Arxiv
14 sentabr kuni O‘zbekistonda sodir bo‘lgan eng muhim xabarlar dayjesti
Samarqandda bir qator davlat rahbarlari bilan muzokara o‘tkazgan prezident, pensiyani hisob-kitob qilishning yangi tartibi, GTL zavodida ilk bor ishlab chiqarilgan sintetik aviakerosin, Farg‘onada ta’qiqlangan fonogramma, elektron firibgarlik uchun 8 yilgacha qamoq va boshqalar — «Gazeta.uz»da kun dayjesti.
XXR raisi Samarqandga keldi
XXR raisi Si Szinpin O‘zbekistonga davlat tashrifi bilan keldi. Samarqand aeroportida uni prezident Shavkat Mirziyoyev kutib oldi.
Nikol Pashinyan Samarqanddagi SHHT sammitida qatnashmasligi ma’lum qilindi
Armanistondagi vaziyat tufayli mamlakat bosh vaziri Nikol Pashinyanning Samarqanddagi SHHT sammitida qatnashmasligi ma’lum qilindi. Avvalroq u «Armanistonning hududiy yaxlitligini tiklash va Ozarbayjon qurolli kuchlarining olib chiqib ketilishini ta’minlash» uchun KXSHTga yordam so‘rab murojaat qilgan edi.
Har bir hududda iqlim o‘zgarishi bo‘yicha milliy moslashuv rejasi ishlab chiqiladi
Orol qurishi Qoraqalpog‘iston, Xorazm va Buxoroga jiddiy ta’sir o‘tkazayapti, dedi Gidrometeorologiya ilmiy-tadqiqot instituti direktori. Mamlakatning kam daromadli aholi qatlami esa ayni shu hududlarda yashaydi, Shu bois, O‘zgidromet hududlarning iqlim o‘zgarishi bo‘yicha milliy moslashuv rejasini ishlab chiqmoqda.
Turkiya Turkmaniston fuqarolari uchun vizasiz kirishni bekor qildi
Turkiya hukumati Turkmanistonning iltimosiga ko‘ra, turkmanistonliklar uchun vizasiz rejimni bekor qildi. Avvallari mazkur davlat fuqarolari Turkiyada turizm maqsadida 30 kungacha vizasiz qolishi mumkin edi.
OAV: Rossiya yashirin xalqaro siyosiy kampaniyaga kamida $300 mln sarflagan
Xalqaro siyosiy voqealarga ta’sir o‘tkazish maqsadida Rossiya butun dunyo bo‘ylab siyosiy kuchlarni moliyalashtirish uchun kamida $300 mln ajratgan, deya xabar beradi Amerika OAV nashrlari. Maqolalarda Osiyo davlatlarining biridagi prezidentlikka nomzodga millionlab dollar berilganligi tilga olinadi.
Shavkat Mirziyoyev va Ibrohim Raisiy muzokara o‘tkazdi
SHHT sammitida ishtirok etish uchun Eron prezidenti Samarqandga tashrif buyurdi. Shavkat Mirziyoyev va Ibrohim Raisiy muzokaralar davomida ko‘p qirrali hamkorlikni yanada kengaytirish, o‘zaro savdo hajmini oshirish, qo‘shma loyihalarni yo‘lga qo‘yish, qolaversa, Afg‘onistondagi vaziyat yuzasidan ham fikr almashdi.
Qashqadaryoda Lacetti urib yuborgan voyaga yetmagan bola vafot etdi
Qashqadaryoda Lacetti belgilangan joydan yo‘lni kesib o‘tayotgan bolani urib ketdi. Buning oqibatida bolakay vafot etdi. Haydovchiga nisbatan jinoyat ishi qo‘zg‘atildi.
O‘zbekiston Xitoy hamkorligida telekommunikatsiya infratuzilmasini rivojlantiradi
O‘zbekiston Xitoy bilan telekommunikatsiya infratuzilmasini rivojlantirish bo‘yicha 506,8 mln dollarlik loyihalarni amalga oshirish borasida kelishuvga erishdi.
Dollarning rasmiy kursi ketma-ket beshinchi bor pasaymoqda
AQSh dollarining so‘mga nisbatan rasmiy kursi 14,91 so‘mga arzonlab, 10 925,14 so‘m etib belgilandi. Shuningdek, yevro kursi ham pasaydi, rubl esa ko‘tarildi.
Rossiya regulyatori xorijiy banklar filiallarini ochishdagi taqiqni bekor qilmoqchi
RF markaziy banki va Moliya vazirligi hukumat majlisida xorijiy banklarga mamlakat hududida filiallarini ochishga ruxsat berishni taklif qildi. Biroq tashabbus bilan faqat do‘stona mamlakatlarning kredit tashkilotlari Rossiyada o‘z filiallarini ochishlari mumkin bo‘ladi.
