Arxiv
15-aprel kuni e’lon qilingan eng muhim yangiliklar dayjesti
Yashirin iqtisodiyotga qarshi kurashni boshlaydigan hukumat, Uzbekistan Airways`ning Isroilga bekor qilingan reysi, ingliz tiliga tarjima qilingan “Dunyoning ishlari”, 8 ta davlat vazirlarini qabul qilgan prezident va boshqalar — “Gazeta.uz"ning kunlik dayjestida.
OTB O‘zbekistonning iqtisodiy o‘sishi biroz pasayishini prognoz qildi
OTB prognoziga ko‘ra, O‘zbekistonda narxlar oshishining uy xo‘jaliklari daromadiga ta’siri tufayli 2024-yilda iqtisodiy o‘sish 5,5 foizgacha pasayishi mumkin, biroq 2025-yilda biroz tiklanadi. Islohotlar va ijtimoiy xarajatlarni oshirish budjet taqchilligini kamaytirishga qaratilgan harakatlarni cheklashi mumkin.
“Dok-1 Maks” ishi: Apellyatsiya shikoyatlarini ko‘rib chiqish boshlandi
Fevralda “Dok-1 Maks” ishi bo‘yicha birinchi instansiya sudi tugab, 23 ayblanuvchiga hukm o‘qilgandi. Hukmdan norozi yetti sudlanuvchi apellyatsiya shikoyati kiritdi. Jinoyat ishlari bo‘yicha Toshkent shahar sudida apellyatsiyani ko‘rib chiqish 15-aprel kuni davom ettirildi. Tafsilotlar — “Gazeta.uz” reportajida.
Jizzaxda fuqaroni AQShga jo‘natishni va’da qilganlar qo‘lga olindi
Jizzax viloyatining G‘allaorol tumanida muqaddam firibgarlik jinoyati uchun sudlangan shaxslar fuqaroni 18 ming dollar evaziga AQShga jo‘natishni va’da qilgani aniqlandi.
Rossiyada O‘zbekiston va Tojikiston fuqarolari o‘rtasida ommaviy mushtlashuv sodir bo‘ldi (+video)
Moskvadagi qurilish maydonida sodir bo‘lgan ommaviy mushtlashuvda o‘zbekistonlik 10 nafar, tojikistonlik 13 nafar migrant qo‘lga olindi. Janjal qurilish materiallarining noto‘g‘ri taqsimoti sababli kelib chiqqan. Hech kim og‘ir jarohat olmagan, ularga nisbatan ma’muriy jarima tayinlangan.
Prezident Markaziy Osiyo va Ko‘rfaz arab davlatlari muloqoti delegatlarini qabul qildi
Prezident “Markaziy Osiyo — Ko‘rfaz arab davlatlari hamkorlik kengashi” muloqoti yig‘ilishiga kelgan, jumladan, Qatar, Saudiya Arabistoni, O‘mon va Turkmaniston tashqi ishlar vazirlarini qabul qildi. Tomonlar iqtisodiy hamkorlik, Yaqin Sharq va Afg‘onistondagi vaziyatni muhokama qildi.
Artel Canton Fair 2024 keng ko‘lamli xalqaro ko‘rgazmasida ishtirok etmoqda
15−19-aprel kunlari Artel kompaniyasi 135-Canton ko‘rgazmasida — eksport va import mahsulotlari bo‘yicha Osiyoning eng yirik ko‘rgazmalaridan birida ishtirok etmoqda.
O‘tkir Hoshimovning “Dunyoning ishlari” asari ingliz tiliga tarjima qilindi
Tarjimonlar Mark Riz va Abdulloh Ro‘ziyev O‘tkir Hoshimovning “Dunyoning ishlari” qissalarining ingliz tiliga tarjimasini taqdim etdi. Nashr sharafiga Nyu-York metrosida reklama joylashtirildi. “Gazeta.uz” tarjimonlar bilan o‘zbek yozuvchisi ijodi va tarjima ustidagi ishlar haqida suhbatlashdi.
“Prezident jamoasida ortga qaytish haqida o‘ylaydiganlar ishlamaydi” — Jamshid Qo‘chqorov
Bosh vazir o‘rinbosari Jamshid Qo‘chqorov O‘zbekiston hukumati yashirin iqtisodiyotga qarshi kurashni boshlashini aytdi. Qonun va qoidalarni buzgan tadbirkorlar tartibga chaqiriladi. U buni “ortga qaytish” sifatida ko‘rmaslik kerakligini, “Prezident jamoasida bu haqda o‘ylaydigan odamlar ishlamasligini” ta’kidladi.
Jamshid Qo‘chqorov — banklarni xususiylashtirish qanday ketayotgani haqida
Bosh vazir o‘rinbosari Jamshid Qo‘chqorov hukumat “O‘zsanoatqurilishbank” xususiylashtirilishini tezlashtirish ustida ishlayotganini, may oyida “Asakabank”ni xususiylashtirishga tayyorlash bo‘yicha YeTTB bilan kelishuv imzolanishi reja qilinganini bildirdi. Shuningdek, Islom moliyasi bo‘yicha ishlar ko‘lami kengayadi.
