Тошкент шаҳри ҳокимлиги Бектемир туманидаги 276 та географик объектнинг номини ўзгартириш ва уларга ном бериш бўйича овоз бериш жараёни бошланганини эълон қилди. Таклифларни қабул қилиш geonom.tashkent.uz сайтида 13 апрелда бошланган ва 27 апрелгача давом этади.
Ҳокимликнинг Рақамли ривожланиш департаменти картография ва топонимика бўлими бошлиғи Анвар Жабборовнинг «Газета.uz»га маълум қилишича, айрим кўчалар шаҳарда аллақачон мавжуд бўлган бошқа кўчаларнинг номини (Нурафшон, Фурқат, Зиелилар) такрорлаётгани боис уларни ўзгартиришга эҳтиёж бор. Баъзи кўчалар эса номсиз қолиб кетган.
geonom.tashkent.uz сайти саҳифасининг скриншоти
Аввалроқ Анвар Жабборов «Газета.uz»га берган интервьюсида пойтахтдаги 900 дан ортиқ кўчаларнинг номи йўқлигини айтиб, ушбу муаммони ҳал этиш бўйича босқичма-босқич режани ҳам тақдим этган эди.
Мутахассислар томонидан олиб борилган ишлар натижаларига кўра кўчаларнинг чегаралари аниқланган, ўтиш жойлари ва боши берк йўллар ҳудуд харитасида уларнинг сони бир хил бўлиши учун тартибга келтирилган.
Овоз бериш учун geonom.tashkent.uz сайтининг бош саҳифасида харита остидаги «Овоз беришда иштирок этинг» ҳаволасини, сўнг кўча бўлимлари кўрсатилган доиралардан бирини босинг.
Эслатиб ўтамиз, Шавкат Мирзиёев 2022 йилнинг ноябрь ойида географик объектларга ном бериш тўғрисидаги қонунга ўзгартишларни имзолаган эди. Қонун географик объектларга ном бериш ва қайта номлашда маҳаллий аҳолининг фикрини инобатга олиш тартибини белгилайди. Бундан ташқари, фуқароларга географик объектларга ном бериш ташаббуси билан чиқиш имконияти берилган.
