Toshkentdagi qator avtobus yo‘nalishlarining oraliq harakati o‘zgartiriladi
28 fevraldan Toshkentdagi qator avtobus yo‘nalishlarining oraliq harakati o‘zgartiriladi. Ularning asosiy qismi yangi tashkil etilgan chorrahalar orqali o‘tadigan bo‘ldi.
Uzbekistan Airways Londonga aviaqatnovlar sonini oshirmoqda
Uzbekistan Airways 26 martdan Toshkentdan Londonga muntazam aviaqatnovlar sonini oshiradi. Toshkent — London — Toshkent aviaqatnovlari haftasiga uch marta amalga oshiriladi.
12-mart kuni beshinchi Toshkent xalqaro marafoni bo‘lib o‘tadi
12-mart kuni “V International Tashkent Marathon” va O‘zbekistonning 14 ta shahrida bir vaqtda Yangi Nafas ommaviy yugurish musobaqasi o‘tkaziladi. Professional va havaskor sportchilar 5-martgacha 42 km, 21 km, 10 km, 3 km masofa uchun ro‘yxatdan o‘tishi mumkin. Bu yil ilk bor “Kids Run” poygasi ham bo‘lib o‘tadi.
O‘zPFL va O‘FA o‘rtasida kelishuv imzolash vaqti keldi — Diyor Imomxo‘jayev
Davlat budjetidan “bir tiyin ham olmaydi"gan O‘zbekiston Professional futbol ligasi daromadi va xarajati haqida ketma-ket ikkinchi yil jamoatchilikka hisobot berdi. O‘zPFL rahbari Diyor Imomxo‘jayev uning tashkiloti 2023 yilda bolalar, ayollar va futzal musobaqalarini ortiq o‘tkazmasligini ma’lum qildi.
Muhtoj shaxslar zamonaviy oyoq protez-ortopediya buyumlari bilan bepul taminlanadi
2023 yildan muhtoj shaxslarga zamonaviy oyoq protez-ortopediya buyumlari bepul beriladi. I va II guruh nogironligi bo‘lgan shaxslar va ularga g‘amxo‘rlik qiluvchilar davlat xizmatlaridan navbatsiz foydalanadi, mansabdor shaxslar qabuliga navbatsiz kiradi.
O‘zbekistonda 1 martdan Ai-80 benzini narxi oshadi
O‘zbekistonda 1 martdan import qilinadigan va mahalliy Ai-80 rusumli benzinga aksiz solig‘ining «nol» stavkasi qo‘llanishi muddati tugaydi. Shu kundan boshlab ushbu yoqilg‘i narxining oshishi kutilmoqda.
Qozog‘iston martda «Buxoro-Ural» gaz quvurining uchinchi tarmog‘i qurilishini boshlamoqchi
Qozog‘iston 2023 yilda O‘zbekistondan Qozog‘iston orqali Rossiyaga o‘tuvchi «Buxoro-Ural» gaz quvurining uchinchi tarmog‘i qurilishini boshlashni rejalashtirmoqda. Loyiha qiymati 95,6 mln dollarga baholangan.
Murodxon Axmedov Xorazm viloyatiga prokuror bo‘ldi
Bosh prokuror buyrug‘i bilan Murodxon Axmedov Xorazm viloyati prokurori lavozimiga tayinlandi. U shu paytga qadar Farg‘ona viloyati prokurori o‘rinbosari lavozimida ishlagan.
Jizzaxda 218 dona baliqni noqonuniy ovlaganlar ushlandi
Do‘stlik tumanida 218 dona baliqni noqonuniy ovlagan fuqarolar qo‘lga olindi. Ularga nisbatan ma’muriy bayonnoma rasmiylashtirildi hamda hayvonot dunyosiga 28 mln so‘m zarar belgilandi. Hujjatlar jinoyat ishlari bo‘yicha tuman sudiga taqdim etildi.
Toshkentda noqonuniy diniy ta’lim bergan 6 kishi jarimaga tortildi
Toshkent shahar IIBB fevral oyida Sergeli, Mirobod va Shayxontohur tumanlarida noqonuniy diniy ta’lim berish faoliyati bilan shug‘ullangan 6 kishini aniqladi. Ular 300 ming so‘mdan 3 mln so‘mgacha bo‘lgan miqdorda jarimaga tortildi.