“Dronlardan foydalanish madaniyati hali biz tasavvur qilgan darajada emas” — “Madad” NNT vakili
Hukumatda “aholi drondan foydalanish madaniyatiga hali to‘la tayyor emas” degan nuqtai nazar bor. “Hozir ommaviy foydalanishga ruxsat bersak, odamlar bir-birining uyida qilayotgan ishini ham dronlar orqali tarmoqlarga chiqarib yuborishi mumkin”, deya qo‘shimcha qildi “Madad” NNT vakili Islombek Abdurahimov.
Qizil chiroqda “Tez yordam”ga yo‘l bergan haydovchining jarimasi bekor qilindi va taqdirlandi
Toshkentning Chilonzor tumanida svetoforning qizil chirog‘i yongan vaqtda qoidani buzib, “Tez yordam” mashinasiga yo‘l bergan Cobalt haydovchisining uyiga jarima xati bordi. Holat o‘rganilib, fuqaroga yozilgan jarima bekor qilindi. Haydovchi shahar IIBB tomonidan taqdirlandi.
Singapur bosh vaziri iste’foga chiqmoqda
Singapur bosh vaziri Li Syan Lun yigirma yillik hokimiyatdan so‘ng 15-may kuni o‘z lavozimini tark etadi. Uning o‘rniga bosh vazir o‘rinbosari va moliya vaziri Lorens Vong tayinlanadi.
Defektolog Dilorom Jabborovaning tergov vaqtida bolalar duduqlanishi muammosiga oid faoliyat bilan shug‘ullanishi to‘xtatilgan — bolalar ombudsmani
Firibgarlikda gumonlanib, tergovga jalb qilingan defektolog Dilorom Jabborova “Ovoz” nomli markaz ochgani haqida xabar tarqaldi. Bolalar ombudsmani muassasa unga tegishli emasligini, uning tergov davomida bolalar duduqlanishi muammosiga oid faoliyat bilan shug‘ullanishi to‘xtatilganini ma’lum qildi.
Fors ko‘rfazi davlatlari Eron va Isroil o‘rtasidagi katta urushdan qo‘rqmoqda — Reuters
Fors ko‘rfazi davlatlari Isroil va Eron o‘rtasida keng ko‘lamli urush bo‘lishidan qo‘rqmoqda, chunki vaziyatga ularning o‘zlari ham jalb qilinishi xavfi mavjud. Ular AQSh bilan birgalikda Tel-Aviv hamda Tehronga bosim o‘tkazmoqda, deb yozdi Reuters.
O‘zbekiston va Hindiston yana qo‘shma harbiy mashg‘ulotlar o‘tkazadi
O‘zbekiston va Hindiston harbiylari “Do‘stlik” qo‘shma mashg‘ulotlarining beshinchi bosqichini boshladi. Bu yil mashqlar Surxondaryodagi “Termiz” poligonida bo‘lib o‘tmoqda. Jarayon doirasida Hindiston armiyasi shtabi boshlig‘i Manoj Pande O‘zbekistonga keldi.
16−22-aprel kunlari 6 ta hududda qor ko‘chishi xavfi e’lon qilindi
Yog‘ingarchilik hamda havo haroratining keskin o‘zgarishi sababli 16−22-aprel kunlari O‘zbekistonning 6 ta viloyatida qor ko‘chish xavfi e’lon qilindi.
“Biz bozorning 25 foizini egallamoqchimiz” — ADM Jizzakh avtomobil zavodi rahbari
ADM Jizzakh avtomobil zavodi O‘zbekiston bozorining kamida 25 foizini egallash niyatida, deya ma’lum qildi kompaniya bosh direktori Doniyor Davletyarov. Uning so‘zlariga ko‘ra, kelajakda milliy avtomobil ham yaratish reja qilinmoqda.
Qozog‘iston prezidenti oiladagi zo‘ravonlik uchun jinoiy javobgarlik nazarda tutilgan qonunni imzoladi
Qosim-Jomart Toqayev oiladagi zo‘ravonlikka qarshi kurashga qaratilgan qonunni imzoladi. Qonun bilan ayollar va bolalarga nisbatan zo‘ravonlikning har qanday shakli uchun javobgarlikni kuchaytiruvchi normalar joriy etilmoqda.
Martda sezilgan inflyatsiya darajasi 12,7 foiz bo‘ldi. Eng ko‘p yonilg‘i va meva-sabzavot narxlari oshgani sezildi
O‘zbekistonda mart oyida aholi tomonidan sezilgan inflyatsiya darajasi 12,7 foizni tashkil etdi (fevralga nisbatan o‘zgarishsiz). Aholi eng ko‘p yonilg‘i, meva-sabzavotlar, go‘sht va sut narxi oshganini sezdi. Shakar va qandolat narxi oshganini qayd etgan respondentlar ko‘paydi.
Eng ko‘p o‘qilgan xabarlar | So‘nggi yangiliklar
Qo‘shimcha imkoniyatlardan foydalanish uchun saytda ro‘yxatdan o‘ting