Ўзгидромет раҳбари Шерзод Хабибуллаев Орол денгизи фалокати натижасида Марказий Осиёда иқлим ўзгариши дунё кўрсаткичларидан 2 баробар жадалроқ кечаётганини таъкидлади. Бу музликлар эриши, чанг бўронлари даврийлиги ва уларнинг ортиб бориши, ерларнинг деградацияга учраши, сув ресурсларининг тақчиллиги каби салбий кўринишларда намоён бўлмоқда.
Франциянинг янги бош вазири лавозимига Элизабет Борн тайинланди. У Франция ҳукуматига раҳбарлик қилган иккинчи аёл сифатида тарихга кирди.
Президент қарорига кўра, Ўзбекистоннинг 7 та ҳудудида Қрим-Конго геморрагик иситмаси билан касалланиб тузалганларнинг қон плазмаси банки ташкил этилади. Қрим-Конго геморрагик иситмаси — трансмиссив ва гемоконтакт орқали юқувчи ўта хавфли касаллик ҳисобланади.
Президент қарори билан ҳар йили 1 млн нафаргача фуқаро вирусли гепатит Б ва C турларига скрининг текширувларидан ўтказилади. Шунингдек, гепатит C билан касалланган 10,5 минг нафар бемор даволанади. Қолаверса, нодавлат тиббиёт ташкилотларига қон билан ишлайдиган ходимларини гепатит Б инфекциясига қарши эмлаш мажбурий этиб белгиланмоқда.
АҚШ элчиси Дэниел Розенблюмнинг таъкидлашича, Ўзбекистон 2016 йилдан буён диний эркинликни таъминлаш борасида катта ютуқларга эришди, бироқ сўнгги пайтларда «эски даврларни акс эттирувчи» ҳолатлар ҳам кузатилмоқда. «Орқага кетмайлик, олдинга кетайлик, янада бағрикенгроқ жамият сари ҳаракат қилайлик», — деди элчи.
Тошкент ва Чирчиқ шаҳарларидаги «Меҳрибонлик» уйлари тарбияланувчиларидан иборат терма жамоа Санкт-Петербург шаҳрида болалар уйлари жамоалари ўртасида ўтказилган мини-футбол бўйича XVII халқаро турнирда биринчи ўринни эгаллади.
Тожикистоннинг Тоғли Бадахшон автоном вилоятида намойишчилар вилоят раҳбари ва Хоруғ ҳокимининг истеъфосини талаб қилишди. Прокуратура митингни мамлакат хавфсизлигига путур етказиш мақсадида ўтказилган «ноқонуний ҳаракат» деб атади.
Конституцияга ўзгартириш киритишни таклиф қилган партиялар, динни терроризм ва экстремизм билан боғлаш хатолигини айтган Содиқ Сафоев, Ўзбекистонга учиб ўтиши мумкин бўлган чигирткалар, Сурхондарёда калтакланган ўқувчи ортидан 5 кишининг ишдан кетгани, янги йил куни «ўт ўчиргич»ни портлатганларга ўқилган суд ҳукми, Сурхондарё ҳокимига ўринбосар бўлган ДХХ ходими ва бошқалар — «Газета.uz»нинг 16 майдаги энг муҳим хабарлари дайжестида.
Марказий банк имтиёзли кредитлаш амалиётининг макроиқтисодий самарадорлиги пастлиги ва ушбу амалиёт самарали пул-кредит сиёсати учун жиддий муаммолардан бири эканлигини қайд этди. 2019 йилдан бошлаб уларни бозор фоизларига яқинлаштириш учун ставкалар кўтарила бошлади, бироқ, МБ асосий ставкаси ўсиши билан ўртадаги фарқ яна ошди.
Антимонополия қўмитаси 3 ой ичида 10 та ҳолатда инсофсиз рақобатга йўл қўйилганини аниқлади, қолаверса, тил бириктириш ва картель келишувлар бўйича жами 4 та ҳолат ўрганиб чиқилди. Натижада монопол корхоналар тартибга солинадиган нархларни нотўғри қўллаши ортидан олган 3,6 млрд сўмдан ортиқ асоссиз даромади истеъмолчиларга қайтарилди. Давлат харидлари доирасида эса 985 та рақобатга зид ҳолат аниқланди.
Қашқадарё вилояти ҳокими Муротжон Азимов халқ депутатлари вилоят Кенгашига депутат этиб сайланди.
