14 июнь куни Ўзбекистонда содир бўлган энг муҳим хабарлар дайжести
Миллий тест тизими атрофидаги можаролар, Шавкат Мирзиёевнинг ҳафта давомидаги иш графики, Сирдарё ҳокимлиги масъулларининг раққосалар билан видео учун ишдан кетиши, каттақўрғонлик солиқчи воқеаси — «Газета.uz»нинг 14 июндаги энг муҳим хабарлари дайжестида.
«Қоидабузарликни тўхтатиш учун виждонимни сотишга ҳам тайёрман». Адлия вазири — ЙТҲларни суратга олиш ҳақида
Адлия вазири йўл ҳаракати қоидаларини бузаётганларни суратга олганларни рағбатлантириш тизими ҳақида: «Агар жамоат жойида одам ноқонуний хатти-ҳаракат билан шуғулланаётган бўлса, [қоидабузарликни тўхтатиш учун] керак бўлса, виждонимни сотишга ҳам тайёрман», — дея тушунтирди. У ҳуқуқбузарликлар ҳақида хабар бераётганларни ҳароқат қилмасликка чақирди ва ҳозиргидек тинч замонда йилига минглаб одамлар йўлларда ўлиб кетаётганини эслатиб ўтди.
Каттақўрғонлик солиқчи воқеаси: марҳумнинг яқинлари унга куч ишлатилганлигини айтмоқда. Шифокор эса марҳумнинг танасида жароҳат бўлмаганлигини айтмоқда
Самарқанд вилоятида ЙПХ ходимлари томонидан қўлга олиниш чоғида вафот этган туман солиқ инспекцияси бошлиғи ўринбосарининг иши бўйича суриштирувлар давом этмоқда. Марҳумнинг қариндошлари унинг икки қўлида бармоқ излари, бўйнида ва юзида шилинган жароҳатлар борлигини айтишмоқда. Жасадни текширган шифокор эса унинг танасида жароҳатлар кўрмаганлигини, фақатгина ўнг кўз атрофида кичкина шилинган жойи бўлганлигини таъкидлади.
Долларнинг расмий курси кетма-кет бешинчи бор кўтарилди
Долларнинг расмий курси 11,96 сўмга кўтарилди ва жами 10 609,00 сўм этиб белгиланди. Рубль ва евро курслари эса бироз пасайди.
Интернетда тарқалган видео ортидан Сирдарё тумани ҳокими ўринбосари ишдан кетди
Ижтимоий тармоқларда раққосалар билан бирга видеоси тарқалган Сирдарё тумани ҳокимининг ўринбосари Нурали Мирзаев ва туман ободонлаштириш бошқармаси бошлиғи Нозим Муратов ўз аризасига биноан эгаллаб турган лавозимидан озод этилди.
«Отабек Сатторий иши»: Апелляция шикояти Самарқандда кўриб чиқилади
Сурхондарёлик блогер Отабек Сатторий иши бўйича апелляция шикояти Самарқанд вилояти судида кўриб чиқилади. Унинг адвокати ишни кўриб чиқиш жойини ўзгартиришни сўраб, Олий судга ариза киритди.
2021 йилги Ҳаж мавсуми ҳам хорижий зиёратчиларсиз ўтади
Саудия Арабистони 2021 йилги Ҳаж мавсумини хорижий зиёратчиларсиз, фақат маҳаллий аҳоли учун ташкил этилиши бўйича қарорни қабул қилди. Бу Саудия Арабистонидаги эпидемиологик вазиятнинг кескинлашуви билан боғлиқ. Ҳажга боришни режалаштирган ўзбекистонликларнинг навбати кейинги мавсум учун сақлаб қолиниши маълум қилинди.
Москва ва Санкт-Петербургда коронавирус сабабли чекловлар кучайтирилди
Москвада эпидемиологик вазиятнинг ёмонлашгани сабабли 15−19 июнь дам олиш кунлари деб эълон қилинди, 20 июнга қадар ҳайвонот боғлари ва савдо марказларидаги фудкортлар ёпилди, ресторан ва кафелар кечки пайт ишламайди. Талабалар имтиҳонларни онлайн топширишади. Шунга ўхшаш чекловлар, фақат дам олиш кунларисиз, Санкт-Петербургда ҳам жорий қилинди.
Тозалаш иншоотларидан таралаётган бадбўй ҳид туфайли 22 кишига нисбатан иш очилди
Тошкентда оқова сувларни тозалаш иншоотларига техник сувларни оқизиш ҳолати бўйича корхона ва ташкилотларнинг 22 нафар масъулига нисбатан маъмурий иш қўзғатилди. Аввалроқ, айни шу сабаб Сергели туманида бадбўй ҳид таралаётгани ҳақида ёзган эдик. Бир қатор корхоналарнинг давлат экологик экспертизаси амал қилиш муддатини олдиндан тўхтатиш ва шаҳар канализация тармоғидан узиш мақсадида судга даъво аризаси киритилди.
