Тошкент кимё-технология институти келгуси ўқув йилидан «супер контракт» дан воз кечишни режалаштирмоқда. Шунингдек, ўқув йили 3 семестрли бўлиши мумкин. Бунда иқтидорли талабалар бакалавр босқичини 4 йилда эмас, 3,5 йилда битириши мумкинлиги айтилмоқда.
Маъмурий жавобгарлик тўғрисидаги кодексга киритилган ўзгартишларга мувофиқ, карантин остидаги маҳсулотларни Ўзбекистонга олиб кириш ва олиб чиқиш қоидаларини бузиш — фуқароларга БҲМнинг 5 бараваригача (1 млн 350 минг сўмгача), мансабдор шахсларга эса 10 бараваригача (2 млн 700 минг сўмгача) миқдорда жарима солишга сабаб бўлади.
Ўзбекистонда омикрон штамми аниқлангач, давлат болалар боғчаларида ҳам байрам тадбирларини ўтказиш вақтинча чекланди. Шунингдек, уларнинг ҳудудига ота-оналар ёки меҳмонларнинг киришига йўл қўйилмайди.
Тошкент-Чиноз автомобиль йўли ва пойтахтдаги Темур Малик кўчаси таъмирланиши, иккинчи марта суиқасд уюштирилган Юнусубоддаги дарахтлар, Олма-отадан Ўзбекистонга қайтишни хоҳловчилар рўйхати тузилгани, ҚҚС имтиёзлари 4 ойга узайтириладиган озиқ-овқатлар, Тошкентда Cobalt юкхонасидан топилган андижонлик таксичининг жасади, ниқоб тақмаганлар аввалига огоҳлантирилиши, жаримага эса қўпол қоидабузарлар тортилиши — «Газета.uz» нинг 11 январдаги энг муҳим хабарлари дайжестида.
Шимолий Кореянинг Япон денгизи томонга номаълум ракета учиргани, Германияда 2021 йилда ўлим даражаси бўйича мамлакат рекорди ўрнатилгани, АҚШнинг Украинага яна 200 млн доллар ҳарбий ёрдам ажратиши, Европарламент раҳбари Давид Сассолининг вафоти ва бошқа янгиликлар — «Газета.uz»нинг жаҳон янгиликлари дайжестида.
«Бухоро нефть базаси» МЧЖда муттасадилари хусусий АЁҚШларга жами 2,6 млрд сўмлик нефть маҳсулотларини тўловсиз етказиб бериб, дебитор қарздорликни яшириб келган. Шунингдек, МЧЖ қурилиш корхоналарига 298,1 млн сўм пулни асоссиз равишда тўлаб берган. Ходимларга эса 31,6 млн сўм миқдорида ортиқча иш хақи ва мукофот пуллари берилган.
Пойтахт Кенгаши томонидан 2022 йилги Тошкент шаҳри ва унинг туманлари бюджети 6,04 трлн сўм миқдорида тасдиқланди, бу ўтган йилга нисбатан 48,5 фоизга кўпроқ. Бюджет даромадларининг асосий манбаи юридик шахсларнинг мол-мулкига солинадиган солиқдан тушумлар бўлиб, 2,3 баробарга ошади. Иссиқлик энергияси ишлаб чиқарувчиларнинг йўқотишларини субсидиялашга 732,2 млрд сўм, «Обод маҳалла» дастури учун 500 млрд сўм йўналтирилади.
Фарғона вилоятида аввалига «Ислом давлати» террористик ташкилоти аъзолари сафига қўшилиш ниятида Туркияга борган, Сурияга ўта олмагач, Ўзбекистонга қайтиб келиб, ташкилот ғояларини тарғиб қила бошлаган 19 ёшли шахс қўлга олингани айтилмоқда. Унга нисбатан жиноят иши қўзғатилди.
Долларнинг сўмга нисбатан расмий курси 15,00 сўмга кўтарилиб, 10 855,02 сўм этиб белгиланди. Шунингдек, евро ва рубль курслари ҳам кўтарилди.
