Ўзбекистон Ташқи ишлар вазирлиги Sputnik`нинг мамлакат Россия ва Беларусдан иборат Иттифоқ давлатига қўшилиши мумкинлиги ҳақидаги хабарига жавоб берди. Президент Александр Лукашенко собиқ СССР республикалари иттифоққа қўшилишига ишонч билдирган.
Осиё ва Параосиё ўйинларининг бир йилга қолдирилгани, тендерсиз танланган Тошкентдаги музейларни реконструкция қиладиган лойиҳачи ва пудратчилар, ўзбек-қирғиз чегарасидан ноқонуний ўтгани учун отилган 3 қирғизистонлик, кейинги ҳафтада кутилаётган сел ва тошқинлар, 9 майда отиладиган байрам салюти ва бошқалар — «Газета.uz»нинг 6 майдаги энг муҳим хабарлари дайжестида.
Россиянинг «Аэрофлот» авиакомпанияси 20 майдан бошлаб Москва — Тошкент йўналиши бўйича парвозларни тикламоқда. Парвозлар Airbus A330 лайнерларида улар лизингига ЕИ санкциялари юмшатилгани ортидан амалга оширилади.
Япония ташқи ишлар вазири Ёсимаса Хаяси Тошкентга ташрифи чоғида 200 млн долларгача кредит ажратилишини маълум қилди, Ўзбекистон билан Афғонистонда инклюзив сиёсий тизимни яратиш ва қизлар таълимини тезроқ тиклаш, Украинадаги вазият бўйича ҳамкорлик қилиш истагини билдирди. Ўзбекистон Япония сунъий йўлдошлари ва технологиялари ёрдамида иқлим ўзгариши оқибатларига қарши курашишни режалаштирмоқда.
Самарқанд вилоятидаги 60 ўринли маъмурий тартибда ҳибсга олинган шахсларни сақлаш учун махсус қабулхонада 161 киши сақланаётгани аниқланди. Омбудсманнинг минтақавий вакили томонидан сақланувчи шахсларнинг яшаш ва меҳнат шароитлари ўрганилди. Уларнинг бир кунлик даромади ўртача 40 500 сўмни ташкил қилади.
Миллий олипмия қўмитаси ташкил этилганининг 30 йиллигига бағишлаб ўтказилган тадбирда мустақил Ўзбекистон тарихидаги энг яхши спортчилар, етакчи спорт ташкилотлари аниқланди. Миржалол Қосимов, Абдулла Тангриев ва Оксана Чусовитиналар сўнгги 30 йилликнинг энг яхши спортчилари бўлишди.
Ўзбекистон ташқи ишлар вазири в. б. Владимир Норов ва Қирғизистон ташқи ишлар вазири Жээнбек Кулубаев телефон орқали мулоқотда чегарадаги отишмани муҳокама қилди.
Январь-март ойларида Ўзбекистоннинг доимий аҳолиси 130 минг кишига кўпайиб, 35,4 млн кишига етди. Йил давомида ўзбекистонликлар сони 738,3 минг кишига ёки 2,1 фоизга ўсди. Йилнинг дастлабки уч ойида туғилишлар сони кескин — 13,4 фоизга ўсди, ўлим даражаси эса 0,5 фоизга ошди ва ковиддан аввалги кўрсаткичдан юқорилигича қолмоқда.
Ўзгидромет кучли ёмғирлар туфайли душанбадан-жумагача республиканинг тоғ олди ва тоғли ҳудудларида сел-сув тошқинлари бўлиши мумкинлиги ҳақида огоҳлантирди.
Қибрай туманида давлат нотариал идораси нотариуси руҳий-асаб касалликлари диспансерида даволанаётган шахснинг уйини сотиб юборганликда гумон қилинмоқда.
10−25 сентябрь кунлари Хитойнинг Ханчжоу шаҳри мезбонлик қилиши режалаштирилган XIX Осиё ва Параосиё ўйинлари мамлакатдаги COVID-19 билан боғлиқ мураккаб эпидемиологик вазият туфайли бир йилга кечиктирилди.
Баҳорда Ўзбекистонда варрак учириш мавсуми бошланади. «Газета.uz» фотомухбири Евгений Сорочин ва фотосуратчи Мирзаёр Эркинов Тошкентнинг эски шаҳарида варраклар учирилишини кузатишди.
Туркиянинг Outdoor Factory компанияси Тошкентдаги учта давлат музейини реконструкция қилиш лойиҳаси доирасида тендерсиз лойиҳа ҳужжатларини ишлаб чиқиш ва пудрат ишларини амалга ошириш ҳуқуқини қўлга киритди.Компания «Истиқлол» мажмуаси, «Янги Ўзбекистон» истироҳат боғи ва университети, Тошкентнинг Эски шаҳар ҳудудидаги сайёҳлик маркази ва бошқаларни лойиҳалаш ва қуришда иштирок этган.
ДХХ ўзбек чегарачилари 3 нафар қирғизистонликка ўқ узгани ҳақидаги хабарлар юзасидан баёнот бериб, уларнинг чегарадан кўп миқдордаги юкларни ноқонуний равишда олиб ўтмоқчи бўлганини маълум қилди. Қоидабузарларнинг бир гуруҳи ҳарбий хизматчиларга қаршилик кўрсатиб, куч ишлатган.
Сурхондарёнинг Узун туманида кучли ёғингарчилик натижасида 40 га яқин уй сув остида қолди, 230 дан ортиқ киши мактаб биносига вақтинча жойлаштирилди. Ҳодиса оқибатида жабрланган ва ҳалок бўлганлар йўқ.
Туризм ва спорт вазирининг биринчи ўринбосари лавозимида ишлаб келган Улуғбек Азамов АОКА директорининг ўринбосари этиб тайинланди.
9 май куни кечқурун Тошкентдаги «Янги Ўзбекистон» боғида «Хотира ва қадрлаш куни»га бағишланган байрам салюти ташкил этилади.
Бир қатор озиқ-овқат маҳсулотлари, жумладан, гўшт, ўсимлик ёғи ва картошкани олиб кириш ва сотишда қўшилган қиймат солиғининг нол ставкаси муддати 2022 йил охиригача узайтирилди. Шунингдек, Мўйноқ туманидаги маҳаллий саноат, қишлоқ хўжалиги ва хизматлар соҳаларидаги тадбиркорлар 2031 йилгача айрим солиқларни 1 фоизда тўлайди.
Дам олиш кунлари Ўзбекистоннинг катта қисмида қуруқ ва жуда илиқ об-ҳаво бўлиши, ҳаво ҳарорати +30…+35 даражагача кўтарилиши кутилмоқда. 9 май куни Қорақалпоғистон, Хоразм, Бухоро ва Навоийда ёмғир ёғади. 10 майда эса республика бўйлаб кучли жала қуйиши мумкин, ҳарорат эса +23…+28 даражагача пасаяди.
Марказий банк президент Шавкат Мирзиёев шахсига бағишланган қимматбаҳо металлардан тайёрланган тангалар ёки банкнотларни муомалага чиқармаганлигини маълум қилди.
Қўшимча имкониятларга эга булиш учун сайтда рўйхатдан ўтинг