Arxiv
31-yanvar kuni e’lon qilingan eng muhim yangiliklar dayjesti
ID kartalarni tan olish masalasini muhokama qilayotgan O‘zbekiston va Ozarbayjon, dehqon xo‘jaliklari va tomorqani rivojlantirish bo‘yicha alohida kengash, ma’muriy sud ish yurituvida dastlabki eshituv instituti, oiladagi zo‘ravonlikka qarshi kurash bo‘yicha takliflar va boshqalar — “Gazeta.uz"ning kunlik dayjestida
Agrovazirlik — kartoshka keskin qimmatlaganining sabablari va narxlar qachon tushishi haqida
O‘zbekistonda kartoshka narxi oshganiga kuzda qayta ekilgan maydonlardan yetarlicha hosil olinmagani sabab bo‘ldi, deb xabar berdi Qishloq xo‘jaligi vazirligi. Noyabr-aprel uchun 1,7 mln tonna kartoshka zarur, amalda esa mavsumiy talabning 44 foizi yig‘ilgan. Vazirlik narx qachon pasayishi mumkinligini aytdi.
Nodirbek Yoqubboyev o‘yin oldidan qo‘l berib ko‘rishmagani uchun hindistonlik shaxmatchidan uzr so‘radi
O‘zbekistonlik grossmeyster Nodirbek Yoqubboyev hindistonlik shaxmatchi Rameshbabu Vayshalidan Veyk-an-Zeye shahrida bo‘lib o‘tgan Tata Steel Chess turnirida o‘yin oldidan qo‘l berib ko‘rishishdan bosh tortgani uchun shaxsan uzr so‘radi. U shaxmatchi qizga gullar va shokoladlar berdi hamda omma oldida kechirim so‘radi.
O‘zbekistonda sun’iy intellekt sohasida axloqiy me’yorlar joriy qilinadi — bosh vazir
Sun’iy intellekt rivojlanishi ulkan imkoniyatlarni ochadi, lekin bu axloq, regulyatsiya va ma’lumot himoyasi masalalarini hal qilishni talab qiladi, dedi bosh vazir Abdulla Aripov Digital Almaty 2025 forumida. Uning so‘zlariga ko‘ra, mamlakat 2025-yilda SI sohasiga axloqiy me’yorlarni integratsiya qilmoqchi.
Foto: Toshkent Botanika bog‘idagi olmaxonlar
Toshkent Botanika bog‘ida olmaxonlar shu qadar ko‘paydiki, endi fotosuratchilar ham — xuddi “Gazeta.uz” muxbiri Murod Yusuf kabi — ularni bemalol fotohikoya qahramonlariga aylantiryapti. Qizig‘i, olmaxonlar O‘zbekistonga xos tur emas, ularning ko‘payishi esa “yashash sharoitlarining yaxshilanishi” bilan bog‘liq.
Nima tayyorlaymiz: kish
Brinza va ismaloqli, tovuq va pomidorli, sabzavotli kish va boshqa fransuz piroglari retseptlari — Zira.uz jamlanmasida.
Ayollarga nisbatan zo‘ravonlik uchun tajovuzkorlar qanday jazolanyapti va oiladagi zo‘ravonlikka qarshi kurashda nimalarni o‘zgartirish kerak?
Nemolchi.uz loyihasi faoli Nigina Xudaybergenova Jinoyat kodeksiga 2023-yili kiritilgan maishiy zo‘ravonlik to‘g‘risidagi modda qanday qo‘llanilayotganiga aniqlik kiritish maqsadida sudlarning 400 dan ortiq qarorlarini o‘rganib chiqdi. Asosiy xulosa — ayollarni himoya qilish uchun bitta modda yetarli emas.
Janubiy Koreyadagi o‘zbek mehnat muhojirlari orasida ish joyini tashlab ketish holatlari ko‘p — Migratsiya agentligi
Janubiy Koreyaga ishga yuborilgan o‘zbekistonliklar orasida shartnomadagi ish joyini tashlab ketish holatlari ko‘p uchrayapti. Hozir u yerdagi O‘zbekiston fuqarolarining 9,6 foizi nolegal maqomida. Migratsiya agentligiga ko‘ra, “agar ko‘rsatkich 10 foizga yetsa, Koreya biz bilan migratsiya aloqalarini to‘xtatishi mumkin”.
Jurnalist Ruxsora G‘ofurova IIBga chaqirtirildi, bank mansabdorlariga esa jinoyat ishi qo‘zg‘atildi. O‘zi nima gap?
MY5 telekanali muxbiri Ruxsora G‘ofurovaning o‘zgalar nomiga kredit olganlikda gumon qilinayotgan bank xodimasi haqidagi materiali muhokamalarga sabab bo‘ldi. Material sabab jurnalist IIBga chaqirtirilgan. Bank mansabdorlariga nisbatan esa jinoyat ishi qo‘zg‘atildi. “Gazeta.uz” jarayon tafsilotlarini o‘rgandi.