«So‘z erkinligining chegarasini Adliya vazirligi belgilamaydi». Tarmoq faollari vazirlik eslatmasini qoraladi
Adliya vazirligi OAV va blogerlarni «jamiyatdagi muammolarni faqat huquqiy vositalar asosida hal qilish»ga chaqirib, OAVdagi tuhmat va haqorat uchun jazolarni eslatdi. Faollar esa bu kabi eslatmalardan «so‘z erkinligi yutqazayotgani», «erkin matbuot hali adliyaning o‘ziga ham kerak bo‘lishi»ni ta’kidladi.
Qoraqalpog‘istonda suv, elektr ta’minotini yaxshilash va shu kabi loyihalar uchun 20 mlrd so‘m ajratildi
Ellikqal’a tumanida prezident qaroriga asosan ichki xo‘jalik yo‘llarini ta’mirlash, ichimlik suv ta’minoti va oqova suv tarmoqlarini, elektr ta’minotini yaxshilash, transformator punktlarini ta’mirlash, temir beton tutqichlarini almashtirish hamda 4 MFY binosini yangidan qurish amalga oshiriladi.
Sirdaryoda bir oilani AQShga jo‘natish evaziga $40 ming talab qilgan shaxs ushlandi
Sirdaryo viloyatidagi bir oilani 40 ming dollar evaziga AQShga yuborishini va’da qilgan shaxs qo‘lga olindi. O‘tkazilgan tezkor tadbir davomida u fuqarodan 12 ming dollar olayotgan vaqtida ushlandi. Holat bo‘yicha jinoyat ishi qo‘zg‘atildi.
Sergelida fuqaro tez yordam mashinasi haydovchisini do‘pposladi
Dushanba kuni erta tongda Sergeli tumanida tez yordam mashinasi haydovchisi kaltaklandi. Aniqlanishicha, bemorning yaqini feldsherga yaxshi qaramagani uchun kuch ishlatmoqchi bo‘lgan, haydovchi esa uni himoya qilmoqchi bo‘lgan. Hozirda holat bo‘yicha jinoyat ishi qo‘zg‘atildi.
Bo‘ka va Ohangarondagi manzil-koloniyalarda pilla yetishtiriladi
Prezident qaroriga ko‘ra, 2023 yil bahoridan tajriba tariqasida Bo‘ka va Ohangaron tumanlaridagi manzil-koloniyalarda pilla yetishtirish amaliyoti yo‘lga qo‘yiladi.
Soliq ilovasida keshbek olish uchun endi Face ID talab qilinadi
Endi «Soliq» mobil ilovasida keshbek olish uchun Face ID bo‘yicha identifikatsiyadan o‘tish talab qilinadi. Ilgari faqat 500 000 so‘mdan ortiq mablag‘ni olish uchun fotosurat yordamida shaxsni tasdiqlash talab qilinardi.
To‘ra Bobolov yangi lavozimda ish boshlagani ma’lum bo‘ldi
2022 yil dekabrda Surxondaryo viloyati hokimi lavozimidan ozod etilgan To‘ra Bobolov Savdo-sanoat palatasi raisining birinchi o‘rinbosari sifatida ish boshlagan. U O‘zbekiston-Ozarbayjon ishbilarmonlar kengashi yig‘ilishida birinchi o‘rinbosar va kengash hamraisi bo‘lib ishtirok etdi.
Toshkentda iqtisodchi Jeyms Robinson bilan uchrashuv bo‘lib o‘tadi
17-mart kuni Toshkentdagi Intercontinental Hotel Tashkent mehmonxonasida britaniyalik olim, Chikago universiteti professori Jeyms Robinson bilan uchrashuv bo‘lib o‘tadi. Tadbirda uning hammuallifligidagi “Mamlakatlar tanazzuli sabablari” (Why Nations Fail) kitobining taqdimoti ham bo‘lib o‘tadi.
O‘zbekiston Ozarbayjon bilan 500 mln dollarlik qo‘shma investitsiya jamg‘armasini tashkil etadi
O‘zbekiston-Ozarbayjon hududlararo forumida o‘zaro savdo va iqtisodiy hamkorlikni rivojlantirish bo‘yicha 11 ta hujjat imzolandi. Tomonlar loyihalarni o‘z vaqtida moliyalashtirish uchun $500 mlnlik qo‘shma investitsiya jamg‘armasini tashkil etishga kelishib oldi.
Jizzaxda ota qizining sinfdoshlarini kaltakladi
Jizzax shahridagi 11-maktabda ota qizining 3 nafar sinfdoshini kaltakladi. Voqeaga bolalarning qizga gap otgani sabab bo‘lgani aytilmoqda. Holat bo‘yicha jinoyat ishi qo‘zg‘atildi.
Qo‘shimcha imkoniyatlarga ega bulish uchun saytda ro‘yxatdan o‘ting