Shavkat Mirziyoyev BMT bosh kotibi o‘rinbosari Rozmari DiKarloni qabul qildi
O‘zbekiston prezidenti BMT bosh kotibining siyosiy masalalar va tinchlikni barpo etish bo‘yicha o‘rinbosari Rozmari DiKarloni qabul qildi. Tomonlar Orol dengizi halokatining oqibatlarini yumshatish, Afg‘onistonda tinchlik o‘rnatish va afg‘on xalqiga ko‘maklashish borasidagi hamkorlikni mustahkamlashga kelishib oldi.
Misr va Qatar SHHTning muloqot bo‘yicha hamkoriga aylandi
Toshkentda Misr va Qatarga SHHTning muloqot bo‘yicha hamkori maqomini berish to‘g‘risidagi memorandum imzolandi. Ushbu maqomni yana to‘rtta davlat oladi.
O‘zbekiston va Mo‘g‘uliston prezidentlari Samarqandda uchrashdi
SHHT sammiti arafasida Samarqandda O‘zbekiston va Mo‘g‘uliston yetakchilari muzokara o‘tkazdi. Shavkat Mirziyoyev va Uxnaagiyn Xurelsux ikki davlat o‘rtasida siyosiy va iqtisodiy aloqalarga tizimli tus berish, o‘zaro manfaatli hamkorlikni kengaytirish bo‘yicha «yo‘l xaritasi» ni qabul qilishga kelishib oldi.
Tadbirkorlik subyektlari faoliyatida tekshiruv o‘tkazish ro‘yxatga olinadi
Prezident qarori bilan tadbirkorlik subyektlarida o‘tkaziladigan tekshiruvlar «Yagona davlat nazorati» axborot tizimida ro‘yxatga olinadi. Tizimda bo‘lmagan tekshiruvlarni o‘tkazish esa noqonuniy hisoblanadi. Qarorga ko‘ra, ayrim hollarda tadbirkor nazoratchilarni tekshiruv uchun hududiga qo‘ymaslikka haqli.
O‘zbekiston Ozarbayjon va Armaniston chegarasida tinchlikka erishilganini olqishladi
O‘zbekiston Tashqi ishlar vazirligi Ozarbayjon-Armaniston chegarasida yuzaga kelgan harbiy to‘qnashuv bartaraf etilganini olqishladi. Shuningdek, tomonlarni mavjud muammolarni tinchlik muzokaralari va maslahatlashuvlar doirasida hal etishga chaqirdi.
14 sentabr uchun tijorat banklari tomonidan belgilangan dollar kursi
Markaziy bank 14 sentabr uchun xorij valyutasining so‘mga nisbatan yangi qiymatini e’lon qildi. Shunga ko‘ra, tijorat banklari ham dollar kursini yangiladi.
Senat raisi — hukumatga: «Hammasini davlat rahbariga tashlab qo‘yish kerak emas»
Tanzila Narbayeva daraxtlar kesilishi, talabalar yotoqxonasi, poytaxtdagi tirbandliklar kabi muammolar tarmoqlarga chiqqanidan keyingina, hukumat harakatga tushishini tanqid qildi va prezidentning o‘zi yechim topib berayotganini aytdi. «Hammasini davlat rahbariga tashlab qo‘yish kerak emas», — dedi Senat raisi.
Avgustda poytaxtda 14 statsionar radar o‘rnatildi
Avgust oyida Toshkent shahrida 14 ta onlayn rejimda ishlovchi statsionar radar paydo bo‘ldi, ularning barchasi Olmazor tumanida o‘rnatilgan. YHXX radarlar o‘rnatilgan joylar ro‘yhatini e’lon qildi.
Uzbekistan GTL zavodida ilk bor sintetik aviakerosin ishlab chiqarildi
Uzbekistan GTL zavodida jahon tarixida ilk bor sintetik aviakerosin mahsuloti ishlab chiqarildi. Avvalroq zavodda ilk sintetik dizel va neft mahsulotlari ishlab chiqarilishi yo‘lga qo‘yilgandi.
Eng ko‘p o‘qilgan xabarlar | So‘nggi yangiliklar
- O‘zbekistonda chorva hayvonlarini identifikatsiya qilish rejalashtirilmoqda
- Paxta sotib olish bo‘yicha shartnoma shartlari fermerlar zarariga qayta ko‘rib chiqilishi mumkin. Tafsilotlar
- Futzal JCH: O‘zbekiston Paragvayga yirik hisobda mag‘lub bo‘ldi
- Germaniyaning Deutsche Bahn kompaniyasi o‘zbekistonliklarni ishga jalb qila boshlaydi
Qo‘shimcha imkoniyatlarga ega bulish uchun saytda ro‘yxatdan o‘ting