Ukraina urush boshidan buyon Markaziy Osiyo mamlakatlarining 30 ga yaqin fuqarosini asirga olgan — Ukraina Adliya vazirligi
Ukraina Adliya vazirligi 2022-yil fevral oyida Rossiyaning Ukrainaga bostirib kirishi boshlanganidan beri Markaziy Osiyo davlatlarining 30 ga yaqin fuqarosi Ukraina tomonidan asirga olingani haqida xabar berdi.
Toshkent viloyatida erkak tuzatish uchun qoldirilgan telefondan 9 mln so‘m yechib oldi
Angren shahrida 31 yoshli telefon ustasi tuzatish uchun qoldirilgan telefondan 9 mln so‘m yechib oldi. Erkak pulni shaxsiy ehtiyojlari uchun sarflab yuborgan. Gumonlanuvchi protsessual tartibda ushlandi va jinoyat ishi qo‘zg‘atildi.
Chempionlar ligasi o‘tish o‘yinlariga qur’a tashlandi: “Manchester Siti” “Real” bilan o‘ynaydi
Yevropa Chempionlar ligasining pley-off bosqichiga o‘tish o‘yinlari uchun qur’a tashlandi. “Manchester Siti” nimchorak final yo‘llanmasi uchun “Real” bilan o‘ynaydi. Bu juftlik g‘olibini esa keyingi bosqichda “Atletiko” yoki “Bayer” kutadi.
Qozog‘istonda QQSni 12 foizdan 20 foizgacha oshirish muhokama qilinmoqda
Qozog‘istonda “budjet inqirozi” fonida qo‘shilgan qiymat solig‘i stavkasini 12 dan 20 foizgacha oshirish muhokama qilinmoqda. Ayni vaqtda ish beruvchilarning ijtimoiy solig‘i va majburiy pensiya to‘lovlarini bekor qilish taklif qilinmoqda. Qosim-Jomart Toqayev ham soliq islohotlari zarur ekanini ta’kidladi.
Ma’muriy sud ish yurituvida dastlabki eshituv instituti joriy etiladi
O‘zbekistonda ma’muriy sud ish yurituvida dastlabki eshituv instituti joriy etiladi. Ma’muriy sudga nizolarni hal etish jarayonida sudga hurmatsizlik qilinishi va ajrim bo‘yicha choralar ko‘rmaslikka oid huquqbuzarliklar aniqlanganda, ma’muriy huquqbuzarliklar to‘g‘risidagi ishlarni ko‘rish vakolati ham beriladi.
Sherzod Hidoyatov O‘zbekiston og‘ir atletika federatsiyasi raisi bo‘ldi
Qurilish va uy-joy kommunal xo‘jaligi vaziri Sherzod Hidoyatov O‘zbekiston og‘ir atletika federatsiyasi rais etib saylandi.
Vashingtondagi aviahalokat paytida aeroportda dispetcherlar yetishmagan, vertolyot esa keragidan balandroq uchgan — NYT
American Airlines yo‘lovchi samolyoti harbiy vertolyot bilan to‘qnashgan kuni Vashington aeroportida dispetcherlar yetishmagan, deb yozmoqda NYT. Bundan tashqari, vertolyot belgilangan yo‘nalishdan chetga chiqib, me’yordan yuqori balandlikda uchgan.
Deputatlar Suv kodeksi bo‘yicha qonun loyihasini qabul qildi va Senatga yubordi
Qonunchilik palatasi deputatlari Suv kodeksini tasdiqlash to‘g‘risidagi qonun loyihasini ikkinchi va uchinchi o‘qishda qabul qilib, Senatga yubordi.
O‘zbekistonda 2024-yilda har uchinchi YTH yuk va yo‘lovchi transporti ishtirokida sodir bo‘ldi
2024-yilda O‘zbekistonda 9364 ta YTH qayd etilgan bo‘lib, shundan 3045 tasi (32,5%) yuk mashinalari va yo‘lovchi tashuvchi transportlar ishtirokida sodir bo‘ldi. YTHlarning deyarli yarmi Damas ishtirokida bo‘lgan. 351 ta YTHda haydovchilar rulda uxlab qolgan, oqibatda 189 kishi halok bo‘lgan.
Deputatlar diniy sohadagi davlat siyosati konsepsiyasi loyihasini birinchi o‘qishda qabul qildi
O‘zbekistonda deputatlar fuqarolarning vijdon erkinligini ta’minlash va diniy sohadagi davlat siyosati konsepsiyasi loyihasini birinchi o‘qishda qabul qildi. Konsepsiyada diniy sohadagi davlat siyosatining maqsadi, vazifalari, ustuvor yo‘nalishlari va ularni amalga oshirish mexanizmlari belgilangan.
Tramp juda ko‘p gapirayotgani uchun Oq uy qo‘shimcha stenografistlarni yollamoqchi
Donald Trampning nutqlarini qayd etib ulgurilmayotgani uchun Oq uy qo‘shimcha stenografistlarni yollashni reja qilmoqda. Tramp, xususan, lavozimining birinchi haftasida omma oldida salkam 8 soat gapirdi va 81,2 mingta so‘z ishlatdi.
Eng ko‘p o‘qilgan xabarlar | So‘nggi yangiliklar
Qo‘shimcha imkoniyatlardan foydalanish uchun saytda ro‘yxatdan o‘ting