Архив
7 апрель куни Ўзбекистонда содир бўлган энг муҳим хабарлар дайжести
Орол денгизининг коинотдан кўриниши, Uzmetronom асосчиси устидан арз қилган Комил Алламжонов, саломатлиги туфайли ишдан бўшатилган энергетика вазири, Андижонда божхона пости бошлиғи ва икки ходими ҳибсга олингани, янги қурилаётган цемент-бетон қопламали йўллар сифатини назорат қиладиган Бош прокуратура ва бошқалар — «Газета.uz» нинг 7 апрелдаги энг муҳим хабарлари дайжестида.
1 июлдан 38 турдаги давлат хизмати электрон имзо ўрнига мобил телефон орқали тасдиқланади
1 июлдан 38 турдаги давлат хизматини тасдиқлаш электрон имзо ўрнига мобил телефон ёрдамида амалга оширилади. Шунингдек, 6 турдаги лицензия олиш учун талаблар, қолаверса, коммунал ташкилотларнинг 32 турдаги ҳужжат ва маълумотномаларини талаб қилиш бекор қилинади.
Пойтахт ҳокимияти очилганига 15 кун бўлган фирма билан 1 млрд сўмлик шартнома имзолади
Тошкент ҳокимияти маъмурияти ташкил этилганига 15 кун бўлган «Profi event» компаниясига Наврўз сайлини ўтказиш учун 1 миллиард сўмлик ишларни тендерсиз топширди. Унда компания 3 кун давомида «Янги Ўзбекистон» боғида бир қатор хизматларни кўрсатиши белгиланган. Келишувга мувофиқ, асосий конструкциялар қурилиши айнан шартнома имзоланган санада тугатилиши керак бўлган.
Космонавтлар майдони реконструкцияси: нима нотўғри қилинди?
Тошкентда Космонавтлар майдонини реконструкция қилиш ишлари деярли якунланиб қолди. Бу ердаги гранит плиталар алмаштирилди ва янги ўсимликлар экилди. Бироқ, санъат ва архитектура тарихчиси Борис Чухович «реконструкторлар муаллифларнинг асл бадиий ғояларига етарлича эътибор бермаган ва ёдгорликнинг яхлитлигини бузган», деб ҳисоблайди. У шу каби ишларни қилишдан аввал аҳоли ва мутахассислар билан маслаҳатлашувлар ўтказиш зарурлигини таъкидлади.
Бош прокуратура янги қурилаётган цемент-бетон қопламали йўллар сифатини назорат қилади
Президент жорий йилда вилоятларда жами 2300 км, пойтахтда 250 км цемент-бетон қопламали ички йўллар барпо этилишини маълум қилди. Унга кўра, цемент ишлаб чиқариш ҳажми шу йили 18 млн тоннага етказилади. Бош прокуратура мазкур йўллар сифати устидан қатъий назорат ўрнатади. Импорт қилинадиган цемент-бетон қопламали йўл қуриш техникалари божхона божи ва утилизация йиғимидан озод этилади.
Энергетика вазири Алишер Султанов лавозимидан озод этилди
2019 йилдан бери энергетика вазири сифатида ишлаб келаётган Алишер Султанов саломатлиги туфайли бошқа ишга ўтиши муносабати билан лавозимидан озод этилди.
Чинозда банк ходими фуқаролар номига рухсатсиз кредит расмийлаштириб, маблағларни талон-торож қилгани аниқланди
Чиноз туманида банк ходими «Ҳар бир оила — тадбиркор» дастури доирасида фуқароларга ажратилган 2 млрд сўмдан ортиқ кредит маблағларини турмуш ўртоғи ва яқинларининг номларига очилган деҳқон хўжалиги ҳисоб рақамига ўтказиб, пулларни нақдлаштириб келганликда гумон қилинмоқда. У, шунингдек, 10 нафар фуқарога уларнинг хабарисиз кредит ажратиб, пулларни ўзлаштиргани маълум қилинди.
