди. 8,35 гектар майдонга эга боғнинг бошланғич нархи 376,4 млрд сўмга баҳоланган.
Фарғона вилояти Транспорт бошқармаси ходими тадбиркорга Фарғона шаҳридаги 30-автомобиль йўналишини 1 500 доллар эвазига 3 йилга бириктириб беришни ваъда қилган. Шундан 1 000 долларини олган вақтида тезкор тадбир давомида ашёвий далиллар билан ушланган.
Ҳукумат ер участкаларини хусусийлаштириш бўйча регламентни тасдиқлади. Унга кўра, Ўзбекистон фуқаролари ва юридик шахсларига ер участкаларини хусусийлаштириш бўйича давлат хизматлари ДХМ ёки Ягона интерактив давлат хизматлари портали орқали кўрсатилади.
Импорт автомобиллар учун божхона божи 15%гача пасайиши бундай автомобиллар учун умумий божни қанчага арзонлаштиради? Иқтисодчи Отабек Бакиров ушбу хабардан хурсанд бўлишга «шошилмай туриш керак» деб ёзди. Мутахассислар комбинациялашган божлардаги ҳар куб см учун махсус ставкалар бекор қилиниши кераклигини таъкидламоқда. Иқтисодчи Миркомил Холбоев «қарордан асосий фойда кўрадиганлар даромади энг юқори ва импорт автомобилларини истеъмол қиладиган бойлар», — дея изоҳ қолдирди.
Қашқадарё вилояти Ғузор туманидаги 23-сонли мактаб ҳудудида ноқонуний равишда 7 туп қайрағоч дарахти кесилганлиги аниқланди. Ҳуқуқбузарлар 2,7 млн сўм жаримага тортилди, қолаверса, 592 минг сўмлик зарар ҳам қўлланилди.
2020 йил октябридан Наманган вилояти прокурори лавозимида ишлаб келган Жаҳонгир Ҳатамов Самарқанд вилояти прокурори этиб тайинланди.
Тошкентнинг Миробод туманида пневматик милтиқ ёрдамида мушук ва итларни овлаб келган эркакка МЖТКнинг ҳайвонларга шафқатсиз муносабатда бўлиш ва қуроллардан ноқонуний фойдаланиш моддалари билан маъмурий баённома расмийлаштирилди. У 15 суткага маъмурий қамоққа олинди.
3 февраль куни пойтахтнинг Юнусобод туманида тадбиркор қурилиш учун сотиб олган ер участкасида ўсаётган дарахтларни таг қисмидан бетонлаб ташлаганди. Юнусобод туман прокуратураси ушбу ҳолат юзасидан жиноят иши қўзғатди. Гумонланувчилар максимум 3 йилгача озодликдан маҳрум қилиниши мумкин.
Фарғона водийсида метан заправкалар 15 февраль соат 13:00 дан 16 февраль 06:00 га қадар ўз фаолиятини вақтинчалик тўхтатади. «Ўзтрансгаз» компанияси бундан мақсад совуқ об-ҳаво шароитида аҳоли, истеъмолчилар ва ижтимоий соҳа объектлари, стратегик аҳамиятга эга корхоналарни барқарор табиий газ билан таъминлаш эканлигини таъкидлаган.
Уч ой ичида Ўзбекистонда электромобил тармоғини ривожлантириш стратегияси ишлаб чиқилиши кутилмоқда. Президент электромобиллар учун бутловчи қисмлар ва материаллар ишлаб чиқаришни маҳаллийлаштириш, уларга техник талаб ва стандартларни ишлаб чиқиш бўйича кўрсатмалар берди.
Қўшимча имкониятларга эга булиш учун сайтда рўйхатдан ўтинг