Мактабларда таълим жараёни бир вақтнинг ўзида икки хил — анъанавий ва масофавий шаклда йўлга қўйилади. Янги ўқув йили эса 14 сентябрдан бошланади. Президент пандемия шароитида таълим жараёнини ташкил этиш бўйича топшириқлар берди.
Ўзбекистон бош прокурори Ниғматулла Йўлдошев «Халқ сўзи» газетасига тақдим этган мақоласида прокуратура тизимида коррупцияга қарши кураш, назорат тадбирларида аниқланган талон-торож ҳолатлари ва бошқаларга тўхталди. Жумладан, қурилиш соҳасида — 78 млрд сўм, қишлоқ хўжалигида — 89,7 млрд сўм, ойлик ва нафақалардан — 16 млрд сўм, табиий газдан — 41 млрд сўм талон-торож қилинган.
Президент барча раҳбарларни COVID-19 бўйича ҳақиқий рақамларни яширишга мутлақо йўл қўймаслик тўғрисида огоҳлантирди. Бунга уринганларга жиноий жавобгарликкача бўлган қатъий чоралар кўрилиши мумкин. Тўй-маросимларни бир кунда 3−4 марта ўтказиш ҳолатларига чек қўйиш кераклиги кўрсатиб ўтилди.
«Такси"лар фаолиятини лицензиялашда қандай ўзгаришлар бўлиши кутилмоқда? Жисмоний шахслар ҳам эндиликда лицензиясиз қонуний фаолият олиб борса бўладими? Юридик шахслар учун лицензия олишда қандай енгилликлар жорий этилмоқда — ҳуқуқшунос Дилшод Шодиев мақоласида.
Ўзбекистонда 1 октябрдан мобил телефон рақамини ўзгартирмасдан туриб бошқа компанияга ўтказиш имконияти пайдо бўлади. Бунинг учун мобил алоқа оператори билан тегишли шартнома тузиш керак бўлади.
2018 ва 2020 йиллар эълон қилинган Doing Business рейтинги ҳисоботида юзага келган хатолар сабабли Жаҳон банки ҳисобот маълумотларини қайта кўриб чиқади. Ҳозирча ташкилот рейтингни вақтинчалик эълон қилмайдиган бўлди
Ўзбекистонда ҳозиргача 90 мингга яқин бола карантинга олинган бўлиб, уларнинг 3932 нафарида COVID-19 аниқланган.
Япония Бош вазири Синдзо Абэ 28 август куни бўлиб ўтган пресс-конференцияда соғлиғи ёмонлашгани сабабли истеъфога чиқишини эълон қилди.
Ўзбекистон мустақиллигининг 29 йиллиги арафасида озодликдан маҳрум этиш жазосини ўтаётган ҳамда қилмишига чин кўнгилдан пушаймон бўлиб, тузалиш йўлига қатъий ўтган 113 нафар фуқаро афв этилди. Президент бу ҳақдаги тегишли фармонни имзолади.
COVID-19 пандемияси даврида мактабларга қўйиладиган вақтинчалик санитария талаблари тасдиқланди. Хусусан, мактабларда оммавий тадбирлар ўтказилмайди, ниқобсиз мактабга киришига рухсат берилмайди, ўқувчи ва ўқитувчилар «эрталабки фильтрлаш» жараёнидан ўтишади.
Самарқандда 2022 йилда ўтказилиши кутилаётган Шанхай ҳамкорлик ташкилотининг (ШҲТ) саммитига тайёргарлик ишларида жами 7,4 млрд сўм пул талон-торож қилингани ва нотўғри сарфлангани аниқланди. Ушбу ҳолатлар юзасидан 5 та жиноят иши қўзғатилиб, тергов ишлари ўтказилмоқда.
Президент фармонига кўра, Бухоро вилояти ҳокимининг молия-иқтисодиёт ва камбағалчиликни қисқартириш масалалари бўйича биринчи ўринбосари лавозимида фаолият олиб бораётган Фарҳод Умаров вилоят ҳокими вазифасини вақтинча бажарувчи этиб тайинланди.
Президент фармони билан Бўстонлиқ туманида 2022 йил якунигача алоҳида маъмурий-бошқарув тизими жорий қилинади. Ушбу ҳудудга бош вазир ўринбосари масъул шахс этиб тайинланди. Унга ҳудудни бошқариш Дирекцияси билан биргаликда туманни ҳар томонлама ривожлантириш вазифаси юклатилди.
Ўзбекистонда 166 та янги коронавирус билан касалланиш ҳолати қайд этилди. Ҳозирда коронавирусдан даволанаётганлар сони 3113 кишини ташкил этиб, уларнинг 279 нафари оғир аҳволда, 133 нафари эса ўта оғир аҳволда. Шу билан бирга, икки нафар коронавирус бемори вафот этди.
27 август куни Туркиядан 16 нафар тажрибали мутахассислардан иборат тиббий гуруҳ, коронавирусга қарши курашаётган шифокорларга ёрдам бериш ва тажриба алмашиш мақсадида Ўзбекистонга йўл олишди.
Владимир Путин Александр Лукашенконинг илтимосига кўра, Беларусга ёрдам бериш учун ҳарбий куч захирасини шакллантирганини айтди. Унинг сўзларига кўра, Россия кучларини ҳозирча Беларусда ишлатишга ҳожат йўқ.
Президент Шавкат Мирзиёев геология соҳасида амалга оширилаётган ишлар самарадорлиги ошириш мақсадида Давгеолқўм раисига геология-қидирув ишларини 2 баробар кенгайтириш, Наманган тажрибаси асосида ҳар бир ҳудудда доимий геологик экспедициялар ташкил этиш бўйича топшириқлар берди.
Ҳукумат қарори билан Андижон иқтисодиёт ва қурилиш институти ташкил этилди. Унда таълим фаолияти 2020/2021 ўқув йилидан бошланади.
Россиялик блогер ва урбанист Илья Варламов ўз видеолавҳаларининг бирида чамадонни кўздан кечираётганда унинг кроссовкалари билан қизиқиб қолган, аммо катталиги мос келмагани учун фақат сигаретларни олиб қолган ўзбекистонлик чегарачи билан боғлиқ вазиятни эслаб ўтди. Давлат божхона қўмитаси Варламов сўнгги йилларда Ўзбекистон-Қозоғистон чегарасидаги назорат-ўтказиш пунктидан ўтмаганлигини айтди. Блогер вазият 10 йил олдин содир бўлганлигини тушунтириб, Давлат божхона қўмитасини Россия фуқароларининг шахсий маълумотлари ва саёҳат маълумотларини ошкор этмасликка чақирди.
Туризмни ривожлантириш давлат қўмитасининг департаменти бошлиғи бўлиб ишлаб келаётган Жўрабек Аҳмедов Тошкент вилояти Бўстонлиқ тумани ҳокими лавозимига тайинланди.
Қўшимча имкониятларга эга булиш учун сайтда рўйхатдан ўтинг