Сенат раисининг биринчи ўринбосари Содиқ Сафоев терроризм ва экстремизмни дин билан боғлаш зинҳор мумкин эмаслигини таъкидлади. «Ўрнашиб қолган стереотиплар ва янглиш фикрларга қарши курашиш — умумий вазифамиздир», — деди у. Сенаторнинг сўзларига кўра, халқаро терроризмнинг тубида иррационал, олдинги даврлардан мерос қолган дунёқараш ётибди, уларга қарши кураш эса маънавият, талим ва мулоқот эвазига олиб борилиши лозим.
Қибрай туманида фуқаро «Микрокредитбанк» Тошкент вилояти филиали кредит бўлими бошлиғи билан 1 млрд сўм кредит маблағини талон-торож қилганликда гумонланмоқда. Шунингдек, Сурхондарёнинг Узун ва Денов туманларида ҳам фуқаролар имтиёзли кредит маблағларини талон-тарож қилгани атилмоқда.
Шавкат Мирзиёев Фарғонага сафари чоғида «Янги Ўзбекистон» массиви қурилишини бориб кўрди. Бу ерда қарийб 300 та кўп қаватли (7 дан 25 қаватгача) уйлар, ҳиёбон ва кўл, мактаб ва болалар боғчалари, саноат зонаси ва бошқа объектлар қурилиши режалаштирилган. Қурилиш вазирининг биринчи ўринбосари Давронжон Одилов массивни қурилаётганлари орасида «энг яшил ва экологик массив» деб атади. Коммуникация эса махсус туннелдан ўтказилади.
Сурхондарёдаги 4-мактабда ўқувчи калтакланиши 27 апрель куни содир бўлгани ва бунинг ортидан мактаб директорининг икки ўринбосари, синф раҳбари ва инглиз тили фани ўқитувчиси ишдан бўшатилгани маълум қилинди. Ижтимоий тармоқларда видео тарқалгач, мактаб директори ҳам лавозимидан озод қилинди. Бандихон туман ИИБ калтак еган ўқувчи ва унинг айрим синфдошлари безорилиги юзасидан ҳам суриштирув ўтказмоқда.
1 январь куни тонгда пойтахтдаги «Самарқанд дарвоза» мажмуаси яқинида «ўт ўчиргич» мосламасини портлатган 8 нафар шахсга нисбатан суд ҳукми ўқилди. Айбланувчиларнинг энг каттаси 25 ёш, энг кичиги эса — 19 ёшда. Жабрланувчи фуқаро воқеа оқибатида оёғидаги бир бармоғидан айрилганини айтди. Судланувчилардан бири эса «ўт ўчиргич»ни қандай ясагани ҳақида сўзлаб берди.
Марғилонда фуқарони уч йил давомида алдаб, АҚШ ёки Жанубий Кореяга ишга жўнатишига ишонтириб, 12 700 доллар маблағини қўлга киритган шахс ушланди. У 500 долларни қайтариб, ўз айбига иқрор бўлгани айтилмоқда. Унга нисбатан жиноят иши қўзғатилди.
Финляндия НАТОга аъзо бўлиш қароридан сўнг, худди шу мақсадни Швециянинг ҳукмрон партияси ҳам билдирди. Иттифоққа қўшилмаслик Швецияни заиф аҳволга солиб қўяди, деган фикрда бош вазир Магдалена Андерссон.
Жаҳон банки прогнозига кўра, Россияга қарши санкциялар ва Украинадаги инқироз МДҲ давлатлари, шу жумладан Ўзбекистонда пул ўтказмаларининг қисқаришига олиб келади. Шунингдек, 2022 йилда Россия ЯИМ тушиши ва рублнинг долларга нисбатан қадрсизланиши мигрантларнинг бандлиги ва даромадларини камайтириши мумкин, бу эса МДҲда қашшоқлик муаммосини янада кучайтиради.
ЎзЛиДеП ва «Миллий тикланиш» фракцияси аъзолари Конституцияга ўзгартириш ва қўшимчалар киритиш жараёнини бошлаш таклифи билан чиқишди. Партия депутатлари ислоҳотлардан келиб чиқиб, Конституцияни бугунги реал воқеликка мослаштириш зарур деб ҳисоблайди. Аввалроқ, Шавкат Мирзиёев Конституцияга 10 дан ортиқ ҳолат бўйича ўзгартиришлар киритишни таклиф қилганди.
Қўшимча имкониятларга эга булиш учун сайтда рўйхатдан ўтинг