Сурхондарёнинг Денов туманида яшовчи фермер хўжалиги раиси тасарруфида бўлган 1 гектар ерни бошқа фуқарога 100 минг доллар эвазига сотишга келишиб, олдиндан 20 минг доллар олганда қўлга олинди. Ҳозирда ҳолат юзасидан тергов ҳаракатлари олиб борилмоқда.
Фуқаролар билан мулоқот чоғида ҳақоратли сўзлар ишлатиб, тадбиркорга сўкингани учун Ангрен ҳокими Алишер Раимовга «ҳайфсан» интизомий жазоси берилди. Вилоят ҳокимлиги мансабдорнинг давлат хизматчиси касб этикасини бузгани ва мансаб ваколатларини суиистеъмол қилганини тан олди.
Ўзбекистон халқ шоири Абдулла Орипов ҳақидаги бадиий фильмнинг Ўзбекистондаги тасвирга олиш ишлари якунланиб, шоир умрининг сўнгги ойларини ўтказган АҚШ шаҳарларида давом этяпти. Филм унинг қизи Мавлуда Орипова хонадонида ва у сайр қилишни жуда яхши кўрган Тинч океани соҳилларида суратга олиняпти.
Қўрғонтепа тумани тиббиёт бирлашмасининг жонлантириш бўлимида ётган эркак чироқ ўчиб қолиши сабаб вафот этгани ҳақида хабар берилди. Энергетика вазирлиги буни рад этиб, ҳолатга изоҳ берди.
Октябрь ойида Ўзбекистонда 112,7 мингта автомобиль сотилди. Бу сентябрь ойига нисбатан 8 фоизга кам. Иккиламчи бозорда сотувларнинг пасайиши бирламчи бозорга қараганда камроқ кескинлашиб, 1,4 фоиз камайишни қайд этди.
Сиёсатшунос Камолиддин Раббимов Европарламент Россияни «террор ҳомийси бўлган давлат» сифатида тан олганини изоҳлар экан, «Путин Россияни империяга айлантиришни орзу қилиб, бор қудратига ҳам тарихий зарба бериб қўйди», деди. Унинг фикрича, «Россия бу вазиятдан заиф ва ўта заиф ҳолатда чиқади».
Публицист ва блогер Шокир Шарипов Ўзбекистон ички ишлар вазири Пўлат Бобожонов истеъфосини талаб қилиб, пойтахтда бир кишилик пикет уюштирди. У «Газета.uz»га берган интервьюсида бунга «ичимдаги исён мажбур қилди», дея таъкидлади.
Сўнгги 7 кунда 2310 киши ковид юқтириб олганлар билан алоқада бўлганликда гумонланиб, карантинга олинди. Шифохоналарда эса 539 нафар бемор даволанмоқда. «Ҳозирда грипп ва ўткир респиратор инфекциялар ковид билан микс-инфекция касаллиги сифатида аниқланмоқда», — деди СЭС раҳбари ўринбосари.
Президент қарори билан «Ўзбеккосмос» агентлигига коинот тасвирларини таҳлил қилиш йўли билан қишлоқ ва сув хўжалиги, ер муносабатлари, экология, геология соҳасидаги ҳуқуқбузарликларни аниқлаш вазифаси юклатилди.
ЖЧ-2022нинг яна бир кунида E ва F гуруҳидан жой олган Испания — Коста-Рика ва Белгия — Канада баҳслари бўлиб ўтди. Биринчи баҳсда испанияликлар тотал устунлик қилиб, 7 гол уриб рекорд ҳисобни қайд этишган бўлишса, иккинчи баҳсда аслида Белгиядан кучлироқ ўйин кўрсатган Канада 0:1 ҳисобида ютқазди.
Бухоро вилояти Қоракўл туманида Nexia-2 ағдарилиб, пиёдалар йўлакчасида кетаётган икки нафар болани уриб юборди. Оқибатда болалардан бири тан жароҳати билан шифохонага ётқизилди. ЙТҲ юзасидан терговолди суриштирув ҳаракатлари олиб борилмоқда.
Банкларда 24 ноябрь куни 1 АҚШ доллари 11 180 — 11 260 сўмдан сотиб олинмоқда, сотиш курси эса 11 280 сўмгача кўтарилди.
Молия вазири қуйи палата сессиясида 2022 йилдаги давлат бюджети ҳисобидан ХТВга қўшимча 922 млрд сўм ажратилишини маълум қилди. Шундан 106 млрд сўм Қорақалпоғистон ва Хоразмда 1−4-синф ўқувчиларини бепул овқатлантириш учун, 400 млрд сўм эса дарслик ижарасини бюджетдан қоплаш учун йўналтирилади.
Молия вазири Тимур Ишметов «2022 йил учун Давлат бюджети тўғрисида»ги қонунга ўзгартириш киритиш бўйича муҳокамада бюджет тақчиллиги 3%дан 4%га оширилишини маълум қилди. Аввалроқ ҳукумат лимитга мослаша олмаётгани учун депутатлардан бюджет тақчиллигининг чекланган миқдорини оширишни сўраганди.
Тошкентда трамвай йўлларини қурадиган Франция компанияси, ёқиб юборилган 34,2 минг қути тамаки, яна дарахткушлик, «ТТЗ»дан «Машинасозлар» метросигача экспресс автобус, 800 млн еврога 17 та самолёт сотиб олиниши, $40 млрддан ошган ташқи савдо айланмаси ва бошқалар — «Газета.uz»нинг кун дайжестида.
Ҳукумат қарори билан Стратегик ривожланиш агентлиги раҳбарининг барча ўринбосарлари, хусусан, Рустамхон Азизов, Азиз Гафуров ва Алексей Сим ўз лавозимидан озод этилди. Ушбу агентлик сентябрь ойида президент ҳузуридаги Стратегик ислоҳотлар агентлиги сифатида қайта ташкил этилган эди.
23 ноябрь куни E гуруҳидан жой олган Германия — Япония баҳсида 1:2 ҳисоби қайд этилди. Япония «камбэк» амалга оширди ва иродали ғалабага эришди. F гуруҳидаги Марокаш — Хорватия баҳсида эса ҳисоб очилмади — 0:0.
Европарламент Россия қўшинларининг Украинадаги тинч аҳолига нисбатан ваҳшийликлари учун Россияни терроризм ҳомийси сифатида тан олди. Шунингдек, депутатлар Европа кенгашини Россиянинг «Вагнер» хусусий ҳарбий компанияси ва «Қодировчилар» полкини террорчи ташкилотлар рўйхатига киритишга чақирди.
Икки қизни Индонезияга фоҳишалик қилиш учун юборишни режалаштирган икки фуқаро 5 йилу 1 ойдан қамоқ жазосига ҳукм қилинди.
Андижон вилояти Жалақудуқ туманида оёқлари комбайннинг янчувчи қисмига кириб кетган 35 ёшли эркак шифохонада вафот этди. Ҳолат юзасидан терговга қадар текширув ҳаракатлари олиб борилмоқда.
Қўшимча имкониятларга эга булиш учун сайтда рўйхатдан ўтинг