Ҳукумат қарори билан Фарғона, Сурхондарё ва Хоразмда Одам ДНКси суд-биологик экспертизаси лабораториялари, Самарқандда эса Материаллар, ашёлар ва буюмлар криминалистик экспертизаси лабораторияcи ташкил этилади.
Олий Мажлис Қонунчилик палатасида қўшилган қиймат солиғи имтиёзлари бўйича қонун лойиҳаси қабул қилинди. Унга кўра, айрим турдаги озиқ-овқат маҳсулотлари 2022 йил 30 апрелга қадар ҚҚСдан озод қилинади.
КХШТнинг Қозоғистондаги асосий миссияси якунланди, контингентни олиб чиқиш 2 кундан кейин бошланади ва бу жараён 10 кундан ошмайди, деди президент Қасим-Жомарт Токаев. Унинг таъкидлашича, иттифоқчиларга мурожаат қилиш вақтида ҳукумат Олмаота, кейинчалик эса мамлакат устидан назоратни бутунлай йўқотиши мумкин эди. Президент Миллий хавфсизлик қўмитаси террорчилик таҳдидининг олдини ўз вақтида бартараф эта олмаганини таъкидлади.
Асқар Мамин истеъфога чиққанидан кейин Қозоғистон ҳукумати раҳбари вазифасини бажариб келаётган Алихон Смаилов мамлакат бош вазири этиб тайинланди.
Алишер Усмоновга тегишли USM Holdings компаниясининг шўъба корхонаси бўлган «Телекоминвест» МЧЖ «Капиталбанк» устав капиталининг 8,33 фоизини сотиб олди. Эндиликда ушбу компания «Капиталбанк»нинг 25 фоиз улушига эга.
Андижон-Тошкент йўналишида таксичилик қилувчи фуқаро Тошкентга йўловчи олиб кетиб, бедарак йўқолган. Унинг жасади Тошкентдаги автотураргоҳда турган Cobalt юкхонасидан топилди. Ҳозирда 3 нафар гумонланувчи қўлга олинган.
Ўзбекистон ТИВ расмий вакили Қозоғистондаги фуқароларга зарур ёрдам кўрсатиш ишлари олиб борилаётганини маълум қилди. Нур-Султон шаҳридан авиапарвозлар амалга оширилмоқда, қолаверса, Олма-отадан Ўзбекистонга қайтишни хоҳловчи фуқаролар рўйхати тузилган. Ҳозирда Ўзбекистон фуқароларининг ҳибсга олингани ҳақида маълумот йўқ.
Душанба куни 425 кишида коронавирус аниқланди. Яна 4 киши касалликдан вафот этди.
Коронавирусга қарши курашиш штаби аъзоси Ҳабибулла Оқиловнинг аниқлик киритишича, ниқоб тақмаган фуқаролар аввалига огоҳлантирилади, қўпол қоидабузарлар эса жаримага тортилади. ИИВ матбуот котиби Шоҳрух Ғиёсов эса 9 январь куни карантин қоидаларини бузган 899 кишидан, 721 нафари огоҳлантирилгани, қолган 178 нафари эса жаримага тортилганини маълум қилди.
Жиззах шаҳрида эски газ қувурлари 1,5 минг километрдан зиёд узунликдаги янги қувурлар билан алмаштириш режалаштирилмоқда. Газ тақсимлаш станциялари сони ҳам қисқаради. Мазкур лойиҳа Туркиянинг Aksa компанияси билан ҳамкорликда амалга оширилади.
Москва — Қарши рейсини амалга ошираётган Россиянинг S7 Airlines авиакомпанияси самолёти кечаси Урганчга фавқулодда қўнди — йўловчилардан бирига тез тиббий ёрдам керак бўлди.
Қўшимча имкониятларга эга булиш учун сайтда рўйхатдан ўтинг