Дам олиш кунлари ёғингарчилик кутилмайди
Ўзбекистонда 2−3 декабрь кунлари ҳаво ўзгариб туради, ёғингарчилик кутилмайди. Ҳарорат аста-секин кўтарилиб, кундузи +18 даражагача, кечаси +7 даражагача илиқ бўлади.
ДХХ ҳудудларда фуқароларни АҚШга ноқонуний юбориш билан боғлиқ ҳолатларга чек қўйди
ДХХ Қўқон, Самарқанд шаҳарлари ва Пастдарғом туманида АҚШга ноқонуний юбориш билан боғлиқ ҳолатларга чек қўйди. Хусусан, бир ҳолатда 25 минг доллар эвазига Мексика орқали Америкага юборишни ваъда қилган шахс пулдан 15 минг доллар олган вақтида қўлга тушди.
Исроил Ғазода жанговар ҳаракатларни қайта бошлади
Олти кун давом этган сулҳдан сўнг Исроил Ғазо секторига зарба берди, оқибатда бир неча киши ҳалок бўлди. Жанговар ҳаракатларни қайта бошлашга ҲАМАС биринчи бўлиб ракета ҳужуми уюштиргани, бу эса сулҳга зид экани сабаб сифатида кўрсатилди.
Дубайда COP28 саммити бошланди
Дубайда (БАА) БМТ халқаро иқлим саммити — COP28 очилди. 2023 йилда унда 190 дан ортиқ давлатдан 70 мингдан ортиқ киши иштирок этиши режалаштирилган. Конференциянинг асосий мақсади инсониятнинг Париж келишуви мақсадларига эришиш йўлидаги прогрессини таҳлил қилишдан иборат.
Perfectum янги йил совғаларини таклиф қилмоқда
Perfectum мобил оператори янги абонентлар учун Max Voice янги чексиз овозли тарифи, шунингдек, ярим йиллик Qulay New тарифлари рақамлари учун 90% чегирма ва «2024 Янги йил пакетлари» ҳақида эълон қилди.
Бухорога 20 та янги автобус олиб келинди
Бухоро шаҳрига Хитойнинг 20 та янги Zhang Tong автобуси келтирилди, улар 5 декабрдан йўналишларга чиқарилади. 2024 йил июлигача яна 80 та шундай автобус етказиб бериш бўйича музокаралар олиб борилмоқда.
Тошкентда ўқувчи электр токи уриши оқибатида вафот этгани юзасидан жиноят иши қўзғатилди
Мирзо Улуғбек туманидаги 99-мактабнинг 8-синф ўқувчиси электр токи уриши оқибатида вафот этгани юзасидан Жиноят кодексининг икки моддаси бўйича жиноят иши қўзғатилди.
Тошкентда тадбиркор соат 22:30 дан кейин кафесига аёлларни киритмагани учун жаримага тортилди
Тошкентдаги кафе менежери ва унинг ходими соат 22:30 дан кейин аёлларни муассасага киритмагани учун базавий ҳисоблаш миқдорининг 20 баробари (ҳар бири 6,6 миллион сўмдан) миқдорида жаримага тортилди. Улар жинс бўйича камситишни тарғиб қилиш моддаси бўйича жавобгарликка тортилган.
Ўзбекистонлик курашчилар Туркманистонда ўтган ЖЧда 9 та медални қўлга киритди
Туркманистонда кураш бўйича ўтган XIV жаҳон чемпионатида ўзбекистонликлар 9 та медални қўлга киритиб, умумжамоа ҳисобида 1-ўринни эгаллади.
Yandex Go хизмати Ўзбекистон ҳудудидаги солиқ резиденти сифатида ишлай бошлади
Давлат солиқ қўмитаси 1 декабрдан бошлаб Yandex Go хизмати Ўзбекистон ҳудудида солиқ резиденти — «YandexGo UB» МЧЖ томонидан тақдим этилишини маълум қилди. Аввалроқ қўмита Yandex Go`дан солиқ резиденти сифатида рўйхатдан ўтиб, солиқларни тўлаш ва мижозларга фискал чек тақдим этишни талаб қилганди.
Жаҳон банки Ўзбекистонга 50 млн доллар миқдорида имтиёзли кредит ажратади
Жаҳон банки Ижрочи директорлари кенгаши «Ўзбекистонда рақамли инклюзивлик» лойиҳасини амалга ошириш учун 50 млн доллар имтиёзли кредит ажратишни маъқуллади. Лойиҳа орқали 9000 га яқин ёшлар, шу жумладан, 360 нафар ногиронлиги бўлган шахсларни ITES компанияларида иш билан таъминлаш режалаштирилган.
