18 май куни Ўзбекистонда содир бўлган энг муҳим хабарлар дайжести
Си Цзиньпин ва Шавкат Мирзиёев музокаралари, Ўзбекистон-Хитой ўртасидаги 41 та ҳамкорлик ҳужжати, мактабда ўқувчини тишлаб олган илон, Озарбайжонда 3 та конни ўзлаштиришни режалаштираётган «Ўзбекнефтгаз», Боку портида терминал очадиган Ўзбекистон ва бошқалар — «Газета.uz»нинг кун дайжестида.
Алишер Султанов президент маслаҳатчиси этиб тайинланган
Собиқ энергетика вазири Алишер Султанов Ўзбекистон президентининг нефть-газ, кимё ва энергетика масалалари бўйича маслаҳатчиси этиб тайинлангани маълум бўлди.
Ўзбекистон ва Хитой вакиллари ўртасида 41 та ҳамкорлик ҳужжати имзоланди
Ўзбекистон ва Хитой раҳбари 2023−2027 йилларга мўлжалланган икки давлат ўртасида янги даврдаги ҳар томонлама стратегик шерикликни ривожлантириш дастурини қабул қилди. Улар иштирокида давлат органлари ва компаниялар ўртасида ҳам қатор ҳужжатлар имзоланди.
Яқин беш йилда Ер сайёрасида ҳарорат рекорд даражага чиқиши кутилмоқда — Бутунжаҳон метеорология ташкилоти
Келгуси беш йил иссиқхона газлари чиқиндилари ва Эль-Ниньо табиий ҳодисаси туфайли рекорд даражадаги энг иссиқ йил бўлиши мумкин, дея огоҳлантирмоқда Бутунжаҳон метеорология ташкилоти.
Ўзбекистон ва Хитой раҳбарлари Сианда инвестиция лойиҳалари ва савдо ҳажмини оширишни муҳокама қилди
Ўзбекистон президенти Шавкат Мирзиёев ва ХХР раиси Си Цзиньпин Хитойнинг камбағалликка қарши кураш тажрибасини мамлакатда татбиқ этиш, қайта тикланадиган энергия манбалари, хусусан, қуёш панеллар ишлаб чиқариш, электромобиль заводларини ишга туширишдаги ҳамкорлик каби масалаларни муҳокама қилди.
Тошкентдаги мактаблардан бирининг биносида ўқувчини илон тишлаб олди
Тошкентдаги 348-сонли мактаб (собиқ Тошкент вилоятига қарашли, коллектор ёнида жойлашган) биносида 6-синф ўқувчисини сув илони тишлаб олди. Унга биринчи тиббий ёрдам кўрсатилиб, шифохонага етказилган, шундан сўнг у ўқишга қайтган.
«Ўзбекнефтгаз» 2024 йилда Озарбайжонда учта конни ўзлаштиришни бошлашни режалаштирмоқда
«Ўзбекнефтгаз» SOCAR билан биргаликда 2024 йилда Озарбайжонда учта углеводород конини ўзлаштиришни бошлашни режалаштирмоқда. SOCAR`нинг эса Ўзбекистондаги қидирув ишларида иштирок этиши кутилмоқда.
Қарийб 2 трлн сўмлик қуёш панелларини ўрнатиш бўйича танлов бекор қилинди. Сабаблар
Энергетика вазирлиги қуёш панелларини ўрнатиш бўйича танлов натижаси бекор қилинганини билдирди. Қарийб 2 трлн сўмлик танловнинг барча — 6 та лотида иккита компания ғолиб чиққан. Танлов нотўғри ташкил этилгани учун энергетика вазири ички текширув эълон қилди.
Ўзбекистон Боку портида ўз терминалини очишни режалаштирмоқда
Транспорт вазири ўринбосари Абдусамат Мўминовнинг маълум қилишича, Ўзбекистон Боку портида ўз терминалини очишни режалаштирмоқда. Ҳозирда товарларни сақлаш учун мазкур порт ҳудудида омбор инфратузилмасини яратиш ишлари олиб борилмоқда.