Президент Самарқанд туризм марказини қуришни тезлаштиришга кўрсатма берди
Шавкат Мирзиёев чоршанба куни Самарқанд туризм марказини қуришни тезлаштириш юзасидан масъулларга топшириқ берди. Лойиҳага кўра, ушбу мажмуада конгресс холл, «Абадий шаҳар» карвон саройи, 8 та меҳмонхона қуриш кўзда тутилганди. Ҳозирги кунга келиб, меҳмонхоналар, қадимий шаҳарчалар, йўл ва кўприкларни қуриш ишлари олиб борилмоқда (фото).
Комил Алламжонов Uzmetronom.com асосчиси Сергей Ежков устидан арз қилди
Масс-медиани қўллаб-қувватлаш фонди Васийлик кенгаши раиси Комил Алламжонов Uzmetronom.com сайти асосчиси Сергей Ежков устидан ҳуқуқ-тартибот органларига арз қилди. Бунга Комил Алламжонов ҳимояси остида Ўзбекистонга 4,2 млн долларлик тилла ва бриллиант тақинчоқлар ноқонуний олиб кирилгани айтилган «Бриллиант бола» номли мақола сабаб бўлди. Мазкур ахборотнинг биринчи манбаси эса Eltuz ресурси ҳисобланади.
Шуҳрат Ғаниевнинг ёпиқ баённомаси кластер ва фермерларда саволларни туғдирмоқда
Наманган вилоятининг Норин туманида маҳаллий ҳокимият Iftihor Kiyim Sanoat кластерини бошқа бир кластер — Uztex Uchkurgan билан уч йилдан буён ишлаб келаётган фермер хўжаликларига бириктирмоқчи бўлмоқда. Кластерларни ўзгартириш бош вазир ўринбосари Шуҳрат Ғаниев томонидан имзоланган йиғилиш ёпиқ баённомасида кўзда тутилган. Uztex 2022 йил учун фермерлар билан тузилган шартномаларнинг бир қисмини молиялаштиргани, бироқ вилоят ҳокими ён беришни истамаганини маълум қилди. Фермерларнинг айтишича, улар жорий кластердан мамнун. Iftihor Kiyim Sanoat эса «бу ерларни сўрамаганликларини» билдирди.
Фото: Орол денгизининг Халқаро космик станциядан кўриниши
ХКС космонавти Олег Артемьев интернет фойдаланувчилари илтимосига кўра Орол денгизи суратларини эълон қилди. Суратда Ўзбекистондаги Ғарбий ва Шарқий Оролнинг бир-бири билан ингичка сув йўли билан туташгани ҳамда Қозоғистондаги Кичик Оролнинг зумрад ойнадек тургани акс этган.
Антимонополия қўмитаси раисининг биринчи ўринбосари ишдан бўшатилди
Монополияга қарши курашиш қўмитаси раисининг биринчи ўринбосари Бобир Каримов лавозимидан озод этилди. У UzAuto Motors монополиясига қарши чиққан эди ва ҳайдовчилик гувоҳномасини олиш учун Ягона имтиҳон маркази ишга тушгандан кейин давлат имтиҳон марказлари ёпилгани нотўғри бўлганини айтган эди.
2021 йилда Омбудсман офисига 18,7 мингдан ортиқ мурожаат келиб тушди
Олий Мажлиснинг Инсон ҳуқуқлари бўйича вакили офисига 2021 йилда 18,7 мингдан кўпроқ мурожаат келиб тушди, бу бир йил аввалги кўрсаткичга (14,9 минг) қараганда ошган. Шундан 11257 таси кўриб чиқиш учун иш юритувига олинган. Мурожаатларнинг асосий қисмини мулкка бўлган ва меҳнат ҳуқуқларини таъминлаш, ижтимоий имтиёз ва нафақалар олиш каби масалалар ташкил этган.
