Молдовадан 100 га яқин ўзбекистонликлар эвакуация қилинди
Украинани тарк этган 98 нафар Ўзбекистон фуқароси Бухарест (Руминия) аэропорти орқали Молдовадан эвакуация қилинди. Яна бир рейс 11 март куни Польшадан амалга оширилиши режалаштирилган. У ерда 200 дан ортиқ ўзбекистонликлар қолмоқда.
Россияда бизнес вакилларига $5000 дан ортиқ пул ечиш тақиқланди
Россия Марказий банки янги валюта чекловларини жорий қилди. 10 сентябрга қадар бизнес вакилларига 5 минг доллар ёки шу миқдор эквивалентидаги евро, япон иени ва фунт стерлингда пул ечиш тақиқланади. Хорижий компаниялар ёки тадбиркорлар эса ушбу валюталарни умуман ечиб ололмайди.
Қўқон шаҳар ҳокимининг биринчи ўринбосари 5 ярим йилга қамалди
Суд Қўқон шаҳар ҳокимининг биринчи ўринбосарига 5 йил 6 ойга озодликдан маҳрум қилиш жазосини тайинлади. У 2021 йилнинг августида аукционда тадбиркорнинг фойдасига қарор чиқартириб бериш эвазига 180 минг доллар талаб қилиб, шундан 10 минг долларни олганида қўлга тушганди.
10 март куни Ўзбекистонда содир бўлган энг муҳим хабарлар дайжести
Ўзбек пахтасига бойкотни бекор қилган Cotton Campaign, Украина ва Афғонистонга ёрдам бергани учун Ўзбекистонга миннатдорчилик билдирган АҚШ, 1 майдан йўлга қўйиладиган «Автомобиль тарихи» хизмати, алиментдан қарзи борларга автомобиль ҳайдаш ва уйланиш тақиқланиши мумкинлиги, Молдовадаги ўзбекистонликлар Бухарест орқали эвакуация қилиниши ва бошқалар — «Газета.uz» нинг 10 мартдаги энг муҳим хабарлари дайжестида.
Энди умра зиёратчиларидан ПЗР-тест маълумоти талаб этилмайди
Дин ишлари бўйича қўмита хабарига кўра, Саудия Арабистонига сафар қилаётган зиёратчилар учун манфий ПЗР-тест маълумотини тақдим этиш тартиби бекор қилинди. Энди сафарга борувчилар фақат коронавирусга қарши эмланган бўлиши лозим.
Янги турар жойларнинг яримертўлаларига яшаш хонадонларини жойлаштиришга рухсат берилди
Қурилиш вазирлиги шаҳарсозлик меъёрларига ўзгартишлар киритиб, янги кўп қаватли уйларнинг яримертўлаларига яшаш хонадонларини жойлаштиришга рухсат берди. Бироқ бунинг учун участкадаги ер ости сувлари даражаси, иссиқлик ҳимояси, ёритилиш даражаси, эвакуация ва бошқалар билан боғлиқ қатор талаблар мавжуд.
Мораторийга қарамасдан Фарғонада 3 туп чинор кесиб кетилди
Мораторий эълон қилинганига қарамай Қўқон шаҳрида фуқаро рухсатсиз 3 туп чинор дарахтини кесиб ташлагани аниқланди. Давлат экология қўмитаси бунинг оқибатида табиатга 103 млн сўмдан кўпроқ зарар етказилганини маълум қилди.
Cotton Campaign ўзбек пахтасига бойкотни бекор қилди
Cotton Campaign коалицияси Ўзбекистон пахтасига бойкотни бекор қилди. Мазкур қарор 2021 йилда мамлакатда пахта йиғим теримида болалар меҳнати ва мажбурий меҳнатга йўл қўйилмагани муносабати билан қабул қилинди. Илк бор ўзбек пахтасига 2009 йилда бойкот эълон қилинганди.
«Янги Наманган» шаҳарчаси қурилишининг иккинчи босқичида 171 та кўп қаватли уйлар бунёд этилади
«Янги Наманган» шаҳарчаси қурилишининг иккинчи босқичида 20 минг хонадонга эга 171 та кўп қаватли уй барпо этиш режалаштирилмоқда. Президент уйларни зилзилага бардошлилиги ва сифатини таъминлаш, уларнинг лойиҳаси юзасидан аҳолининг фикрларини тинглаш бўйича топшириқ берди. Қолаверса, вилоятда «Янги Ўзбекистон» боғини қуриш ишлари ҳам бошлаб юборилгани айтилди.
Ўзбекистоннинг тоғли ҳудудларида сел келиш хавфи эълон қилинди
Ўзгидромет 11−15 март кунлари кучли ёмғирлар ёғиши туфайли 9 та вилоятнинг тоғ олди ва тоғли ҳудудларида сел келиш хавфини эълон қилди. Аҳоли ва ҳайдовчилардан эҳтиёт чораларига амал қилиш сўралмоқда.
Тожикистон-Қирғизистон чегарасида отишма содир бўлди
Тожикистон-Қирғизистон чегарасида икки давлат чегарачилари ўртасида 10 дақиқалик отишма юзага келди. Бунинг оқибатида Тожикистон томонидан бир чегарачи ҳалок бўлди, икки нафари яраланди.