Украина ва Россиянинг «дон битими» икки ойга узайтирилди
Украина донини Қора денгиз портларидан олиб чиқиш бўйича битим яна 60 кунга узайтирилди. Украина, Россия, Туркия ва БМТ томонидан тузилган битимнинг амал қилиш муддати 18 майда тугади.
Фуқароларнинг банк карталаридан фирибгарлик йўли билан пул ечиб олган шахслар ушланди
ИИВ Киберхавфсизлик маркази ўзини Сlick тўлов тизимининг хавфсизлик хизмати ходимлари сифатида таништириб, фуқароларнинг банк карталаридан пул ечиб олган бир неча шахсни аниқлади.
Қозоғистон Мудофаа вазирлиги делегацияси Ўзбекистонга келди
Ўзбекистон мудофаа вазири Баҳодир Қурбонов қозоғистонлик ҳамкасби Руслан Жақсилиқовни қабул қилди. Томонлар ҳарбий соҳада ўзаро ҳамкорликни ривожлантириш ва мустаҳкамлаш бўйича таклифлар билдиришди ва истиқболдаги режаларни муҳокама қилишди.
Ўзбекистондаги музей ва кўргазмаларга онлайн саёҳат
«Газета.uz» республикада мавжуд мемориал музейлар ҳақида кўплаб мақола ва фоторепортажлар тайёрлаган. 18 май — Халқаро музейлар куни муносабати билан таҳририят ана шу тарихий манзилларга виртуал саёҳат қилишга таклиф этади.
Сурхондарё вилоятида «тез ёрдам» ходимлари чақирувга скутерларда ҳам бормоқда
Сурхондарё вилоятида фельдшерлар синов тариқасида «тез ёрдам» чақирувига скутерларда ҳам бормоқда. Бунда тирбандликлар ва ҳаракатланиш қийин бўлган жойларда осон юра олиш мақсад қилинган. Улар аҳволи оғир бўлмаган беморларга биринчи ёрдамни кўрсатиб қайтади.
Ўзбекистон Тожикистондан 1,2 млрд кВт соат электр энергиясини импорт қилади
2023 йилнинг май-сентябрь ойларида Ўзбекистон Тожикистондан 1 млрд 285 млн кВт соат электр энергиясини импорт қилади.
Нью-Йоркда теракт уюштирган Сайфулло Соипов 8 марта умрбод ва 260 йилга озодликдан маҳрум қилинди
2017 йил Нью-Йоркда юк машинасини одамлар устига ҳайдаб, 8 кишининг ўлимига сабаб бўлган ўзбекистонлик Сайфулло Соипов 8 марта умрбод ва 260 йилга озодликдан маҳрум қилинди.
ЕТТБ Uzbekistan Airports махсус техника паркини янгилашда ёрдам беради
ЕТТБ Uzbekistan Airports`га Ўзбекистон халқаро аэропортларида махсус техникалар паркини янгилаш учун 28 млн еврогача маблағ ажратади. Шунингдек, банк компания ва унинг таркибий бўлинмалари фаолияти самарадорлигини ошириш учун 1 млн евро миқдорида грант ажратади.
Кучли зилзилалар ҳақида эрта огоҳлантириш миллий тизими ишга туширилади
1 декабрдан Ўзбекистонда кучли зилзилалар ҳақида эрта огоҳлантириш миллий тизими босқичма-босқич ишга туширилади. Бунда «Кучли зилзиладан огоҳлантириш» мобил иловаси орқали аҳолига қисқа сонияларда республиканинг аниқланган ҳудудларида кучли зилзила кузатилиши тўғрисида тезкор хабарнома юборилади.
Тижорат банкларида доллар курси сезиларли кўтарилди
Тижорат банклари 18 май куни аҳолидан 1 АҚШ долларини 11 405 — 11 450 сўмдан сотиб олмоқда, сотув курси эса 11 480 — 11 520 сўм.
Ўзбекистоннинг 9 та ҳудудида сел-сув тошқини хавфи эълон қилинди
18−20 май кунлари кутилаётган кучли ёмғирлар ёғиши сабабли Ўзбекистоннинг 9 та вилоятида сел-сув тошқини ҳодисалари юзага келиши мумкин.
Қўшимча имкониятлардан фойдаланиш учун сайтда рўйхатдан ўтинг