Жомбойдаги мактабда синфхоналарни ўқувчилар таъмирлаётгани айтилмоқда (фото)
Жомбой туманидаги 28-мактабнинг 7−11-синфларида таҳсил олувчи айрим ўқувчилар ўз синфхоналарини таъмирлаш ишларига жалб қилингани айтилмоқда.
Ҳафтанинг биринчи ярмида иссиқ ҳаво пасаяди
Яқин кунларда иссиқлик Қозоғистондан келадиган салқин ҳаво массаси таъсирида +32…+35 даражагача пасаяди. Ҳафтанинг иккинчи ярмида ҳаво ҳарорати яна кўтарила бошлайди.
Жаҳон банки Ўзбекистон шаҳарларини ривожлантиришга $100 млн ажратади
Жаҳон банки Қашқадарё ва Сурхондарё вилоятларидаги шаҳарларнинг муниципал хизматлари ва инфратузилмаларини яхшилаш ишлари учун $100 млн ажратади.
Раққосалар билан видео учун Сирдарё ҳокимлиги масъулларига ишдан бўшатиш каби қатъий чора қўлланилиши айтилди
Сирдарё вилояти ҳокимлиги туман мутасаддиларига ресторандаги раққосалар билан видео учун ишдан бўшатиш каби қатъий чора қўлланилишини қайд этди. Уларга «жамиятда юриш-туриш қоидаларига амал қилган ҳолда давлат хизматчиси сифатида намуна кўрсатишлари лозимлиги» эслатиб ўтилди.
Шавкат Мирзиёев ҳафта охирида Андижонга боради
Президнет шу ҳафта олий таълим соҳасидаги ислоҳотлар ва жорий йилги қабул жараёнига тайёргарлик бўйича видеоселектор йиғилиши ўтказади. Давлат раҳбари 17−18 июнь кунлари Андижон вилоятига боради.
UzLITI Engineering Ўзбекистонда йирик саноат объектлари қандай лойиҳалаштирилиши ҳақида сўзлаб берди
Alter Ego йирик инжиниринг компанияси — UzLITI Engineering фаолияти, лойиҳалари ва режалари ҳақидаги фильмни тақдим этди.
Кеча Ўзбекистоннинг 13 та ҳудудида 303 нафар фуқарода коронавирус аниқланди
Кеча Ўзбекистоннинг 13 та ҳудудида 303 нафар фуқарода коронавирус аниқланди. Шунингдек, сўнгги кун ичида 317 нафар бемор касалликдан соғайиб, Ўзбекистонда соғайиш кўрсаткичи 96 фоизни ташкил этмоқда.
Нафтали Беннет Исроилнинг янги бош вазири бўлди
Исроил парламенти мамлакатнинг янги коалицион ҳукуматини тасдиқлади. Унга кўра, 12 йил давомида Исроилнинг бош вазири бўлган Биньямин Нетаньяху ўз лавозимини тарк этди. «Ямина» партияси раҳбари Нафтали Беннет мамлакат бош вазири бўлди. Партиялар орасидаги келишувга кўра, у икки йилдан сўнг ўрнини бошқа партия етакчисига бўшатиб бериши керак бўлади.
Ўзбекистондаги мобил алоқа абонентлари сони 27 миллионга яқинлашди
Ўзбекистонда 1 апрель ҳолатига кўра, мобил алоқа тизимига уланган абонентлар сони 26 млн. 953,5 мингтани ташкил этган. Шу жумладан, аҳолида 24 млн. 795,4 мингта абонентни ташкил этган.
Миллий тест тизими атрофидаги можаролар: Бухоро ва Наманганда тест саволлари олдиндан тарқалиб кетган
«Газета.uz» умумтаълим фанлари бўйича миллий тест тизими атрофидаги можароларни ўрганди. Бухоро ва Наманган вилоятларида тест топшириқлари имтиҳондан олдин тарқалиб кетган.
Спорт соҳасидаги энг муҳим хабарлар ҳафталик дайжести
Ўзбекистон терма жамоасининг ЖЧ-2020 саралашидаги ўйинлари, Шоҳжаҳон Эргашевнинг антиқа ғалабаси, Европа чемпионати ва унинг атрофидаги жараёнлар, ҳоккей бўйича Канаданинг Жаҳон чемпионлиги — «Газета.uz» нинг ҳафталик спорт янгиликлари дайжестида.
Қўшимча имкониятлардан фойдаланиш учун сайтда рўйхатдан ўтинг