Қумқўрғон ҳокими фуқародан ҳадя сифатида «Equinox» олиш бўйича фармойишини бекор қилди
Сурхондарёнинг Қумқўрғон тумани ҳокими ҳокимлик балансига фуқародан «Equinox» машинасини ҳадя сифатида қабул қилиш бўйича фармойиш имзолаганди. Антикоррупция агентлиги тақдимномасидан кейин ҳоким эски фармойишини бекор қилди. Икки ҳужжат ҳам E-qaror тизимида яширин ҳолда турибди.
«Казтрансойл» 2024 йилда Россия нефтининг Ўзбекистонга транзитини уч баравар оширмоқчи
Қозоғистоннинг магистрал нефть қувури миллий оператори «Казтрансойл» 2024 йилда Россия нефтини Ўзбекистонга транзит қилишни уч бараварга оширмоқчи. Етказиб бериш ҳажмини 154 минг тоннадан 500 минг тоннагача кўпайтириш режалаштирилган.
«Барча нарсани 7 эмас, 77 марта ўлчаш керак». Энергетика вазири — Ўзбекистонда АЭС қурилиши ҳақида
Ўзбекистон «Росатом» билан АЭС қуриш масаласини муҳокама қилишда давом этмоқда, деди Энергетика вазири Жўрабек Мирзамаҳмудов. Унинг айтишича, нафақат Россия, балки бошқа мамлакатларнинг ҳам тажрибаси ўрганилмоқда. «Росатом» раҳбари аввалроқ томонлар «шартнома имзолашдан йироқда эмас»лигини айтганди.
МТРКга ажратилган €22,5 млн миқдордаги кредит давлат бюджети ҳисобидан қопланади
Президент МТРКга ажратилган кредит бўйича кечиктирилган тўловлар учун ҳисобланган пеняларни ҳисобдан чиқариш, шунингдек, уни қайтаришда давлат бюджети улушини оширишга оид қарорни имзолади. Дастлаб 22,5 млн евро қарзни тенг тақсимлаш режалаштирилган бўлса, энди 93 фоизи бюджет ҳисобидан қопланади.
Ўзбекистон ва Буюк Британия ташқи ишлар вазирлари савдони фаоллаштириш масалаларини муҳокама қилди
Ўзбекистон ташқи ишлар вазири Бахтиёр Саидов Шимолий Македонияда бўлиб ўтаётган ЕХҲТ Ташқи ишлар вазирлари кенгаши йиғилиши доирасида Буюк Британия ташқи ишлар бўйича давлат котиби Девид Кемерон билан учрашди.
Тошкент метросининг «Халқлар дўстлиги» бекатида Palm ID тўлаш тизими ишга туширилди
Тошкент метросининг «Халқлар дўстлиги» бекатида илк маротаба кафтни сканерлаш орқали тўловни амалга ошириш тизими (Palm ID) ишга туширилди. Ундан фойдаланиш учун ATTO иловасида шахсий маълумотларни киритиш зарур.
Фарғонада оҳак цехи 1 млрд сўмлик газдан ноқонуний фойдалангани аниқланди
Ўзбекистон туманида оҳак цехи 1 млрд сўмлик газдан ноқонуний фойдалангани аниқланди. Ҳолат бўйича жиноят иши қўзғатилди.
Ўзбекистонда бу йил қишда юзага келиши мумкин бўлган газ ва электр тақчиллиги қандай қопланади?
Ўзбекистон энергетика вазири қишда юзага келиши мумкин бўлган энергия ресурслари танқислигини қандай қоплашни режалаштираётгани ҳақида гапирди. Режага кўра, мазутдан электр ишлаб чиқарилади, йирик корхоналарни тунги иш режимига ўтказилади, АГТКШларга газ етказиб бериш қисқартирилади.
Сув тежовчи технологияларни жорий этишни кредитлаш бўйича очиқ электрон платформа ишга туширилади
Ўзбекистонда сув тежовчи технологияларни жорий этишда янгича молиялаштириш тизимига ўтилиб, кластер ва фермерларга бу учун 2 йиллик имтиёзли давр билан 5 йилга 14 фоизли кредит ажратилади. Банк ва таъминотчилар билан шартнома имзолаш учун очиқ электрон платформа ишга туширилади.
Қўшимча имкониятлардан фойдаланиш учун сайтда рўйхатдан ўтинг