2022 йил Ўзбекистонда иқтисодий ўсиш секинлашиб, 4% ни ташкил қилади — ОТБ
ОТБ прогнозларига кўра, 2022 йилда Ўзбекистон ЯИМ ўсиши секинлашиб, 4% ни ташкил этиши кутилмоқда. Ўсиш суръатининг секинлашиши мамлакатда хусусий истеъмолнинг қисқариши ва натижада саноат ҳамда хизматлар соҳаси кенгайишининг чекланиши билан изоҳланган. Банк мамлакатга «яшил ўсиш» ва хусусий секторнинг ривожланиши ёрдам бериши мумкинлигини таъкидлаган.
Камал Тарихов Қорақалпоғистон суди раиси этиб сайланди
Қорақалпоғистон Республикаси Жўқорғи Кенгесининг сессиясида Камал Тарихов Қорақалпоғистон суди раиси лавозимига сайланди. У мазкур лавозимда Гулнара Базарбаеванинг ўрнини эгаллади.
Андижонда божхона пости бошлиғи ва 2 нафар ходими ҳибсга олинди
«Андижон» ташқи иқтисодий фаолият божхона пости бошлиғи ва 2 нафар ходими қўлга олинди, улар пост орқали 5,5 млрд сўмлик юкни ноқонуний тарзда олиб ўтилишига ёрдам бермоқчи бўлган.
Қишлоқ хўжалиги вазирлиги март ойидаги ёғингарчиликнинг ҳосилга таъсирини баҳолади
Қишлоқ хўжалиги вазирлиги мутахассислари март ойидаги ноқулай об-ҳаво шароитининг қишлоқ хўжалиги маҳсулотларига таъсирини ўрганди. Совуқ ҳаво ва ёғингарчиликлар айрим ҳудудларда мевали боғларнинг куртак новдаларига қисман салбий таъсир кўрсатган. Узумзорлар, эртаки экилган картошка ва сабзавот экинлари зарар кўрмаган.
Янги Ўзбекистон кўчаси бўйлаб уйлар, меҳмонхона, кинотеатр ва ресторанлар қурилади
Шавкат Мирзиёев Янги Ўзбекистон кўчаси бўйлаб 610 гектар майдонда қуриладиган бинолар лойиҳалари билан танишди. Уй-жойлар, меҳмонхоналар, кинотеатр, ресторанлардан иборат замонавий мажмуалар тўрт қаватли ва тўрт хил дизайнга эга бўлади. Шунингдек, пиёда ва велосипед йўлаклари, ерости ва ерусти йўллари барпо этилади. Бундан ташқари, президент Олимпия шаҳарчаси лойиҳасини тасдиқлади.
ОТБ Сурхондарё ва Бухоро вилоятларидан ўтувчи автомобиль йўлларини таъмирлашга кредит ажратди
Осиё тараққиёт банки Сурхондарё (111 км) ва Бухоро (87 км) вилоятларидан ўтувчи автомобиль йўлларини таъмирлаш учун 273,8 млн доллар миқдорида қарз маблағларини ажратмоқда.
АҚШ, Буюк Британия ва G7 давлатлари Россияга нисбатан янги санкциялар эълон қилди
6 апрель куни АҚШ, Буюк Британия ҳамда «Катта еттилик» мамлакатлари Россияга нисбатан янги санкцияларни эълон қилди. Унга кўра, «Сбербанк» ва Альфа-банк активлари музлатилади, Россияга инвестиция киритиш тақиқланади. Бундан ташқари, Россия бош вазири Михаил Мишустин, Дмитрий Медведев, Владимир Путиннинг қизлари, Сергей Лавровнинг турмуш ўртоғи ва қизи ҳам санкцияга тушган. Батафсил «Газета.uz» материалида.
Энг кўп ўқилган хабарлар | Сўнгги янгиликлар
Қўшимча имкониятлардан фойдаланиш учун сайтда рўйхатдан ўтинг