Қозоғистон МХК собиқ раҳбарининг уйидан 17,2 млн доллар нақд пул ва олтин қуймалар топилди
Қозоғистон Миллий хавфсизлик қўмитасининг собиқ раҳбари Карим Масимовга тегишли бир нечта квартира ва қаср, 17,2 млн доллар нақд пул, олтин қуймалар, 11 та қимматбаҳо автомобиль ва бошқалар мусодара қилинди. У 2 млн доллар миқдорида пора олганликда ҳам гумон қилинмоқда.
«Коронавирус пандемияси тугашига ҳали анча бор» — ЖССТ раҳбари
ЖССТ раҳбари коронавирус пандемияси расман эълон қилинган кундан бери 6 млндан кўпроқ инсон вафот этганини маълум қилди. У касалланиш ва ўлим ҳолатлари камайиб бораётгани пандемия тугаганини англатмаслигини қайд этди. «Пандемия тугашига ҳали анча бор ва у ҳамма жойда тугамагунча ҳеч қаерда якунланмайди», — деди Тедрос Гебрейесус. Қолаверса, Европада «дельтакрон» штамми пайдо бўлди.
ЕИ ва Ўзбекистон 2021−2027 йилларга мўлжалланган ҳамкорликни кенгайтиришнинг янги дастурини ишга туширди
Европа Иттифоқи ва Ўзбекистон 2021−2027 йилларга мўлжалланган ҳамкорликни кенгайтириш бўйича Кўп йиллик индикатив дастурни ишга туширди. У учта асосий йўналишни ўз ичига олади: самарали давлат бошқаруви ва рақамли трансформация, инклюзив ва рақамли яшил ўсиш ҳамда «ақлли» ва экологик тоза қишлоқ хўжалиги секторини ривожлантириш. Дастурни молиялаштириш учун 83 млн евро, жумладан, фуқаролик жамияти ва инсон ҳуқуқларини ривожлантиришни қўллаб-қувватлаш учун 7 млн евро ажратилди.
Алиментдан қарзи борларга автомобиль ҳайдаш ва уйланиш тақиқланиши мумкин
Президент фармони билан алимент тўловчининг қарзи ва жарималари алимент тўловлари тўлиқ қоплангандан сўнг ундирилиши белгиланмоқда. Бундан ташқари, Адлия вазирлиги ва Бош прокуратурага алиментдан қарзи мавжуд шахсларга автомобиль бошқариш, айрим давлат хизматларини кўрсатиш ва уйланишни тақиқлашни назарда тутувчи қонун лойиҳасини киритиш вазифаси юклатилди.
Ўзбекистон 2021 йилда Россияга газ экспортини қисқа муддатга тиклаган
2021 йилда Ўзбекистон Россияга газ етказиб беришни бир неча ойга тиклади. Экспорт ҳажми 76,6 млн долларни ташкил этди. Бу йил Россия бозорига зангори олов етказиб берилмади.
14 та ҳудуд раҳбарларига хотин-қизлар масалалари бўйича янги ўринбосарлар тайинланди
Ўзбекистоннинг барча вилоятлари ва Тошкент шаҳри ҳокимларига янги ўринбосарлар — вилоят оила ва хотин-қизлар бошқармаси бошлиқлари, қолаверса, Қорақалпоғистон Вазирлар Кенгаши раисининг ўринбосари — Қорақалпоғистон Оила ва хотин-қизлар давлат қўмитаси раиси тайинланди. Уларнинг барчаси хотин-қизлардан иборат.
Тошкентда ИИБ терговчиси ва профилактика инспектори пора билан қўлга тушди
Пойтахтнинг Чилонзор тумани ИИБ терговчиси жиноят иши бўйича айбланувчига чора кўрмаслик эвазига 5000 доллар талаб қилиб, шундан 1000 долларни олганида ушланди. Миробод тумани ИИБ профилактика инспектори эса ҳуқуқбузарликни расмийлаштирмаслик эвазига 500 долларни олганида қўлга тушгани маълум қилинди. Улар ҳибсга олиниб, жиноят ишлари қўзғатилди.
Тошкент вилоятида 9,1 кг «опий»ни $54 мингга сотган шахслар ушлангани айтилмоқда
ДХХ Тошкент вилоятида 9,1 кг «опий» ни 54 минг долларга сотган шахсларни қўлга олгани айтилмоқда. Улар наркотикни харидорга бериб, ундан олган пулларини тожикистонлик наркосавдогарга етказиши керак бўлган. Бундан ташқари, Фарғона ва Наманган вилоятларида Қозоғистон ва Қирғизистондан айланма йўллар орқали олиб кирилган гиёҳвандлик моддаларининг ноқонуний муомаласига чек қўйилди.
Молдовадаги ўзбекистонликларни Бухарест орқали эвакуация қилиш режалаштирилмоқда
Молдова ҳудудида бўлган Ўзбекистон фуқароларини Руминия пойтахти Бухарест орқали эвакуация қилиш режалаштирилмоқда. Украинадан ватанга қайтарилганлар сони эса 5282 нафарга (+245) етди.
Қўшимча имкониятларга эга булиш учун сайтда рўйхатдан ўтинг